1 Samuel 14 — Kamba (MBIVILIA ŨVOO MŨSEO)

1Mũthenya ũmwe Yonathani mwana wa Saũlo nĩwaneenie na mwanake ũla wamũkuĩaa mĩio yake ya kaũ amwĩa atĩĩ, “Ũka tũinganĩsye tũthi vala asikalĩ ma kaũ ma Avilisiti mambĩte maeema.” Ĩndĩ Yonathani ndaatavya Saũlo ĩthe wake.

2Saũlo ekalaa ũtee wa ndũa ya Ngivea ungu wa mũtĩ wa mũkũngũmanga ũla waĩ Mikiloni. Aĩ na nguthu ya asikalĩ ya andũ ta maana thanthatũ,

3ala maĩ vamwe na Aiya ũla weekĩĩte ngũa ya ĩũlũ yĩtawa evoti. Aiya aĩ mwana wa Aituvu. Aituvu aĩ mwana-a-inyia wa Ĩkavotu mwana wa Vineasi, na mwĩsũkũũe wa Eli, mũthembi wa Mwĩai Ngai ũla waĩ Silo. Vai mũndũ weesĩ kana Yonathani nũendie.

4Nzĩanĩ ĩla ĩendete Mikimasi, vala Yonathani wendaa kũingĩla nĩ kana athi vala asikalĩ ma Avilisiti mambĩte maeema, vaĩ na mokũta elĩ matũlu ma mavia; ũmwe ngalĩko ĩmwe na ũngĩ ngalĩko ĩla ĩngĩ. Ũvai ũmwe weetawa Mbosesi na ũla ũngĩ Sene.

5Ũmwe waĩ ngalĩko ya ĩũlũ ya nzĩa ĩsu na ũkelekela Mikimasi, na ũla ũngĩ waĩ ngalĩko ya ĩtheo na ũkelekela Ngeva.

6Yonathani nĩwaneenie na ũla mwanake wamũkuĩe mĩio ya kaũ amwĩa atĩĩ, “Ũka tũinganĩsye tũthi vala andũ asu matamwĩsĩ Ngai mambĩte maeema moo. Nĩvatonyeka Mwĩai Ngai akatũtetheesya. Vai kĩndũ kĩsiĩĩa Mwĩai Ngai kũtangĩĩa andũ, o na ethĩwa twĩ aingĩ kana twĩ anini.”

7Mwanake ũsu nĩweeie Yonathani atĩĩ, “Ĩka ũndũ w'onthe ũla ũkwenda kwĩka, nyie nĩ vamwe naku.”

8Nake Yonathani amwĩa atĩĩ, “Ũka ĩndĩ tũinganĩsye tũelete vala ve andũ asu nĩ kana matwone.

9Ethĩwa nĩmeũneena naitũ matwĩe, ‘Eteelai vau nginya tũke vau mũĩ,’ nĩtũkwĩkala vala tũĩ na tũyĩambata vala maĩ.

10Ĩndĩ matwĩa, ‘Ũkai vaa tũĩ,’ nĩtũkwambata nũndũ ũsu nĩw'o ũkwĩthĩwa wonany'o kwitũ kana Mwĩai Ngai nũtũnengete ũtonyi wa kũmasinda.”

11Kwoou Yonathani e na mwanake ũsu nĩmeeyonanisye vala asikalĩ ma Avilisiti mambĩte maeema moo. Avilisiti nĩmaneenie masya atĩĩ, “Kwa sisyai! Aevelania nĩmekumĩla kuma maimanĩ kũla meeĩvithĩte.”

12Asikalĩ ala maĩ vau vambĩtwe maeema nĩmaneenie na wasya mũnene meea Yonathani na mwanake ũsu atĩĩ, “Ambatai mũke vaa tũĩ tũmwony'e kĩndũ.” Yonathani nĩweeie mwanake ũsu wamũkuĩe mĩio ya kaũ atĩĩ, “Ngatĩĩe twambate, Mwĩai Ngai nĩwanenga andũ ma Ĩsilaeli ũtonyi wa kũsinda Avilisiti.”

