Deuteronomy 19

Lahu Bible Edited © Thailand Bible Society and Bible Society of Myanmar, 2010, 2020.

← Chapter 18 Jump to: Chapter 20 →

1Gʼuiˬsha nawˬ hui hta‸ piˇ laˇ chehˇ ve mvuhˇmiˬ oˇ ve hkʼaw chehˇ ve chaw hui hta‸ te luˬ te sheˆ piˇ leh, mvuhˇmiˬ oˇ ve hkʼaw nawˬ hui gʼa chehˇ ve teˇ yanˇ,

2mvuhˇmiˬ oˇ ve hta‸ shehˆ tawn te pehˬ leh, teˇ tawn le le awˬ hkʼaw lo kʼai sha laˬ sha ve venˇ teˇ hpaˍ hta‸ gʼa leuˆ yuˬ taˍ ve yoˬ.

3Oˇ hkʼe te taˍ ve kʼo, maˇ dawˇ maˇ gaˇ ve hkʼaw shu hta‸ gʼa tiˇ pehˍ cawˇ ve chaw teˇ gʼaˇ venˇ oˇ ve lo gʼuiˇ hpaw-e hpeh‸ ve yoˬ.

4Chaw teˇ gʼaˇ lehˬ, yawˇ ve canˇ paˍ maˇ heˆ ve chaw teˇ gʼaˇ hta‸ maˇ dawˇ maˇ gaˇ ve hkʼaw gʼa tiˇ pehˍ cawˇ ve kʼo, venˇ oˇ ve teˇ venˇ venˇ lo gʼuiˇ hpaw-e hpeh‸ ve yoˬ.

5Chaw nyiˇ gʼaˇ heh puiˉ hkʼaw lo suhˆ ca hkaˆ-e leh, teˇ gʼaˇ suhˆ htu chehˇ htaˇ ceˉ ceˇ kʼehˆ tawˆ-e leh, teˇ gʼaˇ ve oˉ kʼoˍ hta‸ heuˆ ve pa taw suh kʼai ve kʼo, chaw oˇ ve lehˬ venˇ oˇ ve teˇ maˬ maˬ lo gʼuiˇ hpaw-e hpeh‸ ve yoˬ.

6Oˇ kaˬ lo venˇ teˇ venˇ ceh tiˉ cawˬ ve kʼo, yawˇ gʼa gʼuiˇ hpaw-e tuˬ ve ya‸ kʼaw vuiˇ jaˇ ve pa taw, suh peuˬ ve chaw oˇ ve hpaˇ ve awˬ ceuˬ awˬ hkʼaˇ teˇ hpaˍ yawˇ hkʼaˇ suh gʼa‸ yuˬ laˬ leh, yawˇ hta‸ tiˇ pehˍ piˇ tuˬ yoˬ. Yawˇ lehˬ, maˇ dawˇ maˇ gaˇ ve hkʼaw yawˇ ve awˬ chawˇ hta‸ gʼa tiˇ pehˍ peuˬ ve pa taw yoˬ.

7Chi hta‸ pa taw, oˇ kaˬ lo venˇ shehˆ venˇ leuˆ teh taˍ tuˬ ngaˬ nawˬ hui hta‸ kʼoˆ laˇ chehˇ ve yoˬ.

8Gʼuiˬsha nawˬ hui ve awˬ puˍ awˬ pi hui hta‸ kʼoˆ piˇ taˍ peuˬ ve hkʼe, Yawˇ nawˬ hui ve mvuhˇmiˬ hta‸ uiˍ la kʼehˬ la piˇ leh, Yawˇ ka ti‸ te taˍ peuˬ ve mvuhˇmiˬ oˇ ve hkʼa peu-eˬ nawˬ hui hta‸ piˇ laˇ ve teˇ yanˇ,

9nawˬ hui lehˬ awˬ nu ve venˇ shehˆ venˇ hta‸ gʼa kʼaw‸ leuˆ yuˬ ve yoˬ. (Ya‸ nyi ngaˬ kʼoˆ laˇ chehˇ ve tawˇ hta‸ na yuˬ leh Gʼuiˬsha hta‸ yawˆ yan ve hkʼaw, Yawˇ ve awˬliˇtawˇhkawˇ awˬ hkʼaˇ suh a sha‸ te‸ chehˇ ve kʼo, mvuhˇmiˬ oˇ ve Yawˇ nawˬ hui hta‸ piˇ laˇ tuˬ yoˬ.)

10Te‸ chiˉ venˇbaˆ maˇ cawˬ ve chaw hkʼe leˇ maˇ gʼa suh-e tuˬ leh, Gʼuiˬsha nawˬ hui hta‸ piˇ laˇ chehˇ ve mvuhˇmiˬ hkʼaw nawˬ hui shu hta‸ maˇ gʼa tiˇ pehˍ tuˬ, ngaˬ kʼoˆ ve hkʼe te-o.

