Deuteronomy 10

Lahu Bible Edited © Thailand Bible Society and Bible Society of Myanmar, 2010, 2020.

← Chapter 9 Jump to: Chapter 11 →

1Oˇ ve hkʼaw‸ nawˉ, Gʼuiˬsha ngaˬ hta‸ chi hkʼe kʼaw‸ kʼoˆ laˇ ve yoˬ. Awˉ lawˉ peuˇ teˇ pawˆ ve hta‸ shuˍ da‸ ve haˉ pui baˉ nyiˇ maˬ kʼaw‸ te leh, ha‸ shaˉ taˍ kuiˬ suhˆ ta kʼoˍ teˇ maˬ hta‸ htawˇ te taˍ-o‸. Oˇ hkʼe te peuˬ hkʼaw‸ nawˉ, hkʼaw hkʼoˆ lo ngaˬ geh taˆ la-o.

2Nawˬ te hkoˇ peuˬ ve haˉ pui baˉ oˇ ve teˇ hpaˍ awˬ hkʼoˆ lo ngaˬ bvuh‸ taˍ ve awˬliˇtawˇhkawˇ teˇ hpaˍ, haˉ pui baˉ awˬ suhˉ chi ve nyiˇ maˬ awˬ hkʼoˆ lo kʼaw‸ bvuh‸ laˇ tuˬ yoˬ. Peuˬ kʼo, ta kʼoˍ hkʼaw keu taˍ-o‸, teh‸ ngaˬ hta‸ kʼoˆ laˇ ve yoˬ.

3Hkʼe te leh, ngaˬ lehˬ aˍhkeˇshaˍ suhˆ hta‸ yuˬ leh ta kʼoˍ te peuˬ hkʼaw‸ nawˉ, awˉ lawˇ peuˇ teˇ pawˆ ve hta‸ shuˍ da‸ ve haˉ pui baˉ nyiˇ maˬ htawˆ veu leh hkʼaw hkʼoˆ lo taˆ-e ve yoˬ.

4Oˇ htaˇ, Gʼuiˬsha lehˬ awˉ lawˉ teˇ pawˆ htaˇ hkʼa shuˍ, haˉ pui baˉ oˇ ve teˇ hpaˍ awˬ hkʼoˆ lo, nawˬ hui hkʼaw hkuiˉ puiˍ lo chehˇ taˍ htaˇ, Yawˇ aˬ miˍ ha hkʼaw chehˇ leh kʼoˆ laˇ ve awˬliˇtawˇhkawˇ oˇ ve teˇ chi hkawˇ kʼaw‸ bvuh‸ leh ngaˬ hta‸ piˇ laˇ ve yoˬ.

5Hkʼe te leh, ngaˬ hkʼaw hkʼoˆ lo kʼaw‸ ya‸ la ve yoˬ. Oˇ ve hkʼaw‸ nawˉ, Gʼuiˬsha kʼoˆ laˇ taˍ ve hkʼe, ngaˬ lehˬ haˉ pui baˉ oˇ ve nyiˇ maˬ hta‸ suhˆ ta kʼoˍ hkʼaw keu taˍ ve yoˬ. Ya‸ nyi hkʼa gaˬ oˇ kaˬ lo keu taˍ sheˍ ve yoˬ.

6(Iˉsaˍreˍlaˆ chaw teˇ hpaˍ Yaˍkanˍ chaw hui ve iˉ kaˆ nanˬ bawˍ lo tu leh, Moˇseˍraˆ teh‸ kʼoˆ ve chehˇ kuiˬ lo kʼai ve yoˬ. Oˇ kaˬ lo Aˍronˍ suh-e leh yawˇ hta‸ tuˍ piˇ ve yoˬ. Hkʼe te leh, yawˇ ve yaˇ paˍ Eˇlaˍsaˍ yawˇ awˬ tan paw hkuˇ kʼaw‸ te ve yoˬ.

7Yawˇ hui oˇ kaˬ lo kʼaw‸ tu leh, Guˇgawˇdaˆ lo kʼai ve yoˬ. Oˇ kaˬ lo kʼaw‸ tu leh, iˉ kaˆ gʼuiˬ tuˇ hkʼa biˇ cawˬ ve Yawˇbaˍtaˆ teh‸ kʼoˆ ve chehˇ kuiˬ lo kʼai ve yoˬ.

8Oˇ kaˬ lo gaˬ htaˇ, Gʼuiˬsha lehˬ ka ti‸ shaˉ caˆ ta kʼoˍ hta‸ ha‸ shaˉ leh paw hkuˇ te tuˬ maˇ kʼoˆ, Yawˇ ve awˬ meh hkʼaw chaw yaˇ hui hta‸ bon na‸ piˇ tuˬ maˇ kʼoˆ, Leˍviˆ chaw hui hta‸ leuˆ yuˬ ve yoˬ. Ya‸ nyi hkʼa gaˬ, yawˇ hui lehˬ kanˉ chi teˇ hpaˍ hta‸ gʼa te chehˇ taˍ ve yoˬ.

9Chi hta‸ pa taw, Leˍviˆ awˬ ceuˬ awˬ hkʼaˇ teˇ hpaˍ lehˬ, awˬ nu ve awˬ ceuˬ awˬ hkʼaˇ teˇ hpaˍ hkʼa shuˍ, mvuhˇmiˬ maˇ cawˬ. Gʼuiˬsha ka ti‸ te piˇ taˍ ve hkʼe, yawˇ hui Gʼuiˬsha ve paw hkuˇ gʼa te ve yoˬ.)