13Yonathani nĩwambatie na moko na maũũ na ũla mwanake amũatĩĩa. Yonathani nĩwavalũkasya Avilisiti, nake mwanake ũsu wamũkuĩe mĩio amũatĩĩaa amakũnĩte na kũmoaa.

14Ĩvindanĩ yĩu ya mbee ya kũvithũkĩa Avilisiti, Yonathani na mwanake ũsu mooaie andũ ta mĩongo ĩlĩ kĩsionĩ kya nthĩ kĩna ũasa wa matambya mĩongo ĩtatũ na atano na ũthanthau wĩana o ũu.

15Avilisiti onthe ala maĩ nthĩ ĩsu nĩmatelemile. Asikalĩ ma kau ala maĩ vala maeema mambĩtwe, vamwe na andũ ala maĩ mĩsyĩ kwoo nĩmatelemile. Asikalĩ onthe ala mavithũkĩaa na kwananga syĩndũ nĩmakwatiwe nĩ w'ĩa. Nthĩ yonthe yaĩ na kĩtetemo, na kweethĩwa na kũtelema kũnene.

16Asyaĩĩsya ma Saũlo ala maĩ Ngivea kĩsionĩ kya nthĩ ya Mbengyameni nĩmoonie Avilisiti masembete me avũavũanu.

17Nĩvo ĩndĩ Saũlo waneenie na andũ ala waĩ namo amea atĩĩ, “Ĩtanai masyĩtwa mũmanye asikalĩ ala matevo.” Mamina kwĩtana masyĩtwa, nĩmeethĩie kana Yonathani na mwanake ũla wamũkuĩaa mĩio ya kaũ mayaĩ vo.

18Saũlo nĩwaneenie na Aiya amwĩa atĩĩ, “Ete Ĩsandũkũ ya Ũtianĩo ya Mwĩai Ngai vaa.” (Ĩvindanĩ yĩu Ĩsandũkũ ya Ũtianĩo yekalaa na andũ ma Ĩsilaeli.)

19Saũlo aendee kũneena na mũthembi ũsu, asikalĩ ala maĩ maeemanĩ ma Avilisiti nĩmaendeeie kũvũavũana, na kwoou Saũlo eea mũthembi ũsu, “Ekana na Ĩsandũkũ ya Ũtianĩo.”

20Saũlo na andũ make nĩmoombanie mathi kũkita na Avilisiti. Nĩmeethĩie Avilisiti me avũavũanu vyũ maendee na kũtemangana ene kwa ene na mbyũ.

21Aevelania ala vau mbeenĩ maĩ maneekwatany'a na Avilisiti, na mambatĩte makaendany'a namo vala mambĩte maeema, nĩmasyokie ngalĩkonĩ ĩla ya andũ ma Ĩsilaeli ala maĩ na Saũlo na Yonathani.

22Yĩla andũ onthe ma Ĩsilaeli ala meevithĩte nthĩ yĩ iĩma ya Evalaimu meewie kana Avilisiti nĩmasembete makĩĩte, o namo nĩmalikile kaũnĩ meyumĩtye.

23Kwoou mũthenyanĩ ũsu Mwĩai Ngai nĩwatangĩĩie andũ ma Ĩsilaeli. Nĩmaendie mokitĩte na Avilisiti nginya mavĩtũka vandũ vetawa Mbethi-aveni.

24Mũthenyanĩ ũsu andũ ma Ĩsilaeli nĩmonzethetw'e nĩ nzaa nũndũ Saũlo aĩ anameavĩthya akasya, “Nĩmũumanĩe mũndũ ũla ũkũya lĩu wĩoo ũtanavika, ndanamba kwĩyĩĩvanĩsya kwa amaitha makwa.” Kwa kĩtumi kĩu vai mũndũ o na ũmwe waaya kĩndũ mũthenya mũima.

25Asikalĩ onthe nĩmalikile vandũ vaĩ mũtitũ na meethĩa ũkĩ wa nzũkĩ kũu nthĩ.

26Yĩla malikile mũtitũnĩ ũsu nĩmoonie ũkĩ wa nzũkĩ ũivolotanga ĩndĩ vai ũmwe waaũkiita aũye nũndũ nĩmakĩaa kĩumo kya Saũlo.

