2 Samuel 12

Luganda (BIBU1) (BIBULIYA ENTUKUVU)

← Chapter 11 Jump to: Chapter 13 →

1Awo Katonda n'atuma Natani ewa Dawudi. Bwe yajja gy'ali, n'amugamba nti: “Waaliwo abasajja babiri mu kibuga ekimu, omu nga mugagga omulala nga mwavu.

2Omugagga yalina endiga n'ente nga bingi nnyo.

3Baabuwe omwavu nga talina kantu, mpozzi akaliga akato; akatono kati ke yali aguze. Yakalunda, ne kakula naye wamu n'abaana be; kaalyanga ku tugaati twe; kaanyweranga ku kikopo kye; keebakanga awo mu mikono gye, leero nga kali nga kawala ke.

4Naye omugenyi bwe yajja ew'omugagga, omugagga yalemwa okukwata ku ndiga ne ku nte ze, afumbire omugenyi eyali azze ewuwe, wabula yakwata kaliga ka musajja omwavu, n'akafumbira eyali azze ewuwe.”

5Obusungu bwa Dawudi ne bweserera ku musajja oli, n'agamba Natani nti: “Mazima Omukama nga mulamu, omusajja oyo eyakola ekyo agwanidde kufa.

6Akaliga ajja kukagatta n'obuliga buna, kubanga yakola ekyo n'atalaga busaasizi.”

7Natani n'agamba Dawudi nti: “Ggwe musajja oyo! Kino Omukama Katonda wa Yisirayeli ky'agamba: ‘Nakusiiga omuzigo obeere kabaka wa Yisirayeli, era nakuwonya mu mikono gya Sawulo,

8ne nkuwa ennyumba ya mukama wo, ne bakazi ba mukama wo ne mbassa mu mikono gyo, ne nkuwa ennyumba ya Yisirayeli n'eya Yuda. Bino bwe biba nga bitono, naandikwongeddeko n'ebisinga.

9Lwaki kale wagaye ekigambo ky'Omukama n'okola ekibi mu maaso ge? Wuriya Omukitti wamutta n'ekitala, mukazi we n'omutwala abeere mukazi wo; wamussa kitala ky'Abammoni.

10Olw'okubeera ekyo, ekitala si kya kuva mu nnyumba yo emirembe gyonna, kubanga onnyoomye, n'otwala muka Wuriya Omukitti abeere mukazi wo.’

11Kale nno kino ky'agamba Omukama: ‘Nzija kukusitulira akabi mu nnyumba yo. Bakazi bo nzija kubakuggyako ng'olaba bw'oti mbawe munno; alyebaka ne bakazi bo emisana ttuku.

12Ggwe wakola mu nkiso, nze ekyo nzija kukikola mu maaso ga Yisirayeli yenna emisana ttuku.’ ”

13Dawudi n'agamba Natani nti: “Nyonoonye eri Omukama.” Natani n'agamba Dawudi nti: “N'Omukama aggyewo ekibi kyo; tojja kufa.

14Naye kubanga oleetedde abalabe b'Omukama okumuvuma olwa kino, omwana anaakuzaalirwa ajja kufa.”

15Natani n'addayo ewuwe. Omukama n'akuba omwana muka Wuriya gwe yazaalira Dawudi, n'alwala.

16Dawudi n'awanjagira Omukama ku lw'omwana, n'asiiba, n'abeeranga mu nnyumba ye; yeebakanga ku ttaka ekiro kyonna.

17Abakadde mu nnyumba ye ne bajja awo we yali bamuwalirize ave ku ttaka, naye n'agaana, nga takkiriza na kulya nabo mmere.

18Ku lunaku lwomusanvu omwana n'afa. Abaweereza ba Dawudi baatya okumubuulira omwana bw'afudde; anti baagamba nti: “Wuuno omwana bw'abadde akyali mulamu, twamugambanga nga tatuwuliriza. Kati tunaamugamba tutya nti: ‘Omwana afudde!’ Yandikola ekisinga obubi.”

19Dawudi bwe yalaba abaweereza be nga boogeraganya obwama, n'ategeera ng'omwana afudde; n'abuuza abaweereza be nti: “Omwana afudde?” Ne baanukula nti: “Afudde.”

20Dawudi n'ava ku ttaka, n'anaaba, n'asaaba omuzigo, n'akyusa ebyambalo, n'agenda mu nnyumba y'Omukama, n'asinza. Bwe yadda mu nnyumba ye, n'asaba akookulya, ne bamuteerayo emmere, n'alya.

21Abaweereza be ne bamugamba nti: “Kiki kino ky'okoze? Omwana bwe yali akyali mulamu, wasiibanga n'okaaba olw'okubeera ye; omwana bw'afudde, osituse n'olya!”

22N'addamu nti: “Omwana ng'akyali mulamu, nasiiba ne nkaaba olw'okubeera ye; anti nali ŋŋamba nti: ‘Ani amanyi, oboolyawo Omukama anansaasira omwana n'alama.’

23Naye kati afudde, ate nsiibira ki? Nkyasobola okumukomyawo? Nze ndigenda gy'ali, naye ye tagenda kudda gye ndi.”

24Dawudi n'akubagiza Batuseba mukazi we, n'agenda gy'ali, ne yeebaka naye. N'azaala omwana ow'obulenzi, n'amutuuma Solomoni. Omukama n'amwagala.

25Omukama n'atuma ng'ayita mu Natani omulanzi, amutuume Yedidiya olw'okubeera Omukama.

26Mu bbanga eryo Yowabu yalwanyisa Rabba eky'Abammoni, n'awangula ekibuga kya kabaka.

27Yowabu n'atuma ababaka ewa Dawudi, n'agamba nti: “Nalwanyisa Rabba, ne nkwata enzizi zaakyo.

28Kale nno kuŋŋaanya eggye erisigadde, ozinde ekibuga, okikwate, kubanga nze bwe nnaakiwamba, kijja kubbulwamu linnya lyange.”

29Dawudi n'akuŋŋaanya eggye lyonna, n'agenda e Rabba, n'akirumba, n'akikwata.

30N'aggya ku mutwe gwa kabaka waabwe engule. Engule yali ezitowa talenta eya zaabu nnamba, ng'etoneddwako amayinja ag'omuwendo. Ne bagissa ku mutwe gwa Dawudi. Era Dawudi n'anyagulula ekibuga, n'atwala omunyago munene nnyo.

31Abantu abaalimu yabaggyamu n'abassa ku gw'okukola n'emisumeeni, n'ensuuluulu ez'ebyuma n'embazzi ez'ebyuma, n'abakozesa amataffaali. Bw'atyo bwe yakola ne ku bibuga byonna eby'Abammoni. Olwo Dawudi n'akomawo mu Yeruzaalemu n'eggye lyonna.

← Chapter 11 Jump to: Chapter 13 →