Deuteronomy 33

Lahu Bible Edited © Thailand Bible Society and Bible Society of Myanmar, 2010, 2020.

← Chapter 32 Jump to: Chapter 34 →

1Chi ve lehˬ, Gʼuiˬsha ve chaw Moˉseˍ maˇ suh sheˍ gʼuˇ suhˍ, Iˉsaˍreˍlaˆ chaw hui hta‸ kʼoˆ piˇ taˉ ve bon na‸ hkawˇ hpeh‸ ve yoˬ.

2Gʼuiˬsha lehˬ Siˉnaˆ hkʼaw hkʼoˆ lo tawˆ la ve yoˬ. Yawˇ lehˬ mvuhˇ nyi hkʼa shuˍ Eˇdonˍ mvuhˇmiˬ hkʼoˆ tawˆ la leh, Paˍranˍ hkʼaw hkʼoˆ lo yawˇ ve chaw teˇ hpaˍ hta‸ awˬ gʼeuˆ paw piˇ ve yoˬ. Mvuhˇ naw tcuh yaˇ teˇ meunˍ gʼaˇ Yawˇ geh chehˇ taˍ leh, Yawˇ ve la‸ sha paˉ la‸ sheh hkʼaw aˬ miˍ ha cawˬ taˍ ve yoˬ.

3Gʼuiˬsha lehˬYawˇ ve chaw hta‸ ha‸ leh, Yawˇ hta‸ caˉ da‸ ve chaw hui hta‸ ha‸ shaˉ piˇ ve yoˬ. Chi hta‸ pa taw, ngaˬ hui Yawˇ ve hkui paˇ lo boˆ taˍ leh, Yawˇ ve tawˇ hta‸ na yuˬ ve yoˬ.

4Ngaˬ hui lehˬ, Moˉseˍ piˇ laˇ taˍ ve awˬliˇtawˇhkawˇ teˇ hpaˍ hta‸ na yuˬ ve yoˬ. Oˇ ve teˇ hpaˍ lehˬ, ngaˬ hui awˬ pon awˬ hpfuhˇ hkʼaˆ jaˇ ve mawˇ hpeh‸ ve yoˬ.

5Iˉsaˍreˍlaˆ chaw leh yawˇ hui ve awˬ hoˉ awˬ naˬ teˇ hpaˍ teˇ geh hpawnˬ da‸ chehˇ ve teˇ yanˇ, Gʼuiˬsha lehˬ Iˉsaˍreˍlaˆ chaw hui ve jawˇmawˇ hpeh‸ la ve yoˬ.

6Ruˇbenˍ awˬ ceuˬ awˬ hkʼaˇ teˇ hpaˍ awˬ lawn Moˉseˍ chi hkʼe kʼoˆ ve yoˬ. Ruˇbenˍ awˬ ceuˬ awˬ hkʼaˇ teˇ hpaˍ lehˬ i jaˇ ve htawˇ, yawˇ ve awˬ ceuˬ awˬ hkʼaˇ teˇ hpaˍ maˇ gʼa mehˉ kʼai piˇ, teh‸ kʼoˆ ve yoˬ.

7Yuˇda‸ awˬ ceuˬ awˬ hkʼaˇ teˇ hpaˍ awˬ lawn yawˇ chi hkʼe kʼoˆ ve yoˬ. Gʼuiˬsha-oˬ, yawˇ hui kuˬ chehˇ ve awˬ hkawˇ hta‸ a ciˉ na yuˬ piˇ-oˆ. Yawˇ hui hta‸ awˬ nu ve awˬ ceuˬ awˬ hkʼaˇ teˇ hpaˍ geh kʼaw‸ chehˇ piˇ lawˬ-o‸. Gʼuiˬsha-oˬ, yawˇ hui awˬ pon ma‸ bawˆ piˇ leh, yawˇ hui hta‸ ga piˇ-oˆ, teh‸ kʼoˆ ve yoˬ.

8Leˍviˆ awˬ ceuˬ awˬ hkʼaˇ teˇ hpaˍ awˬ lawn yawˇ chi hkʼe kʼoˆ ve yoˬ Gʼuiˬsha-oˬ, nawˬ lehˬ ka ti‸ yeˬ ve nawˬ ve awˬ ceuˬ Leˍviˆ chaw hui hta‸ cuˇ leh Uˇrenˍ leh Tuˇmenˍ hta‸ yehˇ ve hkʼaw, nawˬve a loˍ hta‸ hpeu‸ maˍ laˇ ve yoˬ. Nawˬ lehˬ Maˍsaˍ teh‸ kʼoˆ ve chehˇ kuiˬ lo yawˇ hui hta‸ lawˇ nyi leh, Meˍriˇbaˆ iˉ kaˆ gʼuiˬ tuˇ paˇ lo yawˇ hui lehˬ hteˇ ve cawˇ ve chaw hpeh‸ ve hta‸ nawˬ gʼa mawˬ ve yoˬ.

