1 Samuel 10

Kamba (MBIVILIA ŨVOO MŨSEO)

← Chapter 9 Jump to: Chapter 11 →

1Nĩvo ĩndĩ Samũeli woosie sũva wa mauta na etĩkĩsya Saũlo mũtwe, na amũkethya na ngethi ya wendo. Samũeli nĩwaneenie asya atĩĩ, “Mwĩai Ngai nĩwakwĩtĩkĩsya mauta ũtw'ĩke mũsumbĩ wa andũ make ma Ĩsilaeli. Ũkasumbĩkaa andũ make na kũmatangĩĩa kuma amaithanĩ moo onthe.

2Ũmũnthĩ twamina kũtaanĩsya, nũũkomana na aũme elĩ vakuvĩ na vala Laeli wathikiwe, vandũ vetawa Nzelisa mũvakanĩ wa nthĩ ya Mbengyameni. Nĩmeũkũtavya kana mang'oi ala ũnaendie kũmantha nĩmoneku, nayu ĩthe waku nũekie kũsũanĩa ĩũlũ wamo na e na kĩũũyũ nũndũ waku. Eneena aikũlya atĩĩ, ‘Nĩĩka ata nũndũ wa mwana wakwa?’

3Nĩvo ĩndĩ ũkuma vau ũende nginya vala ve ũla mũtĩ mũtheu wĩ Tavoli, na vau ũikomana na aũme atatũ maendete Mbethi-eli kumĩsya Ngai nthembo. Ũmwe wa aũme asu eĩthĩwa aingĩte tũtena tũtatũ, ũngĩ eĩthĩwa akuĩte mĩkate ĩtatũ na wa katatũ eĩthĩwa akuĩte kĩkuu kĩseũvĩtw'e na kĩthuma kyusĩe ndivai.

4Aũme asu nĩmeũkũkethya na maikũnenga mĩkate ĩlĩ. Ĩtĩkĩla kwosa mĩkate ĩsu meũkũnenga.

5Ĩtina wa ũu enda Kĩĩmanĩ kya Ngivea kĩla nĩ kĩĩma kya Ngai vala Asikalĩ ma Avilisiti mambĩte maeema moo. Mũvĩanĩ wa ndũa ĩsu nũũkomana na nguthu ya athani matheete kuma kĩthembeonĩ me na ngitaa nene, ndambulĩnĩ, mĩtũlilũ na ngitaa nini. Syĩndũ isu sya mbathi syĩĩthĩwa iikũnwa, namo athani asu meĩthĩwa mayathana.

6Veva wa Mwĩai Ngai nũkũka na vinya mũnene ĩũlũ waku, naku ũilikana namo wathane na ũialyũlwa wĩthĩwe mũndũ ũngĩ.

7Yĩla mawonany'o asu mekwĩkĩka, ĩka ũndũ w'onthe ũla ũtonya kwĩka, nũndũ Ngai e vamwe naku.

8Theea ũndongoesye ũendete Ngilikali. Kwa w'o nyie ngooka vala ũĩ na ngĩthemba nthembo sya kũvĩvw'a na nthembo sya ngwatanĩo. Ĩndĩ no nginya weteele vandũ va mĩthenya mũonza nginya nũke vala ũĩ na ngĩũtavya ũndũ waĩlĩte kwĩka.”

9Yĩla Saũlo waumie vala ve Samũeli, Ngai nĩwaalyũlile ngoo ya Saũlo. Mũthenyanĩ ũsu maũndũ onthe ala Samũeli watavĩtye Saũlo nĩmeekĩkie.

10Yĩla Saũlo na mũthũkũmi wake mavikie Ngivea, nĩwathaũiwe nĩ nguthu ya athani. Veva wa Mwĩai Ngai nĩwookie na vinya ĩũlũ wa Saũlo, nake alikana namo ambĩĩa kwathana.

11Yĩla andũ ala meesĩ Saũlo kuma tene moonie akĩka ũu, nĩmakũlanilye ene kwa ene mayasya atĩĩ, “Nĩ kyaũ kyeekĩka kũla kwĩ mwana wa Kisi? Saũlo o nake ko watw'ĩka ũmwe wa athani?”

12Mũndũ ũmwe watwĩe vau nĩwaisye atĩĩ, “Vai vata wa kũmanya ĩthe wake nũũ; mũndũ o na wĩva nũtonya kũtw'ĩka mwathani.” Kwoou ũsu watw'ĩka wumo wa nthimo ĩno: “Saũlo o nake ko watw'ĩka ũmwe wa athani?”

