1 Samuel 6

Kamba (MBIVILIA ŨVOO MŨSEO)

← Chapter 5 Jump to: Chapter 7 →

1Ĩsandũkũ ya Ũtianĩo ya Mwĩai Ngai yekalile nthĩ ya Avilisiti vandũ va myei mũonza.

2Nĩvo ĩndĩ Avilisiti meetie athembi na andũ ala maaũasya na mamakũlya atĩĩ, “Twĩĩkana ata na Ĩsandũkũ ya Ũtianĩo ya Mwĩai Ngai? Tũtavyei twĩyĩtũnganĩsya na kyaũ vala yaĩlĩte kwĩthĩwa?”

3Namo mamasũngĩa mamea atĩĩ, “Ethĩwa nĩmũũtũnga Ĩsandũkũ ya Ũtianĩo ya Ngai wa andũ ma Ĩsilaeli, mũyaĩlĩte kũyĩtũnga yĩ ĩthei. Ĩndĩ no nginya mũyĩtũnganĩsye na nthembo kwondũ wa mavĩtyo. Mweeka ũu nĩmũũvow'a na mũimanya kĩla kĩtumĩte Mwĩai Ngai ethĩwa aimũkany'a.”

4Avilisiti nĩmakũlilye, “Twĩmũtwaĩa nthembo ya mũthemba mwaũ kwondũ wa ĩvĩtyo?” Namo masũngĩa masya, “Syĩndũ itano iseũvĩtw'e na thaavu iilyĩ mĩimũ na mbĩa itano sya thaavu ĩmwe kwondũ wa kĩla mũsumbĩ wa Avilisiti, nũndũ ũthĩny'o ũla wamũkwatie now'o wakwatie anene menyu.

5No nginya mũseũvye mĩimũ ĩsu ya thaavu na mbĩa isu sya thaavu; syĩndũ isu nĩsyo ikũthĩny'a nthĩ yenyu, na no nginya mũnenge Ngai wa Ĩsilaeli Ndaĩa. Nĩvatonyeka akaeka kũmũkany'a inyw'ĩ, ngai syenyu, o vamwe na nthĩ yenyu.

6Mũtonya ata kũmya ngoo syenyu o tondũ andũ ma nthĩ ya Misili na mũsumbĩ woo meekie? Lilikanai ũndũ Ngai weekie maũndũ oonany'a ũtumanu woo, na maeka andũ ma Ĩsilaeli mauma nthĩ ya Misili.

7Yu ĩndĩ, osai ĩkasya yeũ, na ng'ombe ilĩ ikwongya na itaailĩĩlwa ĩsoki ĩngĩ, na mũisyova ĩkasyanĩ yĩu na kwĩnũkya tũsaũ twasyo tume vala iĩ.

8Osai Ĩsandũkũ ya Ũtianĩo ya Mwĩai Ngai mũyilĩĩle ĩkasyanĩ yĩu na mũyĩkĩa ĩsandũkũnĩ yĩngĩ yĩla yĩ ũtee wayo ila syĩndũ sya thaavu mũũtũnganĩsya na Ĩsandũkũ ya Ũtianĩo syĩthĩwe nthembo yake kwondũ wa ĩvĩtyo. Ekanai na ĩkasya yĩu yĩkũsye na yĩithi yĩ yoka.

9Yĩsyaĩĩsyei yĩendete; ethĩwa ĩkasya yĩu yĩambata yĩelete ndũanĩ ya Mbethi-semesi, twĩmanya kana Ngai wa andũ ma Ĩsilaeli nĩwe ũetete ũthĩny'o ũũ mũthũku kũla tũĩ. Yalea kwĩka ũu, nĩvo ĩndĩ tũũmanya kana ti we ũtũeteete ũthũku ũsu, ĩndĩ no ũndũ ũtũkwatĩte.”

10Andũ nĩmeekie ũndũ meeiwe; nĩmoosie ng'ombe ilĩ ikwongya, masyova ĩkasyanĩ na mavingĩa tũsaũ twasyo itũũnĩ mũsyĩ.