9Yawˇ hui lehˬ awˬ pa awˬ e, awˬ viˉ awˬ nyi leh yaˇ ehˉ teˇ hpaˍ hta‸ ka ti‸ yeˬ ve a‸ kehˉ, nawˬ hta‸ leuˉ leh ka ti‸ yeˬ jaˇ ve yoˬ. Yawˇ hui lehˬ nawˬ ve awˬliˇtawˇhkawˇ teˇ hpaˍ hta‸ na yuˬ leh, nawˬ te taˍ ve ka ti‸ shaˉ caˆ hta‸ ha‸ shaˉ taˍ ve yoˬ.

10Nawˬ ve chaw teˇ hpaˍ awˬliˇtawˇhkawˇ hta‸ na yuˬ tuˬ, yawˇ hui maˍ piˇ ve yoˬ. Tanˇ kuiˬ awˬ hkʼoˆ lo tuˉ tanˇ tuˬ teˇ hpaˍ hta‸ yawˇ hui tuˉ tanˇ tuˬ yoˬ.

11Gʼuiˬsha-oˬ, yawˇ hui ve awˬ ceuˬ awˬ hkʼaˇ teˇ hpaˍ uiˍ la leh awˬ gʼaˇ cawˬ la tuˬ ga piˇ-oˆ. Yawˇ hui te ve kanˉ hkʼa peu-eˬ hta‸ ha‸ yuˬ piˇ-oˆ. Yawˇ hui ve canˇ paˍ hkʼa peu-eˬ ve hta‸ te luˬ te sheˆ piˇ leh, teˇ pawˆ ka‸ taˇ kʼaw‸ tu gaˬ la piˇ-oˆ, teh‸ kʼoˆ ve yoˬ.

12Beˍyanˍmenˍ awˬ ceuˬ awˬ hkʼaˇ teˇ hpaˍ awˬ lawn yawˇ chi hkʼe kʼoˆ ve yoˬ. Chaw chi teˇ moˍ hta‸ Gʼuiˬsha ha‸ leh ha‸ shaˉ piˇ ve yoˬ. Teˇ nyi tanˇ vanˇ Yawˇ yawˇ hui hta‸ ha‸ shaˉ piˇ leh, yawˇ hui awˬ kʼaw ji lo chehˇ taˍ ve yoˬ, teh‸ kʼoˆ ve yoˬ.

13Yoˇseh‸ ve awˬ ceuˬ awˬ hkʼaˇ teˇ hpaˍ awˬ lawn yawˇ chi hkʼe kʼoˆ ve yoˬ. Gʼuiˬsha lehˬ mvuhˇ yeˬ hta‸ maˇ kʼoˆ, miˬguiˬ hawˉ lo cawˬ ve iˉ kaˆ hta‸ maˇ kʼoˆ yehˇ leh, yawˇ hui ve mvuhˇmiˬ hta‸ awˬ bon na‸ laˇ piˇ-oˆ.

14Yawˇ hui ve mvuhˇmiˬ lehˬ, mvuhˇ nyi hta‸ pa taw meh la ve iˉ shiˍleh, awˬ yanˇ cawˇ cawˇ naw‸ la ve iˉ shiˍ hkʼa biˇ cawˬ la piˇ-oˆ.

15Aˬ sho-eˬ htaˇ ka‸ cawˬ taˍ ve yawˇ hui ve hkʼaw pui teˇ hpaˍ awˬ hkʼoˆ lo da‸ jaˇ ve iˉ shiˍ hkʼa biˇ cawˬ la piˇ-oˆ.

16Aˉ chuˇ buiˇ hkʼaw chehˇ leh tawˇ yaw ve Gʼuiˬsha ve awˬ bon hta‸ pa taw, yawˇ hui ve mvuhˇmiˬ hkʼaw da‸ ve awˬ ceuˬ hkʼa biˇ cawˬ la piˇ-oˆ. Awˬ bon chi teˇ hpaˍ, Yoˇseh‸ ve awˬ ceuˬ awˬ hkʼaˇ te hpaˍ awˬ hkʼoˆ lo gaˬ la piˇ-oˆ. Awˬ lawn kʼo, Yoˇseh‸ lehˬ yawˇ ve awˬ viˉ awˬ nyi teˇ hpaˍ ve awˬ hoˉ hpeh‸ ve yoˬ.

