Deuteronomy 28 — Lahu Bible Edited © Thailand Bible Society and Bible Society of Myanmar, 2010, 2020.

1Ya‸ hkʼaˇ, nawˬ hui lehˬ ya‸ nyi ngaˬ piˇ laˇ chehˇ ve awˬliˇtawˇhkawˇ hkʼa peu-eˬ ve hta‸ hkʼa deh‸ na yuˬ leh te chehˇ ve kʼo, Yawˇ lehˬ nawˬ hui hta‸ miˬguiˬ hkʼoˆ cawˬ ve awˬ nu ve chaw ceuˬ teˇ hpaˍ a‸ kehˉ uiˍ la mvuh la piˇ tuˬ yoˬ.

7Gʼuiˬsha lehˬ nawˬ hui hta‸ ca bawˆ la ve canˇ paˍ teˇ hpaˍ hta‸ te luˬ te sheˆ piˇ tuˬ yoˬ. Yawˇ hui lehˬ teˇ hpawˇ lo tiˉ ca lo‸ bawˆ la ve htawˇ, hkʼaˬ hpawˇ chi hpawˇ lo gʼa gʼuiˇ hpaw-e tuˬ yoˬ.

8Gʼuiˬsha lehˬ nawˬ hui te taˍ ve kanˉ hta‸ awˬ bon na‸ laˇ leh, nawˬ hui ve caˬ ciˇ yehˬ hkʼaw caˬ shiˍ hkʼa biˇ cawˬ la piˇ tuˬ yoˬ. Yawˇ nawˬ hui hta‸ piˇ laˇ chehˇ ve mvuhˇmiˬ hkʼaw, Yawˇ nawˬ hui hta‸ awˬ bon na‸ laˇ tuˬ yoˬ.

9Nawˬ hui lehˬ Gʼuiˬsha ve tawˇ hta‸ na yuˬ leh, Yawˇ kʼoˆ ve hkʼe te chehˇ ve kʼo, Yawˇ ka ti‸ te taˍ peuˬ ve hkʼe nawˬ hui hta‸ Yawˇ ve chaw hpeh‸ tcuh laˇ tuˬ yoˬ.

10Oˇ htaˇ, miˬguiˬ hkʼoˆ chehˇ ve chaw hkʼa peu-eˬ, nawˬ hui lehˬ Gʼuiˬsha ve chaw hpeh‸ ve hta‸ gʼa shiˍ gʼa mawˬ leh, nawˬ hui hta‸ kawˆ jaˇ tuˬ yoˬ.

11Gʼuiˬsha lehˬ nawˬ hui ve awˬ puˍ awˬ pi hui hta‸ piˇ tuˬ ka ti‸ te taˍ ve mvuhˇmiˬ oˇ ve hkʼaw, nawˬ hui hta‸ awˬ yaˇ awˬ duˬ, ceˇ caˬ leh awˬ shiˍ awˬ nu maˇ maˇ cawˬ la piˇ tuˬ yoˬ.

12Yawˇ lehˬ awˬ bon hkʼa biˇ cawˬ ve mvuhˇ naw ma hkʼoˆ chehˇ taˍ leh, nawˬ hui awˬ hkʼoˆ lo awˬ yanˇ cawˇ cawˇ mvuhˇ yeˬ laˬ piˇ leh, nawˬ hui te taˍ ve kanˉ teˇ hpaˍ hta‸ awˬ bon na‸ laˇ tuˬ yoˬ. Nawˬ hui shu geh gʼa ca chiˇ caˇ tuˬ ve maˇ heˆ. Shu hta‸ gʼa chiˇ piˇ tuˬ yoˬ.

13Gʼuiˬsha nawˬ hui hta‸ awˬ hoˉ te tcuh laˇ tuˬ yoˬ. Nawˬ hui shu hkʼaˇ suh gʼa‸ paˍ hpeh‸ tuˬ ve maˇ heˆ. Ya‸ nyi ngaˬ nawˬ hui hta‸ kʼoˆ laˇ chehˇ ve awˬliˇtawˇhkawˇ chi teˇ hpaˍ hta‸ hkʼa deh‸ na yuˬ chehˇ ve kʼo, nawˬ hui hkʼaˬ htaˆ ka‸ uiˍ la da‸ la tuˬ yoˬ.

14Maˇ na yuˬ ve taˇ te. Awˬ nu ve gʼuiˬsha teˇ hpaˍ hta‸ oˉ kʼoˍ pui ve ka‸ taˇ te.

15Ya‸ hkʼaˇ, nawˬ hui lehˬ ya‸ nyi ngaˬ kʼoˆ laˇ chehˇ ve Gʼuiˬsha ve tawˇ hta‸ maˇ na yuˬ ve kʼo, haiˬ ve awˬ ceuˬ chi teˇ hpaˍ nawˬ hui awˬ hkʼoˆ gaˬ la tuˬ yoˬ.

