2 Samuel 14

Luganda (BIBU1) (BIBULIYA ENTUKUVU)

← Chapter 13 Jump to: Chapter 15 →

1Yowabu, mutabani wa Zeruya n'ategeera ng'omutima gwa kabaka guzzeemu okumulumira Abusalomu.

2Awo Yowabu n'atuma e Tekowa, n'aggyayo omukazi omugezi, n'amugamba nti: “Weefaananye ng'ali mu kukungubaga; teekako ebyambalo by'okukungubaga; teweesiiga muzigo, ofaanane ng'omukazi amaze ebbanga eggwanvu ennyo ng'okaabira eyakufaako.

3Olwo genda ewa kabaka omugambe ebigambo bino.” Awo Yowabu n'amubuulira eby'okwogera.

4Omukazi w'omu Tekowa bwe yayingira ewa kabaka, n'agwa wansi ku maaso ge ku ttaka, n'avunnama, n'agamba nti: “Mponya, ayi kabaka.”

5Kabaka n'amugamba nti: “Ogubadde?” Ye n'ayanukula nti: “Ndi nnamwandu; baze yafa.

6Omuzaana wo yalina abaana babiri abaweereza; baayombera eyo ku ttale nga tewali muntu kubatawulula; omu n'akuba munne n'amutta.

7Ate wuuno kati ab'oluganda bonna balumbye omuzaana wo, bagamba nti: ‘Mutuwe oyo eyatta muganda we tumutte olw'okubeera obulamu bwa muganda we gwe yatta, olwo tusangulirewo ddala n'omusika.’ Baagala okuzikiza eryanda lyange erimu liti lye nsigazizza, baze aleme kusigaza linnya ku nsi na zzadde.”

8Kabaka n'agamba omukazi nti: “Weddireyo eka, nzija kubaako kye ndagira ku bikukwatako.”

9Omukazi ow'e Tekowa n'agamba kabaka nti: “Ayi Mukama wange kabaka, leka omusango gubeere ku nze ne ku nnyumba ya kitange; ye kabaka ne nnamulondo ye tebaliiko musango.”

10Kabaka n'agamba nti: “Singa wabaawo akugambako ekigambo kyonna, mundeetere; tagenda kuddayo kukutawaanya.”

11N'addamu nti: “Kabaka awanjagire Omukama Katonda we, awoolera eggwanga olw'omusaayi aleme kukola kabi, baleme kuzikiriza mutabani wange.” N'addamu nti: “Mazima Omukama nga mulamu, mpaawo luviiri lunaava ku mutwe gwa mwana wo ne lugwa ku ttaka.”

12Awo omukazi n'agamba nti: “Omuzaana wo leka abeeko ky'agamba mukama wange kabaka.” N'agamba nti: “Yogera.”

13Omukazi n'agamba nti: “Lwaki abantu ba Katonda obakoledde ekifaanana kityo? Okulaba nga kabaka yaayogera ekigambo ekyo, ali ng'eyeesalira yennyini omusango, kubanga kabaka yagaana okuzza owuwe eyagobebwa.

14Ffenna tufa, tuli nga mazzi, bwe gayiika ku ttaka nga tegakyaseneddwawo. Katonda taggyawo bulamu; asala gonna oyo abeera agobeddwa aleme kusigala ng'agobeddwa w'ali.

15Kale nno kyenvudde nzija njogere ewa kabaka mukama wange ekigambo kino, kubanga abantu bantiisizza. Omuzaana wo n'agamba nti: ‘Nzija kwogera ewa kabaka, oboolyawo kabaka anaakola muzaana we ky'agambye.

16Oboolyawo kabaka ajja kuwulira, awonye omuzaana we mu mikono gy'oli ayagala okumalawo nze ne mutabani wange mu busika Katonda bwe yatuwa.’