13Saũlo amina kwathana, nĩwambatie athi kĩthembeonĩ vandũnĩ va kũthaithĩa.

14Mwendw'a-ĩthe wa Saũlo oona Saũlo na ũla mũthũkũmi wake nĩwamakũlilye atĩĩ, “Mwaendie nakũ?” Saũlo asũngĩa amwĩa, “Twaendie kũmantha mang'oi, na twalea kũmona twathi kwa Samũeli.”

15Mwendw'a-ĩthe amwĩa atĩĩ, “Ndavye ũndũ Samũeli ũnamwĩie.”

16Saũlo asũngĩa amwĩa atĩĩ, “Atwĩie kana mang'oi nĩmonekie.” Ĩndĩ Saũlo ndaatavya mwendw'a-ĩthe kana Samũeli amwĩie akatw'ĩka mũsumbĩ.

17Samũeli nĩweetie andũ ma Ĩsilaeli moke mombanĩe Misiva mbee wa Mwĩai Ngai.

18Mooka nĩwaneenie namo amea atĩĩ, “Mwĩai Ngai, Ngai wa Ĩsilaeli easya, ‘Nĩnamumisye nthĩ ya Misili na namũvonokya kuma ũtonyinĩ wa andũ ma Misili, na kuma mosumbĩnĩ ala angĩ onthe mamũthĩnasya.’

19Ĩndĩ yu nĩmũleete Ngai wenyu ũla ũmũvonokasya kuma mathĩnanĩ na maũndũnĩ me vinya, na nĩmũneenete mũkasya, ‘Aiee, tũnenge mũsumbĩ atũsumbĩke.’ Kwoou yu ĩndĩ ũmbanai vamwe mbee wa Mwĩai Ngai kwĩanana na mbaĩ na mĩsyĩ yenyu.”

20Samũeli nĩwathengeeisye mbaĩ syonthe sya andũ ma Ĩsilaeli, na Mwĩai Ngai anyuva mbaĩ ya Mbengyameni.

21Nĩvo ĩndĩ Samũeli waetie andũ ma mbaĩ ya Mbengyameni mũsyĩ kwa mũsyĩ, na mũsyĩ wa Matili wanyuvwa. Aũme ma mũsyĩ wa Matili nĩmaetiwe ũmwe kwa ũmwe, na ĩndĩ Saũlo mwana wa Kisi anyuvwa, ĩndĩ yĩla wamanthiwe ndaaoneka.

22Kwoou nĩmakũlilye Mwĩai Ngai ĩngĩ atĩĩ, “Mũndũ ũsu nĩwũkie vaa?” Nake Mwĩai Ngai asũngĩa asya, “Saũlo e vaaya evithĩte mĩionĩ.”

23Kwoou nĩmasembie na maumĩlya Saũlo mbee wa andũ. Nĩmoonie kana Saũlo aĩ mũasa mbee wa mũndũ o na wĩva ũkethĩa andũ ala angĩ mamũvikĩte ituo.

24Samũeli nĩwaneenie na andũ amea atĩĩ, “Ũyũ nĩwe mũndũ ũla Mwĩai Ngai ũnyuvĩte. Vai ũngĩ katĩ waitũ ũilyĩ take.” Andũ onthe nĩmaneenie na wasya mũnene masya atĩĩ, “Mũsumbĩ nĩekale thayũ ĩvinda ĩasa!”

25Samũeli nĩwatavisye andũ onthe maũndũ ala mũsumbĩ waĩlĩte kwĩkwa na ala waĩlĩte kwĩka. Nĩwaandĩkie maũndũ asu ĩvukunĩ, na ayia mbee wa Mwĩai Ngai. Ĩtina wa ũu nĩwoombũũkisye andũ onthe kĩla ũmwe athi kwake.

26Saũlo o nake nĩwenũkie mũsyĩ Ngivea. Nĩwaendanisye na andũ amwe maĩ ngũmbaũ ala Ngai wakiitĩte ngoo syoo.

27Ĩndĩ andũ amwe athũku makũlya atĩĩ, “Mũndũ ũũ atonya kũtũtangĩĩa ata?” Nĩmavũthisye Saũlo, na o na mayaamũetee mĩthĩnzĩo. Ĩndĩ Saũlo ndaaneena ũndũ.

← Chapter 9 Jump to: Chapter 11 →