2 Samuel 3

Luganda (BIBU1) (BIBULIYA ENTUKUVU)

← Chapter 2 Jump to: Chapter 4 →

1Ennyumba ya Sawulo n'ennyumba ya Dawudi baalwanaganira ebbanga ggwanvu; Dawudi bulijjo nga yeeyongera maanyi, ennyumba ya Sawulo yo ng'egenda enafuwa.

2Bano be baana abaazaalirwa Dawudi ng'ali e Keburoni: Omuggulanda yali Amunoni owa Akinowamu ow'e Yezureeli;

3owookubiri Kileyabu owa Abigayili eyali muka Nabali ow'e Karumeli; owookusatu Abusalomu mutabani wa Maaka, muwala wa Talumayi kabaka w'e Gessuru;

4owookuna Adoniya mutabani wa Kaggiti; owookutaano Sefatiya mutabani wa Abitali,

5n'owoomukaga Yiturewamu owa Egula muka Dawudi; abo be baazaalirwa Dawudi e Keburoni.

6Mu bbanga ennyumba ya Sawulo we yalwanaganiranga n'ennyumba ya Dawudi, Abuneri mutabani wa Neri yali yeeyongera okwenyweza mu nnyumba ya Sawulo.

7Sawulo yalina omusebeyi, nga ye Rizupa, muwala wa Aya. Olumu Yisi-Boseti yagamba ku Abuneri nti:

8“Lwaki oganza musebeyi wa kitange?” Abuneri n'asunguwala nnyo olw'ekyo Yisi-Boseti kye yayogera, n'ayanukula nti: “Olowooza ndi mutwe gwa mbwa, ndi wa Yuda? Na kati mbadde nkyagirira ekisa ennyumba ya kitaawo Sawulo ne baganda be ne mikwano gye; saakuwaayo mu mikono gya Dawudi, naye ggwe olwa leero onvunaana ekibi ekyekuusa ku mukazi ono.

9Katonda akole bw'atyo Abuneri, ate asinze nawo, singa sikolera Dawudi Omukama bye yamulayirira,

10okuggya obwakabaka ku nnyumba ya Sawulo, n'okunyweza nnamulondo ya Dawudi ku Yisirayeli ne ku Yuda okuva ku Daani okutuuka ku Beeriseba.”

11Yisi-Boseti teyaguma kugamba ku Abuneri kantu kalala konna, kubanga yali amutya.

12Abuneri n'atuma ababaka ewa Dawudi ku lulwe bamugambe nti: “Ensi ye ani?” Era bamugambe nti: “Tukole endagaano nkuyambe okuzza Yisirayeli gy'oli.”

13Dawudi n'addamu nti: “Kirungi; nzija kukola naawe endagaano, wabula nkusaba ekintu kimu: toliraba maaso gange, wabula ng'oleese Mikali muwala wa Sawulo lw'olijja; olwo lw'olinnyimirira mu maaso.”

14Dawudi n'atuma ababaka ewa Yisi-Boseti mutabani wa Sawulo ng'agamba nti: “Komyawo mukazi wange Mikali gwe nayogereza n'obuliba kikumi obw'Abafilisitiini.”

15Yisi-Boseti n'alagira ne bamuggya ku bbaawe Palutyeli, mutabani wa Layisi.

16Bbaawe yamugoberera nga bw'agenda akaaba okutuukira ddala e Bakurimu. Abuneri n'amugamba nti: “Genda, ddayo.” Naye n'addayo.

17Abuneri yayogeraganyaamu n'abakadde mu Yisirayeli, n'abagamba nti: “Ebbanga lino lyonna mubadde mwegomba Dawudi abeere kabaka wammwe;

18kale nno kati mumufuule, kubanga Omukama yasuubiza Dawudi nti: ‘N'omukono gw'omuweereza wange Dawudi, ndinunula abantu bange Yisirayeli mu mikono gy'Abafilisitiini n'egy'abalabe baabwe bonna.’ ”

19Abuneri era n'ayogeraganyaamu n'Ababenyamiini. N'agenda n'abuulira Dawudi mu Keburoni byonna Yisirayeli ne Benyamiini yenna bye baali basemba.

20Abuneri bwe yajja ewa Dawudi mu Keburoni wamu ne basajja be amakumi abiri, Dawudi n'amukolera embaga wamu n'abasajja be amakumi abiri abaali bazze naye.