11Chaw teˇ gʼaˇ lehˬ, yawˇ ve canˇ paˍ hta‸ tiˇ pehˍ taˉ leh venˇ oˇ ve teˇ maˬ maˬ lo hpaw-e ve kʼo,

12awˬ hoˉ awˬ naˬ teˇ hpaˍ yawˇ hta‸ gʼa ca shiˍ hkʼaw‸ leh, suh peuˬ ve chaw oˇ ve hpaˇ ve awˬ ceuˬ awˬ hkʼaˇ teˇ hpaˍ hta‸ gʼa chiˇ a‸ piˇ ve yoˬ. Yawˇ hui lehˬ suh peuˬ ve chaw oˇ ve awˬ tan, yawˇ hta‸ gʼa tiˇ pehˍ piˇ ve yoˬ.

13Yawˇ hta‸ taˇ ha kʼaˉ piˇ. Nawˬ hui ha lehˬ dawˇ sha gʼa chehˇ tuˬ, Iˉsaˍreˍlaˆ mvuhˇmiˬ hkʼaw shu hta‸ tiˇ pehˍ ve chaw chi hkʼe ve teˇ hpaˍ hta‸ gʼa yuˬ baˬ ve yoˬ.

14Gʼuiˬsha piˇ laˇ chehˇ ve mvuhˇmiˬ hkʼaw gaˬ htaˇ, nawˬ hui lehˬ shu ve miˬ tcuhˉ hta‸ yuˬ jiˆ leh shu ve miˬguiˬ hta‸ hkʼawˇ yuˬ ve maˇ gʼa te.

15Chaw teˇ gʼaˇ te ya‸ ve hta‸ shaˉ hkiˆ hkanˍ paˍ teˇ gʼaˇ tiˉ cawˬ ve kʼo, shaˉ hkiˆ oˇ ve lehˬ maˇ biˇ. Shaˉ hkiˆ hkanˍ paˍ i jaˇ ve nyiˇ gʼaˇ cawˬ htaˇ heh‸, chaw oˇ ve hta‸ suhˉ jehˬ piˇ hpeh‸ ve yoˬ.

16Chaw teˇ gʼaˇ lehˬ, awˬ nu ve chaw teˇ gʼaˇ hta‸ luˬ piˇ lawˬ gaˇ leh, maˇ hteˇ maˇ cawˇ ve hkʼaw shaˉ hkiˆ hkanˍ ve kʼo,

17yawˇ huiˉ maˬ nyiˇ gʼaˇ gʼaˇ Gʼuiˬsha hta‸ oˉ kʼoˍ pui kuiˬ lo gʼa kʼai leh, paw hkuˇ leh suhˉ jehˬ shehˍ hpaˇ teˇ hpaˍ geh suhˉ gʼa ca jehˬ ve yoˬ.

18Suhˉ jehˬ shehˍ hpaˇ teˇ hpaˍ lehˬ, awˬ lawn oˇ ve hta‸ hkʼa deh‸ gʼa‸ chaˬ nyi leh, chaw oˇ ve lehˬ shu hta‸ maˇ hteˇ maˇ cawˇ ve hkʼaw shaˉ hkiˆ hkanˍ chehˇ ve hta‸ gʼa mawˬ ve kʼo,

19yawˇ lehˬ chaw oˇ ve hpaˇ awˬ tan gʼa hkanˍ ve yoˬ. Chi hkʼe te ve hkʼaw, awˬ haiˬ chi teˇ ceuˬ hta‸ nawˬ hui geh gʼa yuˬ baˬ ve yoˬ.

20Oˇ hkʼe te ve kʼo, hpeh‸ la peuˬ ve awˬ lawn chi hta‸ gʼa kaˇ ve chaw hkʼa peu-eˬ kawˆ jaˇ leh, awˬ haiˬ chi hkʼe ve hta‸ yawˇ hui kʼaw‸ te haˆ tuˬ ve maˇ heˆ.

21Chi hkʼe te ve chaw hta‸ a ciˉ ka‸ taˇ ha kʼaˉ piˇ. A sha‸ awˬ tan a sha‸, mehˆ shiˍ awˬ tan mehˆ shiˍ, ciˬ awˬ tan ciˬ, la‸ sheh awˬ tan la‸ sheh, hkui sheh awˬ tan hkui sheh hta‸ yawˇ gʼa kʼaw‸ shaiˍ piˇ ve yoˬ.

← Chapter 18 Jump to: Chapter 20 →