1 Samuel 20

Kamba (MBIVILIA ŨVOO MŨSEO)

← Chapter 19 Jump to: Chapter 21 →

1Ndeviti nĩwakĩie auma Naiothi ndũanĩ ya Lama na athi kũla kwĩ Yonathani amũkũlya atĩĩ, “Nyie nĩkĩte ata? Ũthũku wakwa nĩ mwaũ? Nĩvĩtĩsye ĩthe waku ata nĩ kana ethĩwe ayenda kũmbũaa?”

2Yonathani nĩwamũsũngĩie amwĩa atĩĩ, “Vaitonyeka! Ndwĩkw'a! Ĩthe wakwa ndekaa ũndũ atandavĩtye, wĩthĩwe wĩ ũndũ mũnene kana mũnini. Atonya ata kũmbitha ũndũ ũũ? Ũu ti w'o!”

3Ĩndĩ Ndeviti nĩweevĩtie ayasya atĩĩ, “Ĩthe waku nĩwĩsĩ nesa kana nũmbendete. Nũminĩte kũsũanĩa ngoonĩ yake, akasya, ‘Yonathani ndaĩlĩte kũmanya ũndũ ũũ, nũndũ amanya nũkwĩw'a woo mũno.’ Nĩngwĩvĩta ĩsyĩtwanĩ ya Mwĩai Ngai ũla wĩ thayũ na ĩsyĩtwanĩ yaku, kana kĩkw'ũ kyakwa kĩ vakuvĩ mũno!”

4Yonathani nĩweeie Ndeviti atĩĩ, “Nĩngwĩka ũndũ o na wĩva ũla ũkwenda nĩke kwondũ waku.”

5Kwoou Ndeviti nĩwamwĩie atĩĩ, “Ũnĩ kwĩ Mboka ya Kũtisa kwa Mwei, na naĩlĩte kũthi kũĩsanĩa na mũsumbĩ. Ĩndĩ eka nĩthi ngevithe isesinĩ nginya aũke wĩoo.

6Ĩthe waku amanya kana ndi vo, wĩmwĩa kana nĩngwĩtisye mwanya nĩsembe mũsyĩ Mbetheleemu, nũndũ nĩ ĩvinda ya andũ ma mũsyĩ witũ ya kumya nthembo ĩla yumaw'a kĩla mwaka.

7Ethĩwa ĩthe waku nũkũneena asye, ‘Nĩ ũndũ ũseo,’ manya kana nyie mũthũkũmi waku ndi mũisyonĩ. Ĩndĩ woona athata, ĩthĩwa wĩsĩ nesa kana nĩwĩyumĩtye vyũ ambĩke naĩ.

8Ngalĩkonĩ ĩla yaku, mbĩw'ĩe tei nyie mũthũkũmi waku, nũndũ nĩnaseũvya wĩw'ano naku mbee wa Mwĩai Ngai. Ethĩwa nĩ na ĩvĩtyo, we mwene mbũae. Ve vata mwaũ wa kũndwaa kũla kwĩ ĩthe waku ngoawe?”

9Yonathani nĩwasũngĩie asya atĩĩ, “Vaitonyeka! Kwa w'o kethĩwa nĩnĩneesĩ kana ĩthe wakwa nĩwĩyumĩtye vyũ akwĩke naĩ, wĩona nĩthĩwa ndaneekũtavya?”

10Nake Ndeviti amũkũlya, “Ngamanya ata ethĩwa ĩthe waku akakũsũngĩa athatĩte?”

11Yonathani nĩwasũngĩie Ndeviti amwĩa atĩĩ, “Nĩtũthi kĩsesinĩ.” Kwoou nĩmaendanisye kĩsesinĩ.

12Yonathani nĩwaneenie asya atĩĩ, “Mwĩai Ngai, Ngai wa Ĩsilaeli nĩethĩwe ngũsĩ yitũ. Ũnĩ kana aũke saa ta ii tũĩ, ngakũlya ĩthe wakwa. Ethĩwa ndakethĩwa na ũndũ naku ngoonĩ yake, ngatũmana ũtavw'e.

