2 Samuel 22

Luganda (BIBU1) (BIBULIYA ENTUKUVU)

← Chapter 21 Jump to: Chapter 23 →

1Dawudi yayimbira Omukama oluyimba luno ku lunaku Omukama lwe yamuwonya mu mikono gy'abalabe be bonna ne mu ngalo za Sawulo,

2n'agamba nti: “Omukama lwe lwazi lwange, ekigo kyange, omulokozi wange;

3Katonda wange lwe lwazi lwange, mwe nzirukira; engabo yange, amaanyi g'obulokofu bwange, bbugwe wange, obuddukiro bwange; omulokozi wange, omponya mu bubenje.

4Nkoowoola Omukama asaanye okutendebwa, mponyezeddwa abalabe bange.

5“Amayengo g'okufa ganneebungulula, engezi z'ababi zambikka;

6emiguwa gy'emagombe gyanneezingirira, emitego gy'okufa gyali ginnindiridde.

7Mu nnaku yange nakoowoola Omukama, ne mpanjagira Katonda wange. Yayima mu Kiggwa kye n'awulira eddoboozi lyange; okuwanjaga kwange ne kutuuka ku matu ge.

8“Ensi yayuuga n'ekankana, emisingi gy'eggulu ne giyuuguuma, ne gikubagana kubanga yali asunguwadde.

9Omukka gwattunka okuva mu nnyindo ze, n'omuliro ogusenkenya ne guva mu kamwa ke, n'amanda gaawamatukamu nga gaaka.

10Yaggula eggulu n'akkirira, ekire ekikwafu nga kiri wansi w'ebigere bye.

11“Yeebagala ku bakerubi n'abuuka, n'aseeyeeyera ku biwaawaatiro by'empewo.

12Enzikiza yagifuula ensiisira okumwetooloola; n'asiikirizibwa amazzi amakwafu, ebire ebikutte,

13mu kitangaala ekiri w'abeera mwawamatukamu amanda g'omuliro.

14“Omukama yabwatuka ng'ayima mu ggulu; Ali Waggulu Ddala n'ata eddoboozi lye.

15Yalasa obusaale n'ababunya emiwabo, n'okubwatuka kwa laddu okw'amaanyi n'abasaanyaawo.

16Ebiwonvu by'ennyanja ne byeyerula, emisingi gy'enkulungo y'ensi ne girabika, Omukama bwe yaboggola, omukka gw'emivumbo gye bwe gwafuuwa.

17“Yayima waggulu n'ambaka, n'ansikayo mu mazzi amangi.

18Yamponya omulabe wange ow'amaanyi, abo abaali bankyaye, abampitiridde amaanyi.

19Bannumba ku lunaku olw'obuyinike bwange, naye Omukama ye yali obuyambi bwange.

20Yanzigyayo n'antwala mu kyererezi; yamponya, kubanga aneesiimiramu.

21“Omukama yampeera ng'agerera ku butuukirivu bwange; yanziriza ng'agerera ku butukuvu bw'emikono gyange.

22Kubanga nakuuma amakubo g'Omukama, saakola bubi kuva ku Katonda wange.

23Kubanga ebiragiro bye byonna bindi wano mu maaso; saawunjuka ku mateeka ge.

24Mu maaso ge saaliko musango; neekuuma nze okukola ekibi.

25N'Omukama yanziriza ng'agerera ku butuukirivu bwange, ng'asinziira ku butukuvu bwange mu maaso ge.

26“Ku mutuufu weeraga bw'oli omutuufu; ku muntu ataliiko musango weeraga bw'otoliiko musango.

27Ku mutukuvu weeraga bw'oli omutukuvu; ku mwonoonefu weeraga bw'oli omukalabakalaba.

28Olokola abatene, naye amaaso n'ogasimba abeekuza obatoowaze.

29Ggwe ttawaaza yange, ayi Mukama, Omukama atangaaza enzikiza yange.

30Nga ndi naawe n'eggye ndirumba, Nga ndi ne Katonda wange mpalampa ne bbugwe.

31“Katonda ono, ekkubo lye temuli bbala. Ekigambo ky'Omukama kitukuze na muliro; Ye ngabo ya bonna abaddukira gy'ali.

32“Kubanga ani Katonda, wabula Omukama? Ani Lwazi, wabula Katonda waffe?

33Ye Katonda ankindikidde amaanyi, ekkubo lyange alittaanyizza ddala.

34Ebigere byange yabifaananya eby'empeewo, n'annyimiriza awagulumivu.

35Yayigiriza emikono gyange okutabaala, emikono gyange giweta omusaale ogw'ekikomo.

36“Wampa engabo y'obuwanguzi bwo; wanfaako n'onfuula mwatiikirivu.

37Enta zange wazigaziya, obukongovvule bwange buleme kukoowa.

38Nawondera abalabe bange ne mbaseseggula; saakyuka nga sinnabazikiriza.

39Nabakuba, tebaddamu kusituka; bangwa awo ku bigere byange.

40“Wankindikira obuzira nsobole olutalo, abansitukiramu wabafeebeza ku bigere byange.

41Abalabe bange wabakyusa ne banziruka; abankyawa ne mbazikiriza.

42Baalekaana, ne wabula abalokola; baawanjagira Omukama, kyokka teyabaddamu.

43Nabamerengula ng'enfuufu y'ettaka, nabasambirira ne mbalinnyirira ng'ebitoomi by'omu kkubo.

44“Wamponya ennyombo z'abantu bange, wankuuma ng'omutwe gwa mawanga; abantu be nali simanyi bampeereza.

45Abagwira babundaala we ndi; okutu kwabwe kuŋŋondera.

46Abagwira batekemuka, ne bava mu bigo byabwe nga bakankana.

47“Omukama mulamu, aweebwe omukisa Olwazi lwange. Agulumizibwe Katonda, Olwazi lw'obulokofu bwange.

48Ye Katonda awoolera eggwanga ku lwange, assa amawanga wansi wange;

49antaasa ku balabe bange. Wangulumiza ku bannumba, wamponya abantu abakambwe.

50Kyendiva nkugulumiza mu mawanga, ayi Mukama; ndiyimbira erinnya lyo ettendo.

51Awa kabaka we obuwanguzi obw'amaanyi; agirira ekisa omusiige we, Dawudi n'ezzadde lye emirembe gyonna.”

← Chapter 21 Jump to: Chapter 23 →