1 Samuel 9

Kamba (MBIVILIA ŨVOO MŨSEO)

← Chapter 8 Jump to: Chapter 10 →

1Kwaĩ mũndũ ũmwe waĩ mũthwii mũno weetawa Kisi wa mbaĩ ya Mbengyameni. Aĩ mwana wa Avieli na mwĩsũkũũe wa Nzeloli. Nzeloli aĩ mwana wa Mbekolathi na mwĩsũkũũe wa Avia.

2Kisi aĩ na mwana weetawa Saũlo. Saũlo aĩ mũndũ wa mũika mũmbe nesa. Katĩ wa andũ onthe ma Ĩsilaeli, vai ũmwe waĩ mwanake mbee wake. Saũlo aĩ mũasa mbee wa mũndũ o na wĩva katĩ wa andũ onthe ma Ĩsilaeli ũkethĩa andũ ala angĩ mavikĩte ituonĩ syake.

3Mũthenya ũmwe mang'oi ma Kisi ĩthe wa Saũlo nĩmaaie na kwoou Kisi aneena na Saũlo amwĩa atĩĩ, “Osa ũmwe wa athũkũmi mũendany'e mũkamanthe mang'oi.”

4Nĩmesĩlile nthĩ yĩ iĩma ya Evalaimu na mesĩla nthĩ ya Salisa ĩndĩ mayaamona. Kwoou nĩmaendeeie mesĩla nthĩ ya Saalimu ĩndĩ mayaaona mang'oi asu. O ta ũu nĩmesĩlile kĩsionĩ kya nthĩ ya Mbengyameni kyonthe ĩndĩ mayaamona.

5Yĩla mavikie nthĩ ya Nzuvu, Saũlo nĩwaneenie na mũthũkũmi wake ũla maendanĩtye amwĩa atĩĩ, “Ũka tũsyoke mũsyĩ nĩ kana ĩthe waitũ ndakese kũeka kũsũanĩa ĩũlũ wa mang'oi, na aikwatwa nĩ kĩũũyũ nũndũ witũ.”

6Mũthũkũmi ũsu nĩwasũngĩie amwĩa atĩĩ, “Kweeteela vanini! Ndũanĩ ĩno ve mũndũ wa Ngai ũnengetwe ndaĩa mũno. Ũndũ w'onthe ũla ũwetaa nũtw'ĩkaa wa w'o. Yu tũthi vo na nokwĩthĩwa atonya kũtũtavya vala mang'oi asu maĩ.”

7Saũlo nĩwakũlilye mũthũkũmi ũsu atĩĩ, “Twathi kwake twĩmũnenga kyaũ? Mĩvukonĩ yaitũ vai lĩu ũtialĩte na tũi na kĩndũ tũtonya kũmũnenga ta mũthĩnzĩo. Twĩ na kyaũ?”

8Mũthũkũmi nĩwasũngĩie asya atĩĩ, “Nĩna mbesa nini sya silĩva. No nĩmũnenge syo, nake aitwathĩĩa vala tũkwĩthĩa mang'oi.”

9(Vau mbeenĩ katĩ wa andũ ma Ĩsilaeli, ethĩwa mũndũ eenda kũkũlya Ngai ũndũ aasya, “Ũka tũthi kũla kwĩ mũndũ ũla wĩthĩawa na woni wa maũndũ,” nũndũ mũndũ ũla wĩtawa mwathani ĩvindanĩ yĩĩ, ĩvindanĩ yĩu eetawa mũndũ ũla wĩthĩawa na woni wa maũndũ.)

10Saũlo nĩweeie ũla mũthũkũmi atĩĩ, “Nĩ ũseo, nĩtũthi.” Kwoou nĩmaendie ndũanĩ ĩla mũndũ ũsu wa Ngai waĩ.

11Maendee kwambata kĩĩma maendete ndũanĩ, nĩmakomanie na eĩtu maumĩte kũuta kĩw'ũ na mamakũlya atĩĩ, “Mũndũ ũla wĩthĩawa na woni wa maũndũ e vaa?”

12Eĩtu asu nĩmasũngĩie mamea atĩĩ, “Ĩĩ, e o vau mbee wenyu. Ĩkalaatei na nĩmũũmwona; no ĩndĩ wavika vaa ndũanĩ nũndũ ũmũnthĩ andũ nĩmekumya nthembo kĩthembeonĩ.

13Mwamina kũlika ndũanĩ oou, nĩmũkũmwĩthĩa atanamba kũthi vandũnĩ va kũthaithĩa akaye. Andũ mayĩambĩĩa kũya atavikĩte, nũndũ no nginya aathime nthembo ĩsu. Ĩtina wa ũu andũ ala mathoketw'e nĩmeũya. Kwoou ambatai na nĩmũũmwĩthĩa oyu.”

