1 Samuel 4

Kamba (MBIVILIA ŨVOO MŨSEO)

← Chapter 3 Jump to: Chapter 5 →

1Andũ onthe ma Ĩsilaeli nĩmavikĩiwe nĩ ndeto ila Samũeli waneenaa. Ĩvindanĩ yĩu, andũ ma Ĩsilaeli nĩmaendie kũkita na Avilisiti. Andũ ma Ĩsilaeli mambie maeema moo vandũ vetawa Embenesa, namo Avilisiti mamba maeema moo Aveki.

2Avilisiti nĩmambĩĩie kaũ, na ĩtina wa kaũ mũnene andũ ma Ĩsilaeli nĩmasindiwe. Avilisiti nĩmooaie asikalĩ ma Ĩsilaeli ta ngili inya vala mokitĩaa.

3Yĩla andũ ma Ĩsilaeli ala matialile masyokie vala mambĩte maeema, atongoi ma andũ ma Ĩsilaeli nĩmakũlilye atĩĩ, “Mwĩai Ngai aekie tũsindwe nĩ Avilisiti nĩkĩ? Nĩtũthi tũkaete Ĩsandũkũ ya Ũtianĩo ya Mwĩai Ngai kuma Silo, nĩ kana aendany'e naitũ na aitũtangĩĩa kuma kwa amaitha maitũ.

4Kwoou andũ ma Ĩsilaeli nĩmatũmanie Silo, na ala matũmĩtwe maete Ĩsandũkũ ya Ũtianĩo ya Mwĩai Ngai Mwene Ũtonyi W'onthe, ũla wĩkalaa kĩvĩlanĩ kya kĩ-ũsumbĩ ĩũlũ wa ila syũmbe syĩ nthwau syĩtawa akelũvi. Ana ma Eli me elĩ, Ovini na Vineasi nĩmookie vamwe na Ĩsandũkũ ya Ũtianĩo.”

5Yĩla Ĩsandũkũ ya Ũtianĩo yaetiwe vala asikalĩ mambĩte maeema, andũ ma Ĩsilaeli nĩmalonzanilye na wasya mũnene wa ũtanu nginya nthĩ yathingitha.

6Avilisiti meew'a wasya ũsu, nĩmakũlanilye atĩĩ, “Kĩneene kĩu kĩ maeemanĩ ma Aevelania nĩ kyakĩ.” Yĩla mamanyie kana Ĩsandũkũ ya Ũtianĩo ya Mwĩai Ngai nĩyĩetiwe vala Aevelania mambĩte maeema,

7nĩmakwatiwe nĩ w'ĩa na masya atĩĩ, “Ve ngai yooka maeemanĩ moo! Yu twĩ thĩnanĩ! Ũndũ wa mũthemba ta ũũ ndwaaĩkĩka ĩngĩ.

8Nũũ ũtonya kũtũtangĩĩa kuma ngainĩ isu syĩ ũtonyi. Isu nĩ ngai ila syooaĩie andũ ma Misili weũnĩ na mĩthemba yonthe ya mothĩny'o.

9Inyw'ĩ Avilisiti, ĩthĩwai na ũkũmbaũ, ũkitai ta aũme nĩ kana tũikatw'ĩke ngombo sya Aevelania, o tondũ mo methĩĩtwe me ngombo sitũ. Kwoou ĩndĩ ũkitai ta aũme!”

10Avilisiti nĩmokitie na masinda andũ ma Ĩsilaeli, kĩla ũmwe wa andũ ma Ĩsilaeli nĩwasembie akĩa aendete ĩeemanĩ kwake. Nĩvooaaniwe mũno; asikalĩ ma Ĩsilaeli ma kũthi na maũũ ngili mĩongo ĩtatũ nĩmooaiwe.

11Ĩsandũkũ ya Ũtianĩo ya Mwĩai Ngai nĩyoosiwe nĩ Avilisiti, na ana ma Eli, Ovini na Vineasi me elĩ nĩmooaiwe.