21Abuneri n'agamba Dawudi nti: “Ka ŋŋende nkuŋŋaanyize ku ggwe, mukama wange kabaka, Yisirayeli yenna, bakole naawe endagaano, ofuge bonna ng'omwoyo gwo bwe gwegomba.” Dawudi n'asiibula Abuneri, n'agenda mu ddembe.

22Mu kadde ako abasajja ba Dawudi ne Yowabu ne badda nga bava okwaya; baalina omunyago munene. Abuneri teyali na Dawudi mu Keburoni, kubanga yali amaze okumusiibula, ng'agenze mu ddembe.

23Yowabu n'eggye lyonna bwe baakomawo, abantu ne babuulira Yowabu nti: “Abuneri mutabani wa Neri yazze ewa kabaka, era yamusiibudde n'agenda mu ddembe.”

24Yowabu n'agenda ewa kabaka n'agamba nti: “Wakoze ki kino? Abuneri mutabani wa Neri yazze gy'oli; lwaki watadde mute? Kati wuuyo agenze.

25Abuneri mutabani wa Neri tomumanyi? Ekyamuleese kukulimbalimba, alabe enfuluma n'ennyingira yo, amanye na byonna by'okola.”

26Yowabu n'afuluma n'ava awali Dawudi, n'atuma ababaka bagoberere Abuneri, ne bamukomyawo okumuggya ku luzzi lw'e Sira. Dawudi teyakimanyaako.

27Abuneri bwe yakomawo mu Keburoni, Yowabu n'amuzza ku mabbali mu makkati g'omulyango abeere ng'ayogera naye mu kyama, awo we yamufumitira ekiso mu lubuto, n'afa. Yakikola okuwoolera eggwanga olw'omusaayi gwa muganda we Asaweli.

28Dawudi bwe yakimanyaako oluvannyuma n'agamba nti: “Nze n'obwakabaka bwange tetuliiko musango emirembe gyonna mu maaso g'Omukama olw'omusaayi gwa Abuneri, mutabani wa Neri.

29Omusaayi gwe gubeere ku mutwe gwa Yowabu ne ku nnyumba ya kitaawe yonna. Mu nnyumba ya Yowabu temuggwanga alina kikulukuto ky'amazzi, mugenge, eyesimbaggiriza ku muggo, afa ekitala, n'atalina mmere.”

30Bwe batyo Yowabu ne Abisayi muganda we bwe batta Abuneri, kubanga yatta Asaweli muganda waabwe mu lutalo lw'e Gibewoni.

31Dawudi n'agamba Yowabu n'abantu bonna abaali naye nti: “Muyuze ebyambalo byammwe, mwesibe ebikutiya, mukungubage nga mukulembeddemu Abuneri.” Ye kabaka Dawudi yajja avaako emabega w'olunnyo.

32Ne baziika Abuneri mu Keburoni; Dawudi yakangula eddoboozi n'akungubagira ku malaalo ga Abuneri, n'abantu bonna ne bakaaba.

33Kabaka yakungubagira Abuneri, n'agamba nti: “Ddala Abuneri yali ateekwa okufa ng'abasiru bwe bafa?

34Emikono gyo tegyali misibe, n'ebigere byo tebyali biriggye mu nvuba. Wabula wafa ng'omuntu bw'afiira mu mikono gy'ababi.” Abantu bonna ne baddamu okumukaabira.

35Abantu bonna ne bajja ne basindirira Dawudi alyeyo ku kantu nga bukyali misana, naye Dawudi n'alayira nti: “Omukama ankole bw'atyo, ate asinze nawo, singa nkomba ku mmere wadde akantu akalala konna ng'enjuba tennagwa.”

36Abantu bonna ne bawulira, ne kibasanyusa, anti byonna kabaka bye yakolanga byasanyusanga abantu bonna.

37Abantu bonna ne Yisirayeli yenna ne bamanya ku olwo nti okuttibwa kwa Abuneri mutabani wa Neri tekwava ku Dawudi.

38Era kabaka n'agamba abaweereza be nti: “Temulaba nti omulangira era omuntu omukulu ddala agudde olwa leero mu Yisirayeli?

39Newandibadde nsiigiddwa mbeere kabaka, naye nkyali munafu; abasajja bano batabani ba Zeruya bakyansinziza wala amaanyi. Omukama aweere akoze akabi ng'agerera ku kabi k'akoze.”

← Chapter 2 Jump to: Chapter 4 →