14Saũlo na mũthũkũmi wake nĩmambatie mathi ndũanĩ. Mailika mũvĩanĩ wa ndũa ĩsu, nĩmoonie Samũeli aumaalĩte okĩte ngalĩko ĩla maĩ ambatĩte athi kĩthembeonĩ.

15Ĩyoo yĩu, Mwĩai Ngai aĩ aneevuany'a kũla kwĩ Samũeli akamwĩa atĩĩ,

16“Ũnĩ saa ta ii ngakũtũmĩa mũndũ kuma mbaĩnĩ ya Mbengyameni. Mwĩtĩkĩsye mauta ethĩwe mũsumbĩ wa andũ makwa ma Ĩsilaeli. Nũkũmatangĩĩa kuma kwa Avilisiti. Nĩnonete ũndũ andũ makwa mekũthĩna na nĩnĩw'ĩte kĩĩo kyoo mayenda nĩmatetheesye.”

17Yĩla Samũeli woonie Saũlo, Mwĩai Ngai nĩwaneenie nake amwĩa atĩĩ, “Mũndũ ũla nĩnakũtavasya ĩũlũ wake nũsu. Ũsu nĩwe wĩsumbĩka andũ makwa.”

18Nĩvo ĩndĩ Saũlo wathengeeie Samũeli e vau mũvĩanĩ na amwĩa atĩĩ, “Mwa ndavye vala ve mũsyĩ wa mũndũ ũla wĩthĩawa na woni wa maũndũ.”

19Samũeli nĩwamũsũngĩie amwĩa atĩĩ, “Ninyie mũndũ ũla wĩthĩawa na woni wa maũndũ. Ambata ũndongoesye nginya vandũnĩ va kũthaithĩa, nũndũ ũmũnthĩ mwĩ elĩ nĩmũkũĩsanĩa nakwa, na ũnĩ kwakya ngamũsũngĩa ũndũ mũkwenda na ngĩmũeka mũthi.

20Mang'oi menyu ala manaaie mĩthenya ĩtatũ mĩvĩtu nĩmaminĩte kwoneka, kwoou mũikathĩnĩke nĩmo. Ĩndĩ ũu wĩ o vo, nũũ ũla andũ ma Ĩsilaeli mekwenda mũno? Nue mekwenda, we na andũ ma mũsyĩ wa ĩthe waku.”

21Saũlo nĩwamũsũngĩie amwĩa atĩĩ, “Nyie numĩte mbaĩnĩ ya Mbengyameni, na nĩyo mbaĩ ĩla nini vyũ katĩ wa mbaĩ sya andũ ma Ĩsilaeli, naw'o mũsyĩ witũ nĩw'o mũnini vyũ mbaĩnĩ yaitũ. Yu ĩndĩ wĩneena ũu ĩũlũ wakwa nĩkĩ?”

22Nĩvo ĩndĩ Samũeli watwaie Saũlo na mũthũkũmi wake amalikya nyũmbanĩ nene ya kũmbanĩa. Nĩwamekalilye vandũ vala ve ndaĩa mbee wa vala aeni ma ndaĩa mailyĩ. Aeni asu maĩ ta andũ mĩongo ĩtatũ.

23Samũeli nĩwaneenie na mũui amwĩa atĩĩ, “Ete kĩla kĩlungu kya nyama ngũnengie na nakwĩa ũkie vandũ ũtee.”

24Mũui nĩwaetie nyama ĩsu ya kũũ yanyuvĩtwe, vamwe na syĩndũ ila syaĩ vamwe nayo na amia mbee wa Saũlo. Samũeli nĩwaneenie asya, “Kĩĩ nĩkyo kĩlungu kĩla kĩĩiĩtwe kwondũ waku nĩ kana ũkĩye yu wĩ na andũ ala nĩthoketye.” Kwoou Saũlo nĩwaĩsanĩie na Samũeli mũthenyanĩ ũsu.

25Yĩla matheeie kuma vala vandũnĩ va kũthaithĩa mathi ndũanĩ, Saũlo nĩwalanĩlw'e vandũ va kũkoma ĩũlũ wa kĩala kya nyũmba ya Samũeli, na akoma vo.

26Kĩoko tene mũno, Samũeli nĩweetie Saũlo e kĩalanĩ amwĩa atĩĩ, “Ũkĩla nĩ kana tũtaanĩsye.” Saũlo nĩwaamũkie na maendany'a na Samũeli mesĩlĩte nzĩanĩ sya ndũa.

27Yĩla mavikie ndeenĩ sya ndũa, Samũeli nĩweeie Saũlo atĩĩ, “Tavya mũthũkũmi athi mbee waitũ.” Mũthũkũmi ũsu nĩwaendie na Samũeli aendeea kũneena ayasya, “Ĩkalanga vaa vanini, ngũtavye ũndũ Ngai ũkwasya.”

← Chapter 8 Jump to: Chapter 10 →