17Yawˇ ve awˬ me‸ awˬ hponˇ lehˬ awˉ lawˉ peuˇ paw la ve nuˇ paˍ lonˉ hkʼe hpeh‸ leh, yawˇ ve awˬ hkaw teˇ hpaˍ lehˬ heh nuˇ awˬ hkaw hkʼe hpeh‸ve yoˬ. Yawˇ ve awˬ hkaw teˇ hpaˍ lehˬ, Maˍnaˍseˍ chaw awˬ hinˉ gʼaˇ leh, Eˇhpaˍrenˍ chaw awˬ meunˍ gʼaˇ hpeh‸ ve yoˬ. Awˬ hkaw oˇ ve teˇ hpaˍ hta‸ cuˇ leh, yawˇ lehˬ awˬ nu ve chaw ceuˬ teˇ hpaˍ hta‸ mvuhˇ leh miˬ leh hkʼa gaˬ guˆ baˬ piˇ ve yoˬ, teh‸ kʼoˆ ve yoˬ.

18Zeˍbuˆlonˍ leh Iˉsaˍhkaˍ awˬ ceuˬ awˬ hkʼaˇ teˇ hpaˍ awˬ lawn yawˇ chi hkʼe kʼoˆ ve yoˬ. Zeˍbuˆlonˍ awˬ ceuˬ awˬ hkʼaˇ teˇ hpaˍ lehˬ, laˇ tsuhˇ gʼuiˬ hkʼaw shu hta‸ tanˇ kaˬ te da‸ leh paw sha la piˇ-oˆ. Iˉsaˍhkaˍ ve awˬ ceuˬ aw hkʼaˇ teˇ hpaˍ htawˇ, yehˬ kʼa hkʼaw hpu shi mawˇ jeˬ cawˬ maˇ la piˇ-oˆ.

19Yawˇ hui lehˬ buiˇshaˆaˉnaˆ chaw teˇ hpaˍ hta‸ yawˇ hui ve hkʼaw pui hkʼoˆ lo kuˬ yuˬleh, da‸ ve cawˇ ve tanˇ tuˬ tanˇ piˇ ve yoˬ. Yawˇ hui lehˬ, hpu shi mawˇ jeˬ teˇ hpaˍ hta‸ laˇ tsuhˇ gʼuiˬ hkʼaw leh, shehˇ shiˍ hkʼaw gʼa ve yoˬ, teh‸ kʼoˆ ve yoˬ.

20Gaˆ awˬ ceuˬ awˬ hkʼaˇ teˇ hpaˍ awˬ lawn yawˇ chi hkʼe kʼoˆ ve yoˬ. Yawˇ hui ve mvuhˇmiˬ hta‸ uiˍ la kʼehˬ la piˇ shehˍ hpaˇ Gʼuiˬsha hta‸ chiˇ mvuh-o. Gaˆ lehˬ la‸ hpeh kʼaˉ hta‸ tzuh‸ suhˍ piˇ tuˬ jaˆ nyi chehˇ ve laˇ caˬ shiˉ hkʼe hpeh‸ ve yoˬ.

21Yawˇ hui lehˬ da‸ jaˇ ve mvuhˇmiˬ hta‸ leuˆ yuˬ leh, awˬ hoˉ awˬ naˬ teˇ hpaˍ htawˇ, mvuhˇmiˬ gʼa taˍ ve yoˬ. Iˉsaˍreˍlaˆ chaw awˬ hoˉ awˬ naˬ teˇ hpaˍ hpawnˬ da‸ chehˇ htaˇ, yawˇ hui lehˬ Gʼuiˬsha ve awˬliˇtawˇhkawˇ teˇ hpaˍ hta‸ na yuˬ ve yoˬ, teh‸ kʼoˆ ve yoˬ.

22Danˍ awˬ ceuˬ awˬ hkʼaˇ teˇ hpaˍ awˬ lawn yawˇ chi hkʼe kʼoˆ ve yoˬ. Danˍ lehˬ laˇ caˬ shiˉ awˬ paˍ haˉ hpeh‸ leh, Baˍshanˍ mvuhˇmiˬ hkʼaw paw tawˆ la ve yoˬ, teh‸ kʼoˆ ve yoˬ.