17Muzaana wo kyavudde agamba nti: ‘Ekigambo kya Mukama wange kabaka kindeetere okuweerako, anti omukama kabaka wange abeera nga malayika wa Katonda, mu kulamula ekirungi n'ekibi.’ Omukama Katonda wo abeere naawe.”

18Kabaka n'ayanukula n'agamba omukazi nti: “Tonkisa kigambo ku bye ŋŋenda okukubuuza.” Omukazi n'agamba nti: “Mukama wange kabaka ayogere.”

19Kabaka n'amubuuza nti: “Yowabu tali naawe mu bintu bino byonna?” Omukazi n'ayanukula, n'agamba nti: “Mazima ggwe ng'oli mulamu, mukama wange kabaka, tewali ayinza kuwunjuka kudda ku ddyo oba ku kkono n'ava ku mukama wange kabaka ky'aba agambye. Kituufu yabadde Yowabu eyandagidde okukola kino; yennyini ye yaŋŋambye njogere ebigambo bino byonna.

20Omuweereza wo Yowabu ye yakikoze, alongoose embeera nga bw'eri. Ggwe nno, mukama wange, oli mugezi nga malayika wa Katonda; kyova otegeera byonna ebikolebwa ku nsi.”

21Kabaka n'agamba Yowabu nti: “Kale nzija kukikola. Genda oyite omuvubuka Abusalomu.”

22Yowabu n'agwa wansi ku maaso ge ku ttaka, n'avunnama, n'asabira kabaka omukisa. Yowabu n'agamba nti: “Olwa leero omuweereza wo ategedde nti asanze ekisa mu maaso go, mukama wange kabaka, kubanga okoze omuweereza wo ky'asabye.”

23Yowabu n'asituka n'agenda mu Gessuru, n'aleeta Abusalomu mu Yeruzaalemu.

24Naye kabaka n'agamba nti: “Addeyo mu nnyumba ye, saagala ansisinkane.” Abusalomu n'addayo mu nnyumba ye; teyasisinkana kabaka.

25Mu Yisirayeli mwonna temwali musajja atendebwa nnyo bulungi nga Abusalomu; okuva ku mutwe okutuuka ku bigere nga taliiko kamogo na kamu.

26Bwe yamwanga enviiri ze, ng'azipima. Anti yateranga okumwa enviiri ze buli mwaka kubanga zamuzitowereranga. Zaazitowanga sekeli ebikumi bibiri, mu sekeli za kabaka.

27Abusalomu yazaalirwa abalenzi basatu n'omuwala omu, erinnya lye Tamari; yali muwala mulungi mu ndabika.

28Abusalomu yabeera mu Yeruzaalemu emyaka ebiri nga tasisinkananga kabaka.

29N'atuma ewa Yowabu ajje amutume ewa kabaka, naye Yowabu teyajja. N'atumayo omulundi omulala, era n'agaana okujja.

30Kwe kugamba abaweereza be nti: “Mulabe, ennimiro ya Yowabu eriraanye eyange, mulimu sayiri. Mugende mugiteekere omuliro.” Abaweereza ba Abusalomu ne bateekera ennimiro omuliro.

31Yowabu n'asituka, n'ajja ewa Abusalomu mu nnyumba ye, n'abuuza nti: “Lwaki abaweereza bo baateekedde ennimiro yange omuliro?”

32Abusalomu n'ayanukula Yowabu nti: “Laba, nakutumira, ne nsaba nti jjangu nkutume ewa kabaka omumbuulize nti: ‘Naviira ki e Gessuru? Kyandisinzeeko singa nasigalirayo ddala’. Kale nno nsaba nsisinkane kabaka. Oba ndiko ekibi ekinvunaanibwa, anzite.”

33Yowabu n'agenda ewa kabaka n'amubuulira. Kabaka n'atumya Abusalomu, n'ajja ewa kabaka, n'agwa ku ttaka mu maaso ge nga yeevuunise ku maaso ge, n'avunnama. Kabaka n'anywegera Abusalomu.

← Chapter 13 Jump to: Chapter 15 →