10Awˉ lawˉ teˇ pawˆ htaˇ hkʼa shuˍ, ngaˬ lehˬ hkʼaw hkʼoˆ lo 40 nyi 40 haˉ chehˇ taˍ ve yoˬ. Gʼuiˬsha lehˬ ngaˬ lawˬ hkawˉ ve awˬ hkawˇ hta‸ na yuˬ leh, nawˬ hui hta‸ maˇ te luˬ piˇ ve yoˬ.

11Oˇ ve hkʼaw‸ nawˉ, nawˬ hui ve awˬ puˍ awˬ pi hui hta‸ yawˇ piˇ tuˬ ka ti‸ te taˍ ve mvuhˇmiˬ hkʼaw lo nawˬ hui hta‸ shiˍ kʼai piˇ tuˬ, Yawˇ ngaˬ hta‸ kʼoˆ laˇ ve yoˬ.

12Iˉsaˍreˍlaˆ chaw teˇ hpaˍ-oˬ, Gʼuiˬsha nawˬ hui hta‸ te tcuh gaˇ ve kanˉ hta‸ chi beu‸ na taˍ sheˍ. Gʼuiˬsha hta‸ yawˆ yan leh, yawˇ kʼoˆ laˇ ve kanˉ hkʼa peu-eˬ hta‸ te-o. Yawˇ hta‸ ha‸ leh nyi ma awˬ tawˬ hkʼa gaˬ yawˇ ve kanˉ hta‸ te-o.

13Yawˇ ve awˬliˇtawˇhkawˇ hkʼa peu-eˬ ve hta‸ na yuˬ-o‸. Nawˬ hui da‸ ve awˬ bon hta‸ gʼa tuˬ, ya‸ nyi ngaˬ nawˬ hui hta‸ kʼoˆ laˇ chehˇ ve yoˬ.

14Mvuhˇ naw miˬguiˬ leh, miˬguiˬ hkʼoˆ cawˬ ve awˬ ceuˬ hkʼa peu-eˬ Gʼuiˬsha ve mawˇ deˇ deˇ hpeh‸ ve yoˬ.

15Gʼuiˬsha lehˬ nawˬ hui ve awˬ puˍ awˬ pi hui hta‸ ha‸ jaˇ ve pa taw, awˬ nu ve chaw ceuˬ teˇ hpaˍ a‸ kehˉ Yawˇ nawˬ hui hta‸ leuˆ yuˬ leh, ya‸ nyi hkʼa gaˬ nawˬ hui lehˬ Yawˇ leuˆ yuˬ taˍ ve chaw hpeh‸ chehˇ taˍ ve yoˬ.

16Chi hta‸ pa taw, ya‸ nyi hta‸ tanˬ leh Gʼuiˬsha ve tawˇ hta‸ na yuˬ-o‸. Nyi ma taˇ kʼaw‸ heh chehˇ-oˆ.

17Nawˬ hui ve Jawˇmawˇ Gʼuiˬsha lehˬ, awˬ nu ve gʼuiˬsha teˇ hpaˍ a‸ kehˉ awˬ me‸ awˬ hponˇ leh kanˇ paˆ uiˍ jaˇ ve yoˬ. Yawˇ ve kanˇ paˆ hta‸ kawˆ cawˇ ve yoˬ. Yawˇ nyi ma pa la tuˬ, Yawˇ hta‸ la‸ shawnˍ ca hkʼawˇ piˇ maˇ gʼa.

18Yawˇ lehˬ, yaˇcuˬshi leh mehˇchawˇma hui hpawˇ chehˇ leh suhˉ jehˬ piˇ ve yoˬ. Nawˬ hui ve mvuhˇmiˬ hkʼaw ca chehˇ la taˍ ve awˬ nu ve chaw hui hta‸ htawˇ Yawˇ ha‸ leh, caˍ piˇ taw piˇ, feuˉ piˇ deh piˇ chehˇ ve yoˬ.

19Chi hta‸ pa taw, nawˬ hui geh ca chehˇ la taˍ ve chaw oˇ ve teˇ hpaˍ hta‸ ha kʼaˉ piˇ-oˆ. Awˬ lawn kʼo, nawˬ hui htawˇ teˇ pawˆ htaˇ Eˇjiˇtu‸ mvuhˇmiˬ hkʼaw hkehˉ chaw hpeh‸ jaw taˉ peuˬ ve yoˬ.

20Nawˬ hui ve Jawˇmawˇ Gʼuiˬsha hta‸ yawˆ yan leh, Yawˇ hta‸ ceh tiˉ oˉ kʼoˍ pui-o. Yawˇ hta‸ ka ti‸ yeˬ leh, Yawˇ ve awˬ meh hkʼaw lo ceh tiˉ kanˉ te-o.

21Yawˇ hta‸ chiˇ mvuh piˇ-oˆ. Awˬ lawn kʼo, Yawˇ lehˬ nawˬ hui ve Gʼuiˬsha hpeh‸ leh, nawˬ hui awˬ pon anˇ tuˬ awˬ heˆ laiˉ ceuˬ te maˍ laˇ ve hta‸ nawˬ hui hkʼa tawˍ lehˆ gʼa mawˬ taˍ peuˬ.

22Nawˬ hui ve awˬ puˍ awˬ pi hui Eˇjiˇtu‸ mvuhˇmiˬ lo kʼai ve teˇ yanˇ, yawˇ hui chaw suhˍ chi gʼaˇ ceh tiˉ cawˬ ve yoˬ. Ya‸ hkʼaˇ, chi beu‸ nawˬ hui ve Gʼuiˬsha lehˬ, nawˬ hui hta‸ meu‸ keu shiˍ hkʼa shuˍ maˇ la piˇ taˍ peuˬ.

← Chapter 9 Jump to: Chapter 11 →