13Ĩndĩ ethĩwa eenda kũkwĩka naĩ, Mwĩai Ngai nĩambũae nalea ũkũtavya ũndũ ũsu, na ũkũtetheesya ũthi ũte mwĩke ũndũ. Mwĩai Ngai nĩethĩwe vamwe naku ũndũ waĩ vamwe na ĩthe wakwa!

14Ĩvindanĩ yonthe ya thayũ wakwa, mbonasye wendo ũtathelaa ta ũla wa Mwĩai Ngai, nĩ kana ndikoawe.

15O ta ũu ĩvindanĩ yonthe yĩla yũkĩte, wĩonasya andũ ma mũsyĩ wakwa wendo ũsu ũtathelaa o na ethĩwa Mwĩai Ngai nũminĩte kũaa amaitha maku onthe vyũ.”

16Kwoou Yonathani nĩwaseũvisye ũtianĩo na mũsyĩ wa Ndeviti ayasya atĩĩ, “Mwĩai Ngai nĩaĩvanĩsye amaitha ma Ndeviti.”

17Yonathani nĩwatumie Ndeviti amwatha kana akamwendaa, nũndũ Yonathani endete Ndeviti ũndũ weeyendete mwene.

18Nĩvo ĩndĩ Yonathani waneenie na Ndeviti amwĩa atĩĩ, “Ũnĩ nĩ mũthenya wa Mboka ya Kũtisa kwa Mwei. We ũkamanyĩka kana ndwĩvo nũndũ kĩvĩla kyaku kĩikethĩwa na mũndũ.

19Aũke ĩa mawĩoo, wĩtheea ũthi ũkevithe vala vandũ weevithie yĩla thĩna ũũ wambĩĩe na ũyĩvithany'a na ĩvia.

20Ngekya maangi atatũ vau ta ngũatha kĩndũ.

21Ĩtina wa ũu ngatũma kamwana na ndikea, ‘Enda ũkamanthe maangi.’ Weew'a neea kamwana kau, ‘Sisya maangi me ngalĩko ĩno yaku. Mose ũmaete vaa.’ Wĩũka nũndũ nĩngwĩvĩta ĩsyĩtwanĩ ya Mwĩai Ngai ũla wĩ thayũ kana ndũkethĩwa mũisyonĩ.

22Ĩndĩ weew'a neea kamwana kau ‘Kamwana sisya maangi me mbee waku,’ uma ũthi nũndũ Mwĩai Ngai eĩthĩwa ayenda ũthi kũasa.

23Ĩndĩ ĩũlũ wa maũndũ ala naneena nĩ naku, lilikana kana Mwĩai Ngai nĩwe ngũsĩ yaitũ ĩvindanĩ yonthe yĩla yũkĩte.”

24Kwoou Ndeviti nĩweevithie kĩsesinĩ. Yĩla ĩvinda ya Mboka ya Kũtisa kwa Mwei yavikie, Mũsumbĩ Saũlo nĩwekalile nthĩ aye.

25Ekalile o vala wekalaa vakuvĩ na ũkũta. Avineli ekalile vakuvĩ na Saũlo, nake Yonathani ekala ngalĩko ĩla ĩngĩ asyaanĩtye na Saũlo, ĩndĩ vala Ndeviti wekalaa vayaĩ mũndũ.

26Mũthenyanĩ ũsu, Saũlo ndaaneena ũndũ nũndũ asũanĩaa ayasya, “Nĩvatonyeka ũkethĩa ve ũndũ ũkwatie Ndeviti, na akwatwa nĩ ũvuku ũndũ ũtatonya kũka mbokanĩ.”

27Ĩndĩ mũthenyanĩ wa kelĩ, ĩtina wa Mboka ya Kũtisa kwa Mwei, vala Ndeviti wekalaa vaĩ o vathei. Nĩvo ĩndĩ Saũlo waneenie na Yonathani mwana wake amũkũlya atĩĩ, “Ndeviti aleile kũka mbokanĩ ĩyoo na ũmũnthĩ nĩkĩ?”

28Yonathani nĩwasũngĩie ĩthe amwĩa atĩĩ, “Ndeviti nũmbĩsũvie ambĩtya mwanya athi Mbetheleemu.