16Gʼuiˬsha lehˬ nawˬ hui ve venˇ leh nawˬ hui ve ti mi teˇ hpaˍ hta‸ hkeu tuˬ yoˬ.

17Gʼuiˬsha lehˬ nawˬ hui ve iˉ shiˍ cehˬ teˇ hpaˍ leh hkaoˍmonˇ teˇ hpaˍ hta‸ hkeu tuˬ yoˬ.

18Gʼuiˬsha nawˬ hui hta‸ hkeu leh, awˬ yaˇ awˬ duˬ, awˬ shiˍ awˬ nu leh ceˇ caˬ a ciˉ ceh tiˉ cawˬ tuˬ yoˬ.

19Gʼuiˬsha lehˬ nawˬ hui te ve kanˉ hkʼa peu-eˬ hta‸ hkeu laˇ tuˬ yoˬ.

20Nawˬ hui Gʼuiˬsha hta‸ chiˇ baˬ leh haiˬ ve kanˉ hta‸ te ve kʼo, nawˬ hui luˬ kuiˬ sheˆ kuiˬ lo gaˬ htaˇ hkʼa gaˬ, kawˆ tuˬ dawˇ haˍ tuˬ teˇ hpaˍ Yawˇ nawˬ hui awˬ hkʼoˆ lo gaˬ la piˇ tuˬ yoˬ.

21Chi beu‸ nawˬ hui ca chehˇ tuˬ ve mvuhˇmiˬ hkʼaw, nawˬ hui teˇ gʼaˇ ka‸ maˇ cawˬ taˉ htaˇ hkʼa gaˬ, a naˍ teˇ ceuˬ peuˬ teˇ ceuˬ Yawˇ nawˬ hui awˬ hkʼoˆ gaˬ la piˇ tuˬ yoˬ.

22Yawˇ nawˬ hui awˬ hkʼoˆ lo naˬ beuˬ gaˬ la piˇ leh, nawˬ hui ve caˬ cehˬ teˇ hpaˍ hta‸ te luˬ piˇ tuˬ, mvuhˇ goˇ jaˇ la piˇ tuˬ yoˬ. Nawˬ hui suh htaˇ hkʼa gaˬ, hkanˍ haˍ jaˇ ve awˬ ceuˬ chi teˇ hpaˍ hta‸ gʼa hpuˇ gʼa mawˬ tuˬ yoˬ.

23Mvuhˇ yeˬ maˇ laˬ ve pa taw, miˬ shaˍ teˇ hpaˍ sho hkʼa shuˍ heh kʼai tuˬ yoˬ.

24Nawˬ hui luˬ suh sheˆ suh htaˇ hkʼa gaˬ, Gʼuiˬsha lehˬ mvuhˇ yeˬ awˬ tan je‸ meu-e leh shehˇ shiˍ teˇ hpaˍ peu laˇ tuˬ yoˬ.

25Gʼuiˬsha lehˬ, nawˬ hui ve canˇ paˍ teˇ hpaˍ hta‸ gʼaˇ shehˍ hpaˇ hpeh‸ la piˇ tuˬ yoˬ. Nawˬ hui lehˬ teˇ hpawˇ lo tiˉ ca lo‸ bawˆ chehˇ ve htawˇ, hkʼaˬ hpawˇ chi hpawˇ gʼa gʼuiˇ hpaw-e tuˬ yoˬ. Nawˬ hui oˇ hkʼe hpeh‸ ve hta‸ hkʼa gʼa kaˇ ve chaw hkʼa peu-eˬ kawˆ jaˇ tuˬ yoˬ.

26Nawˬ hui suh-e ve teˇ yanˇ, ngaˆ leh haiˬ ve to nuˇ to shaˆ teˇ hpaˍ nawˬ hui ve awˬ shaˍ hta‸ caˇ leh, chaw teˇ gʼaˇ ka‸ gʼa‸ kʼoˬ piˇ tuˬ ve maˇ heˆ.

27Eˇjiˇtu‸ chaw hui hta‸ te piˇ ve hkʼe, Gʼuiˬsha lehˬ nawˬ hui geh shaˉ chuˇ hta‸ peu laˇ leh, nawˬ hui shaˉ chuˇ hkʼa biˇ tawˆ la tuˬ yoˬ. Nawˬ hui ve awˬ to hkʼoˆ lo, pawˆ lawˆ kʼuˉ hkʼa biˇ cawˬ leh tzuhˆ jaˇ tuˬ yoˬ. Na-e la tuˬ awˬ hkʼaˇ maˇ cawˬ.

