1 Samuel 5

Kamba (MBIVILIA ŨVOO MŨSEO)

← Chapter 4 Jump to: Chapter 6 →

1Ĩtina wa Avilisiti moosa Ĩsandũkũ ya Ũtianĩo, nĩmayĩkuie kuma Embenesa mayĩtwaa ndũanĩ yoo ya Asitoti.

2Nĩmayĩlikilye ĩkalũnĩ ya ngai yoo ĩla yĩtawa Ndakoni, na mayia ũtee wa mũvw'anano wa ngai ĩsu.

3Ũnĩ ũsu kwakya tene, andũ ma Asitoti nĩmeethĩie mũvw'anano wa ngai ĩsu ũvalũkĩte mbee wa Ĩsandũkũ ya Ũtianĩo ya Mwĩai Ngai, ũthyũ wayo ũsyaĩtye na nthĩ. Kwoou nĩmookĩlilye mũvw'anano ũsu na maũtũnga vala waaĩlĩte kwĩthĩwa.

4Ũnĩ ũsu kwakya nĩmeethĩie mũvw'anano wa ngai ĩsu ũvalũkile ĩngĩ mbee wa Ĩsandũkũ ya Ũtianĩo. Ĩvindanĩ yĩĩ, mũtwe na moko elĩ ma mũvw'anano ũsu nĩsyatilĩkĩte ikavalũka ũlikĩlonĩ wa Ĩkalũ. No mwĩĩ wayo watialĩte.

5Kĩu nĩkyo kĩtumaa athembi ma ngai ĩsu yĩtawa Ndakoni, na onthe ala malikaa ĩkalũnĩ ya yo kũu Asitoti makĩla ũlikĩlo ũsu, na vai ũmwe ũkinyaa vo kũvika ũmũnthĩ.

6Mwĩai Ngai nĩwakanisye andũ ma Asitoti mũno na atuma makwatwa nĩ w'ĩa. Nĩwamakanisye o vamwe na andũ ala matwĩe isionĩ ila syathyũlũlũkĩte ndũa ĩsu kwa kũmaetee mĩimũ.

7Yĩla andũ ma Asitoti moonie maũndũ ala meekĩka, nĩmaneenie masya atĩĩ, “Tũyaĩlĩte kũendeea kwĩkala na Ĩsandũkũ ya Ũtianĩo ya Ngai, nũndũ nũtũkanĩtye mũno vamwe na ngai yaitũ Ndakoni.”

8Kwoou nĩmatũmie andũ makete asumbĩ onthe ma Avilisiti me atano mombane vamwe, na mamakũlya atĩĩ, “Twĩĩkana ata na Ĩsandũkũ ya Ũtianĩo ya Ngai wa Ĩsilaeli?” Namo masũngĩa masya atĩĩ, “Ĩsandũkũ ya Ũtianĩo ya Ngai wa Ĩsilaeli yĩtwawe Ngathi.” Kwoou nĩmakuie Ĩsandũkũ yĩu mayĩtwaa Ngathi.

9Ĩndĩ mamina kũyĩtwaa Ngathi, Mwĩai Ngai nĩwakanisye andũ ma ndũa ĩsu na atuma matelema mũno. Nĩwamakanisye kwa kũmaetee mĩimũ ĩla yakwatie andũ onthe ma ndũa ĩsu; syana na andũ aima.

10Kwoou nĩmatwaie Ĩsandũkũ ya Ũtianĩo ya Mwĩai Ngai ndũanĩ ya Ekeloni. Yĩla Ĩsandũkũ yĩu yavikiw'e Ekeloni, andũ ma ndũa ĩsu nĩmauie mbu makyasya, “Nĩmaete Ĩsandũkũ ya Ũtianĩo ya Ngai ya Ĩsilaeli kũũ nĩ kana yĩtũmine ithyonthe!”

11Kwoou nĩmasyokie kwĩta asumbĩ ma Avilisiti onthe ĩngĩ na masya atĩĩ, “Tũngai Ĩsandũkũ ya Ũtianĩo ya Ngai wa Ĩsilaeli vala yaĩlĩte kwĩthĩwa, nĩ kana yĩikatũmine ithyĩ na mĩsyĩ yitũ.” Andũ ma ndũa ĩsu yonthe nĩmatelemete mũno nũndũ Ngai nĩwamakanĩtye kwa kũmaetee kĩkw'ũ.

12Andũ ala mataakw'a nĩmakwatiwe nĩ mĩimũ na meekaĩla ngai syoo imatethye.

← Chapter 4 Jump to: Chapter 6 →