2 Samuel 10

Luganda (BIBU1) (BIBULIYA ENTUKUVU)

← Chapter 9 Jump to: Chapter 11 →

1Oluvannyuma, kabaka w'Abammoni n'afa; Kanuni mutabani we n'amusikira ku bwakabaka.

2Dawudi n'agamba nti: “Nzija kugirira ekisa Kanuni mutabani wa Nakasi nga kitaawe bwe yangirira ekisa.” Awo Dawudi n'atumayo abaweereza be bamutuusize okukubagiza olw'okufiirwa kitaawe. Naye abaweereza ba Dawudi bwe bajja mu nsi y'Abammoni,

3abakungu b'Abammoni ne bagamba Kanuni mukama waabwe nti: “Olowooza Dawudi akutumidde ab'okukukubagiza lwa kussaamu kitaawo kitiibwa, nandiki Dawudi abaweereza be abasindise gy'oli bekkaanye ekibuga, bakikette ate bakizikirize?”

4Kanuni n'addira abaweereza ba Dawudi, buli omu n'amumwako ekitundu ky'ekirevu, n'engoye zaabwe n'azisalirako awo mu makkati ku butuuliro, n'abagoba bagende.

5Dawudi bwe baakimubuulira, n'asindika ab'okubasisinkana; anti baali batoowaziddwa nnyo. Dawudi n'abalagira nti: “Musigale mu Yeriko, okutuusa ebirevu byammwe nga bimeze, awo mulyoke mukomeewo.”

6Abammoni bwe baalaba nga bekyayisizza ewa Dawudi, ne bapangisa abatabaazi ab'ebigere Abaaramu: mu Beti-Rekobu ne Zoba baggyayo emitwalo ebiri, ewa kabaka Maaka baggyayo abasajja lukumi, ne mu basajja b'e Tovu omutwalo gumu mu enkumi bbiri.

7Dawudi bwe yakiwulira, n'asindika Yowabu n'eggye lyonna ery'abasajja ab'amaanyi.

8Abammoni ne bavaayo, ne batala okulwana ku muzigo gw'omulyango gw'ekibuga kyabwe. Bo Abaaramu abaava e Zoba, Rekobu, Tovu ne Maaka baasigala ku ttale bokka.

9Yowabu bwe yalaba nga beetegese okumulwanyisa nga bafuluma mu maaso n'emabega, n'alonda mu bonna abatabaazi abalondobe mu Yisirayeli, n'abategeka okulumba Abaaramu;

10ekitundu ky'abantu ekyasigalawo n'akiwa Abisayi muganda we n'abategeka okulumba Abammoni.

11Yowabu n'agamba nti: “Abaaramu bwe banansinza amaanyi, ononziruukirira; n'Abammoni bwe banaakusinza amaanyi, ddala nzija kukudduukirira.

12Beera muzira; tulwane na buzira okutaasa abantu baffe n'ebibuga bya Katonda waffe; Omukama anaakola ekisaanye mu maaso ge.”

13Yowabu n'eggye lye yali nalyo ne balumba okulwana n'Abaaramu, Abaaramu ne babadduka.

14Abammoni bwe baalaba ng'Abaaramu badduse, nabo ne badduka Abisayi, ne bayingira mu kibuga. Awo Yowabu n'aleka Abammoni, n'akomawo e Yeruzaalemu.

15Abaaramu bwe baalaba nga bakubiddwa Yisirayeli, ne beekuŋŋaanya.

16Adadeezeri n'atuma, n'aggyayo Abaaramu okuva emitala w'omugga, ne bagenda e Kelamu; Sobaki omuduumizi w'eggye lya Adadeezeri ng'abakulembedde.

17Bwe baakibuulira Dawudi, n'akuŋŋaanya Yisirayeli yenna n'asomoka Yorudani, n'ajja e Kelamu; Abaaramu ne bataza eggye okusisinkana Dawudi; ne bamulwanyisa.

18Naye Abaaramu ne badduka Abayisirayeli. Dawudi n'atta mu Baaramu abatabaazi b'oku bigaali lusanvu, n'abatabaazi baabwe ab'ebigere emitwalo ena. Yakuba Sobaki omuduumizi w'eggye lyabwe, n'afiira eyo.

19Bakabaka bonna abaali abaweereza ba Adadeezeri bwe baalaba nga bakubiddwa Yisirayeli, ne bateeseganya n'Abayisirayeli, ne bafuuka baweereza baabwe. Abaaramu ne batya okuddayo okuyamba Abammoni.

← Chapter 9 Jump to: Chapter 11 →