27Ĩndĩ Yonathani ndeew'ĩte ĩthe wake aimaavĩthya andũ, kwoou nĩwatambũũkisye ndata ĩla wakwete na atonya ĩwa na mũthya wa ndata ĩsu, na aya ũkĩ ũmwe wa nzũkĩ. Vau kwa vau nĩwakwatie kavaa.

28Ũmwe wa andũ ala maĩ vau nĩwaneenie asya atĩĩ, “Ĩthe waku nũtwĩavĩthisye ithyonthe yĩla waisye, ‘Nĩmũumanĩe mũndũ ũla ũkũya lĩu ũmũnthĩ.’ Kĩu nĩkyo kĩtumi andũ mekwoneka me aleelu.”

29Yonathani nĩwasũngĩie asya atĩĩ, “Ĩthe wakwa nũetee andũ maitũ thĩna. Sisyai ũndũ nakwata kavaa yĩla nasama kalũkĩ ka nzũkĩ.

30Wĩthĩwa wĩĩ ũseo mũno kethĩwa andũ ũmũnthĩ nĩmaĩe imwe sya syĩndũ ila mavenanie kaũnĩ kuma kwa amaitha moo; Avilisiti aingĩ mbeange methĩwa moaiwe!”

31Ĩtina wa kũaa Avilisiti kuma Mikimasi kũthi kũvika Aiyaloni, andũ ma Ĩsilaeli nĩmaleelile mũno.

32Kwoou nĩmasembie mose syĩndũ ila mavenete amaitha moo. Nĩmoosie malondu, ng'ombe, na tũsaũ masyũaĩa vau na maya nyama syasyo syĩ na nthakame.

33Saũlo nĩwataviw'e eewa atĩĩ, “Andũ nĩmeũvĩtĩsya Ngai kwa kũya nyama syĩ na nthakame.” Saũlo nĩweeie andũ atĩĩ, “Nĩmũekie kwĩthĩwa mwĩ aĩkĩĩku. Vingilityai ĩvia ĩnene yũke vaa nĩĩ oyu.”

34Nĩwasyokie amea, “Endai kũla kwĩ andũ onthe na mũimea nĩmaete malondu na ng'ombe syoo syonthe vaa. Nĩmekũsyũaa na kũiĩĩa vaa; mayaĩlĩte kũvĩtĩsya Mwĩai Ngai kwa kũya nyama syĩ na nthakame.” Kwoou ũtukũ ũsu andũ onthe nĩmaetie ng'ombe syoo na masyũaĩa vau.

35Saũlo nĩwaakĩie Mwĩai Ngai kĩthembeo vau. Nĩkyo kyaĩ kyake kya mbee kwaka.

36Saũlo nĩweeie asikalĩ make atĩĩ, “Nĩtũthee na ũtukũ tũatĩĩe Avilisiti, na tũimavena syĩndũ syoo nginya kwakya na tũimoaa onthe vyũ.” Nĩmamũsũngĩie mamwĩa, “Ĩka ũndũ ũkwona waĩlĩte.” Ĩndĩ mũthembi aneena asya, “Mbee nĩtwambe kũmũkũlya Ngai.”

37Kwoou Saũlo nĩwaneenie na Ngai amũkũlya atĩĩ, “Nĩngũtheea nĩatĩĩe Avilisiti? Nũũtuma andũ ma Ĩsilaeli mamasinda?” Ĩndĩ Ngai ndaamũsũngĩa mũthenyanĩ ũsu.

38Saũlo nĩwaneenie asya, “Atongoi onthe ma andũ ũkai vaa, nĩ kana tũmanye nĩ naĩ myaũ ĩla yĩkiwe ũmũnthĩ.

39Nĩngwĩvĩta ĩsyĩtwanĩ ya Mwĩai Ngai ũla wĩ thayũ na ũla wovoasya andũ ma Ĩsilaeli kana, o na ethĩwa naĩ ĩsu yĩkĩtwe nĩ mwana wakwa Yonathani, kwa w'o no nginya oawe!” Ĩndĩ vai mũndũ waaneena ũndũ.