23Naˍtaˍliˆ awˬ ceuˬ awˬ hkʼaˇ teˇ hpaˍ awˬ lawn yawˇ chi hkʼe kʼoˆ ve yoˬ. Naˍtaˍliˆ hta‸ Gʼuiˬsha da‸ ve awˬ bon na‸ piˇ leh, yawˇ hui ve miˬ tcuhˉ lehˬ Gaˍliˍlehˇ gʼuiˬ po hta‸ te leh awˬ hawˉ hpawˇ lo hkʼa gaˬ hpeh‸ ve yoˬ, teh‸ kʼoˆ ve yoˬ.

24Aˍshaˍ awˬ ceuˬ awˬ hkʼaˇ teˇ hpaˍ awˬ lawn yawˇ chi hkʼe kʼo ve yoˬ. Aˍshaˍ lehˬ awˬ nu ve Iˉsaˍreˍlaˆ awˬ ceuˬ awˬ hkʼaˇ teˇ hpaˍ a‸ kehˉ bon na‸ piˇ ve hta‸ gʼa hkanˍ ve yoˬ. Yawˇ lehˬ awˬ nu ve awˬ viˉ awˬ nyi teˇ hpaˍ ha‸ ve hta‸ gʼa hkanˍ piˇ-oˆ.

25Yawˇ ve mvuhˇmiˬ lehˬ, sho yuˬ te taˍ ve taˍ meu‸ hpe‸ cawˬ leh, hkʼaˬ htaˆ ka‸ gawˬ lehˍ gʼa chehˇ piˇ-oˆ, teh‸ kʼoˆ ve yoˬ.

26Iˉsaˍreˍlaˆ chaw teˇ hpaˍ-oˬ, nawˬ hui ve Gʼuiˬsha hta‸ shuˍ ve awˬ nu ve gʼuiˬsha teˇ gʼaˇ ka‸ maˇ cawˬ. Yawˇ lehˬ awˬ me‸ awˬ hponˇ hkʼa biˇ cawˬ ve hkʼaw, nawˬ hui hta‸ ca ga la tuˬ moˬ hta‸ ciˇ leh laˬ chehˇ ve yoˬ.

27Gʼuiˬsha lehˬ hkʼaˬ htaˆ ka‸ Yawˇ ve la‸ sheh nawˬ hui hta‸ ha‸ shaˉ leh ga laˇ chehˇ ve yoˬ. Nawˬ hui gʼuˇ suhˍ kʼai chehˇ htaˇ, Yawˇ lehˬ nawˬ hui ve canˇ paˍ teˇ hpaˍ hta‸ gʼa‸ kʼoˬ piˇ leh, yawˇ hui hta‸ tiˇ pehˍ piˇ tuˬ nawˬ hui hta‸ kʼoˆ piˇ taˍ peuˍ ve yoˬ.

28Chi hta‸ pa taw, ciˬ gʼuiˬ ya‸ la leh, caˬ shiˍ leh a pehˉ meuˇ gʼuiˬ hkʼa biˇ cawˬ ve mvuhˇmiˬ hkʼaw, Yaˍkoˆ ve awˬ ceuˬ awˬ hkʼaˇ teˇ hpaˍ gawˬ lehˍ gʼa chehˇ ve yoˬ.

29Iˉsaˍreˍlaˆ chaw teˇ hpaˍ-oˬ, nawˬ hui hkʼaˬ ma ha lehˬ tuˬ cawˬ ve le. Gʼuiˬsha ponˬ piˇ taˍ ve nawˬ hui hkʼe ve chaw teˇ ceuˬ ka‸ maˇ cawˬ. Nawˬ hui hta‸ ha‸ shaˉ leh nawˬ hui hta‸ gʼaˇ shehˍ hpaˇ hpeh‸ la piˇ tuˬ, Gʼuiˬsha lehˬ nawˬ hui ve htanˬ tuˬ leh nawˬ hui ve aˉhtaw hpeh‸ ve yoˬ. Nawˬ hui ve canˇ paˍ teˇ hpaˍ lehˬ, nawˬ hui hta‸ ca lawˬ hkawˉ la tuˬ yoˬ. Ya‸ hkʼaˇ, nawˬ hui yawˇ hui hta‸ naˆ nehˆ piˇ tuˬ yoˬ.

← Chapter 32 Jump to: Chapter 34 →