29Aneenie nakwa ambĩa atĩĩ, ‘Nĩngũkwĩsũva, eka nĩthi nũndũ mũsyĩ witũ wĩtanĩa mboka ya kumya nthembo kũu ndũanĩ, na mwana-na-a ia ambĩaĩie ambĩa nĩnĩthĩwe vo. Kwoou ĩndĩ ethĩwa nĩnonete ũseo methonĩ maku, eka nĩthi ngonane na andũ ma mũsyĩ witũ.’ Kĩu nĩkyo kĩtumĩte Ndeviti ethĩwa ate vala wĩkalaa mesanĩ ya mũsumbĩ.”

30Saũlo nĩwathatiw'e mũno nĩ Yonathani na amwĩa atĩĩ, “We mwana wa mũndũ mũka mũng'endu na ũte mũĩkĩĩku! Yu nĩnĩsĩ kana we wĩ ngalĩkonĩ ĩla ya Ndeviti, na nũkwĩyĩkĩĩthya nthoni we mwene o vamwe na inyia waku!

31We no ũkũmanya kana ĩvindanĩ yonthe yĩla Ndeviti wĩendeea kwĩthĩwa e thayũ, ndũkesa kũtw'ĩka mũsumbĩ wa nthĩ ĩno? Yu tũmana Ndeviti aetwe vaa nĩĩ nũndũ no nginya akw'e!”

32Yonathani nĩwakũlilye ĩthe atĩĩ, “Ndeviti eũawa nĩkĩ? Ekĩte ata?”

33Nũndũ wa ndeto isu, Saũlo nĩwekisye ĩtumo yake atonye Yonathani amũae, na Yonathani amanya kwa w'o kana ĩthe wake nũvangĩte kũaa Ndeviti.

34Yonathani nĩwookĩlile auma vau mesanĩ ew'ĩte woo mũno, na alea kũya kĩndũ o na kĩmwe mũthenyanĩ ũsu wa kelĩ wa kũtanĩa Mboka ya Kũtisa kwa Mwei. Aĩ na kyeva mũno nũndũ wa Ndeviti, nĩkwĩthĩwa ĩthe wake nĩweekĩte Ndeviti maũndũ me nthoni.

35Kwakya mũthenya ũla waatĩĩe, Yonathani nĩwaendie isesinĩ nĩ kana akakomane na Ndeviti o tondũ matianĩĩte. Aendanisye na kamwana kanini

36na akea atĩĩ, “Enda ũsembete ũkamanthe maangi ala ngwĩkya.” Kamwana kau kaendee na kũsemba, Yonathani nĩwekisye ĩangi mbee wako.

37Yĩla kamwana kau kavikie vala ĩangi ya Yonathani yavalũkĩte, Yonathani nĩwaketie na akea atĩĩ, “Ĩangi yĩ mbee waku.”

38Nĩvo ĩndĩ Yonathani waketie na wasya mũnene akea atĩĩ, “Ĩkalaate! Enda mĩtũkĩ! Ndũkatate kũũngama!” Kamwana kau nĩkoosie ĩangi na kasyoka vala ve mũnene wako.

39Kamwana kau kayeesĩ ũndũ ĩũlũ wa maũndũ asu meekĩkaa; Ndeviti na Yonathani nomo meesĩ.

40Yonathani nĩwanengie kamwana kau mĩio ĩsu ya kaũ na akea atĩĩ, “Enda ũkuĩte syĩndũ isu ũitwae ndũanĩ.”

41Kamwana kau kamina kũthi, Ndeviti nĩwookĩlile kuma vala weevithanĩtye na ĩvia, atulya ndu, na akumana atina nthĩ na ũthyũ mavinda atatũ. Ndeviti na Yonathani nĩmakethanisye na ngethi ya wendo maĩĩte. Kyeva kya Ndeviti kyaĩ kĩnene mbee wa kya Yonathani.

42Nĩvo ĩndĩ Yonathani weeie Ndeviti atĩĩ, “Enda na mũuo nũndũ nĩtwĩvĩtĩte ĩsyĩtwanĩ ya Mwĩai Ngai kũendeea kwĩthĩwa twĩ ndũũ na tũkasya, ‘Mwĩai Ngai nĩwe ngũsĩ katĩ wakwa naku, na katĩ wa nzyawa syakwa na nzyawa syaku.’ ” Ndeviti nĩwaendie, nake Yonathani asyoka ndũanĩ.

← Chapter 19 Jump to: Chapter 21 →