40Nĩvo ĩndĩ Saũlo wameie, “Inyw'onthe ũngamai vaya, nakwa nĩ na Yonathani nĩtũkũũngama vaa.” Namo andũ mamwĩa, “Ĩka ũndũ ũkwona waĩlĩte.”

41Saũlo nĩwavoyie ayasya, “Ame Mwĩai Ngai, Ngai wa andũ ma Ĩsilaeli, ũleile kũsũngĩa mũthũkũmi waku ũmũnthĩ nĩkĩ? Ethĩwa ĩvĩtyo yĩĩ nĩ yakwa kana nĩ ya mwana wakwa Yonathani, Ame Mwĩai Ngai, Ngai wa andũ ma Ĩsilaeli sũngĩa ũitũmĩa Ulimu, ĩndĩ ethĩwa ĩvĩtyo yĩĩ nĩ ya andũ maku ma Ĩsilaeli sũngĩa ũitũmĩa Thumimu.” Ũsũngĩo ũla wanenganiwe woonanisye Yonathani na Saũlo nĩmo mena ĩvĩtyo, na kwoou andũ mavonoka.

42Nĩvo ĩndĩ Saũlo waneenie asya, “Kũnai kula mũnyuve katĩ wakwa na mwana wakwa.” Makũna kula, Yonathani nĩwe wanyuviwe. Nĩvo ĩndĩ Saũlo wakũlilye Yonathani atĩĩ, “Wĩkĩte ata?”

43Yonathani asũngĩa asya atĩĩ, “Nĩnĩsamie kalũkĩ kanini ka nzũkĩ na mũthya wa ndata yakwa. Kaũndũ kau nĩkatuma nũawa?”

44Saũlo nĩweeie Yonathani atĩĩ, “Ngai nĩambũae ethĩwa we ndwĩũawa!”

45Andũ nĩmakũlilye Saũlo atĩĩ, “Yonathani, ũla ũetie ũsindi ũũ mũnene kwa andũ ma Ĩsilaeli nũkũawa? Aiee. Nĩtũkwĩvĩta ĩsyĩtwanĩ ya Mwĩai Ngai ũla wĩ thayũ, kana o na ũsw'ĩĩ wa mũtwe wa Yonathani ndwĩkiitwa. Ũndũ ũla wĩkie ũmũnthĩ ekie atetheew'e nĩ Ngai.” Kwoou andũ nĩmatangĩĩie Yonathani alea kũawa.

46Ĩtina wa ũu Saũlo nĩwaekie kũatĩĩa Avilisiti, namo masyoka kĩsionĩ kya nthĩ yoo.

47Saũlo amina kũtw'ĩka mũsumbĩ wa Ĩsilaeli, nĩwokitie amaitha moo onthe kĩla vandũ: Amoavi, Aamimoni, Etomu, asumbĩ ma Nzova, na Avilisiti. Kĩla vandũ waendaa kũkita nĩwasindaa.

48Okitie na ũkũmbaũ na asinda o na Aamaleki. Nĩwatangĩĩie andũ ma Ĩsilaeli kuma andũnĩ onthe ala mamavithũkĩaa.

49Ana ma Saũlo maĩ Yonathani, Isivi na Malikisuua. Masyĩtwa ma eĩtu make nĩmo aa: Ũla mũkũũ eetawa Melavu na ũla wa kelĩ eetawa Mikali.

50Mũka wa Saũlo eetawa Ainoamu na aĩ mwĩĩtu wa Aimaasi. Mũnene wa asikalĩ ma kaũ ma Saũlo eetawa Avineli mwana wa Neli. Neli aĩ mwendw'a-ĩthe wa Saũlo.

51Kisi ĩthe wa Saũlo na Neli ĩthe wa Avineli nĩmasyaanĩw'e, na maĩ ana ma Avieli.

52Ĩvindanĩ yonthe yĩla Saũlo waĩ thayũ kweethĩawa na kaũ mũnene mũno na Avilisiti. Kwoou Saũlo oona mũndũ o na wĩva wĩ vinya na ngũmbaũ, nĩwamwosaa ethĩwe ũmwe wa asikalĩ make.