11Nĩmailĩĩile Ĩsandũkũ ya Ũtianĩo ĩkasyanĩ yĩu, na o ta ũu mailĩĩla ĩsandũkũ yĩla yeekĩĩtwe ila mbĩa sya thaavu na ĩla mĩimũ ya thaavu ĩkasyanĩ yĩu.

12Ng'ombe isu nĩsyambĩĩie kũkusya ĩkasya syambata syelekele Mbethi-semesi. Syaendete syanĩtye na itekwathũka ũtee wa nzĩa. Ala asumbĩ atano ma Avilisiti maiatĩĩie mathi kũvika mũvakanĩ wa Mbethi-semesi.

13Andũ ma Mbethi-semesi nĩmakethaa nganũ vandũ mwandanĩ. Yĩla masyaisye ĩũlũ nĩmoonie Ĩsandũkũ ya Ũtianĩo na matana mũno.

14Ĩkasya yĩu yookie mũũndanĩ wa mũndũ watwĩe Mbethi-semesi weetawa Yosua, na yaũngama vakuvĩ na ĩvia ĩnene. Andũ nĩmatemangie mbwaũ ila syaseũvĩtye ĩkasya yĩu, na mooaa ng'ombe ila syayĩkusĩtye na masyumya syĩthĩwe nthembo ya kũvĩvw'a kwondũ wa Mwĩai Ngai.

15Alivai nĩmaumisye Ĩsandũkũ ya Ũtianĩo, vamwe na ĩsandũkũ yĩla yĩngĩ yeekĩĩtwe ila syĩndũ syaseũvĩtw'e na thaavu, na mailĩĩla masandũkũ asu yĩla ĩvianĩ ĩnene. Mũthenyanĩ ũsu, andũ ma Mbethi-semesi nĩmaumisye nthembo sya kũvĩvw'a na mathemba nthembo ingĩ kwondũ wa Mwĩai Ngai.

16Ala asumbĩ atano ma Avilisiti nĩmamasyaĩĩsye mayĩka ũu na ĩndĩ masyoka Ekeloni mũthenyanĩ o ũsu.

17Avilisiti manengie Mwĩai Ngai ĩla mĩimũ ĩtano yaseũvĩtw'e na thaavu yĩthĩwe nthembo kwondũ wa ĩvĩtyo; mũimũ ũmwe kwondũ wa kĩla ndũa. Ndũa isu syaĩ Asitoti, Ngasa, Asikeloni, Ngathi na Ekeloni.

18O ta ũu nĩmanenganie mbĩa itano sya thaavu; ĩmwe kwondũ wa kĩla ndũa. Isu nĩ ila ndũa mbiĩĩe o vamwe na motũi ala maithyũlũlũkĩte, ila syatongoew'e nĩ ala asumbĩ atano ma Avilisiti. Ĩvia ĩnene yĩla yaĩ mũũndanĩ kwa Yosua ũla watwĩe Mbethi-semesi, vala mailĩĩle Ĩsandũkũ ya Ũtianĩo ya Mwĩai Ngai, yĩ o vo o na ũmũnthĩ ta ũkũsĩ wa maũndũ ala meekĩkie.

19Mwĩai Ngai nĩwooaie andũ mĩongo mũonza kuma Mbethi-semesi nũndũ nĩmasyaisye Ĩsandũkũ ya Ũtianĩo nthĩnĩ. Andũ nĩmaĩie mũno nũndũ Mwĩai Ngai nĩwooaie andũ moo maingĩvĩte ũu.

20Nĩvo ĩndĩ andũ ma Mbethi-semesi maneenie masya atĩĩ, “Nũũ ũla ũtonya kũũngama mbee wa Mwĩai Ngai, Ngai ũũ mũtheu? Tũtonya kũmũtwaa va nĩ kana ethĩwe vaasa naitũ?”

21Nĩmatũmie andũ mathi kũla kwĩ andũ ma ndũa ya Kiliathi-yealimu makamee atĩĩ, “Avilisiti nĩmatũngie Ĩsandũkũ ya Ũtianĩo ya Mwĩai Ngai. Theeai mũke mũyose.”

← Chapter 5 Jump to: Chapter 7 →