12Mũthenyanĩ o ũsu, mũndũ ũmwe wa mbaĩ ya Mbengyameni nĩwasembie kuma vala kaũ waĩ athi nginya Silo. Eekĩĩte ngũa ndembũkangu na akeyũmbanga kĩtoo mũtwe onany'e kana e na kyeva.

13Yĩla wavikie, eethĩie Eli ailyĩ kĩvĩlanĩ kyake e ũtee wa nzĩa eteelete, nũndũ nĩwathĩnĩkaa ngoonĩ nũndũ wa Ĩsandũkũ ya Ũtianĩo. Yĩla mũndũ ũsu walikile ndũanĩ na atavany'a maũndũ onthe ala meekĩkĩte, andũ onthe ma ndũa ĩsu nĩmalonzanilye maĩĩte.

14Eli nĩweewie kĩĩo kĩu na akũlya atĩĩ, “Kĩĩo kĩu kyonthe nĩ kyakĩ?” Mũndũ ũsu nĩwaendie mĩtũkĩ vala ve Eli akamũtavye ũvoo ũsu.

15Eli aĩ na ũkũũ wa myaka mĩongo kenda na nyanya na nĩwaekete kwona nthĩ.

16Mũndũ ũsu nĩwaneenie na Eli amwĩa atĩĩ, “Yu no ĩndĩ nauma kaũnĩ, nakĩa kuma kaũnĩ o ũmũnthĩ.” Nake Eli amũkũlya, “Mwana wakwa, kweekwa ata?”

17Mũndũ ũsu watũmĩtwe amũsũngĩa amwĩa atĩĩ, “Andũ ma Ĩsilaeli nĩmasemba makĩa Avilisiti, na aingĩ moo nĩmoaiwe! Ũu wĩ o vo, ana maku Ovini na Vineasi nĩmoaiwe na Ĩsandũkũ ya Ũtianĩo ya Mwĩai Ngai yooswa!”

18Mũndũ ũsu amina kũweta Ĩsandũkũ ya Ũtianĩo oou, Eli nĩwavalũkile na ngala kuma kĩvĩlanĩ kyake vau ũtee wa mũvĩa. Ngingo yake nĩyatũlĩkile na akw'a, nũndũ aĩ mũndũ mũkũũ na mũito. Ekalĩte e mũsili wa andũ ma Ĩsilaeli vandũ va myaka mĩongo ĩna.

19Ĩvindanĩ yĩu, mũka wa Vineasi mwana wa Eli aĩ mũito na akilĩlye kũsyaa. Yĩla weewie kana Ĩsandũkũ ya Ũtianĩo ya Mwĩai Ngai nĩyosiwe, na kana mũũme na ĩthe wa mũũme wake nĩmakwie, o kwa mĩtũkĩ nĩwambĩĩie kwaũnya na asyaa.

20Akilĩlye kũkw'a iveti ila syamwĩsikasya nĩsyamwĩie atĩĩ, “Ndũkakw'e ngoo! Nĩwasyaa kavĩsĩ.” Ĩndĩ mũka wa Vineasi ndaaĩthukĩĩsya, o na ndaaneena ũndũ.

21Nĩweetie kana kau Ĩkavotu ayasya, “Ũkumyo wa Ngai nĩwauma kwa andũ ma Ĩsilaeli.” Aisye ũu nũndũ Ĩsandũkũ ya Ũtianĩo ya Mwĩai Ngai nĩyoosetwe, na nũndũ mũũme na ĩthe wa mũũme maĩ akw'ũ.

22Aisye, “Ũkumyo nĩweeveta kwa andũ ma Ĩsilaeli, nũndũ Ĩsandũkũ ya Ũtianĩo ya Ngai nĩyosiwe.”

← Chapter 3 Jump to: Chapter 5 →