28Gʼuiˬsha lehˬ, nawˬ hui hta‸ chaw gʼuˇ hkʼe hpeh‸ la piˇ leh, mehˆ cuˉ piˇ lawˬ tuˬ yoˬ.

29Tanˇ vanˇ htaˇ htawˇ, nawˬ hui lehˬ mehˆ cuˉ paˍ hkʼe gʼa ca htaˇ shoˆ toˇ leh, ya‸ kʼaw hta‸ ca mawˬ tuˬ ve maˇ heˆ. Nawˬ hui lehˬ hkʼaˬ htaˆ ka‸ shu nyiˉ tiˍ taˍ leh hiˉ yuˬ lu yuˬ ve hta‸ gʼa hkanˍ tuˬ yoˬ. Chaw teˇ gʼaˇ ka‸ nawˬ hui hta‸ ga laˇ paˍ cawˬ tuˬ ve maˇ heˆ.

30Nawˬ lehˬ yaˇ miˇ haˉ teˇ gʼaˇ hta‸ heuˆ tuˬ ka ti‸ te taˍ peuˬ ve htawˇ, yaˇ miˇ haˉ oˇ ve awˬ nu ve chaw teˇ gʼaˇ hta‸ kʼaw‸ heuˆ kʼai tuˬ yoˬ. Nawˬ yehˬ te ve htawˇ, yehˬ oˇ ve hkʼaw gʼa chehˇ taˉ tuˬ ve maˇ heˆ. Nawˬ a pehˉ meuˇ hko te taˍ ve htawˇ, a pehˉ meuˇ shiˍ gʼa shaˉ caˇ tuˬ ve maˇ heˆ.

31Nawˬ ve ceˇ teˇ hpaˍ hta‸ nawˬ mehˆ gʼuˇ suhˍ lo shu tiˇ caˇ maˍ laˇ tuˬ yoˬ. Ya‸ hkʼaˇ, nawˬ shaˍ teˇ peˆ ka‸ gʼa caˇ tuˬ ve maˇ heˆ. Nawˬ ve piˉ laˬ teˇ hpaˍ hta‸ nawˬ mehˆ gʼuˇ suhˍ lo sheh veu tuˬ yoˬ. Nawˬ hta‸ kʼaw‸ hkʼaw‸ piˇ laˇ tuˬ ve maˇ heˆ. Shu nawˬ ve yawˬ ehˉ hta‸ yuˬ leh canˇ paˍ teˇ hpaˍ hta‸ chiˇ a‸ piˇ tuˬ yoˬ. Ya‸ hkʼaˇ, nawˬ hta‸ chaw teˇ gʼaˇ ka‸ ga laˇ tuˬ ve maˇ heˆ.

32Nawˬ ve yaˇ paˍ yaˇ miˇ teˇ hpaˍ hta‸ shu yuˬ leh buiˇshaˆaˉnaˆ chaw hui hta‸ chiˇ a‸ piˇ tuˬ yoˬ. Teˇ nyi le le nawˬ ve yaˇ teˇ hpaˍ kʼaw‸ la tuˬ ve hta‸ nawˬ law nyi chehˇ ve mehˆ shiˍ goˇ kʼai peuˬ ve htawˇ, te‸ chiˉ hpeh‸ la tuˬ ve maˇ heˆ.

33Buiˇshaˆaˉnaˆ chaw teˇ hpaˍ lehˬ, nawˬ hui coˇ caˇ leh ti taˍ ve awˬ shiˍ awˬ nu hkʼa peu-eˬ ve hta‸ yuˬ kʼai ve awˬ hkʼoˆ, shu ciˍ yanˍ ve hta‸ ka‸ gʼa hkanˍ tuˬ yoˬ.

34Nawˬ hui gʼa tu‸ gʼa hkanˍ jaˇ ve pa taw, chaw gʼuˇ hkʼe hpeh‸ la tuˬ yoˬ.

35Gʼuiˬsha lehˬ, nawˬ hui ve hkui sheh hkʼoˆ lo naˬ jaˇ leh gu maˇ gʼa ve shaˉ chuˇ tawˆ la piˇ tuˬ yo‸. Shaˉ chuˇ oˇ ve teˇ hpaˍ nawˬ hui ve oˉ kʼoˍ hta‸ te leh hkui sheh lo hkʼa gaˬ cawˬ tuˬ yoˬ.

36Gʼuiˬsha lehˬ, nawˬ hui leh nawˬ hui ve jawˇmawˇ hta‸ yuˬ leh, nawˬ hui ve awˬ puˍ awˬ pi hui teˇ pawˆ ka‸ maˇ ca chehˇ jaw ve mvuhˇmiˬ lo shiˍ kʼai laˇ tuˬ yoˬ. Oˇ kaˬ lo, nawˬ hui lehˬ suhˆ leh haˉ pui shiˍ yuˬ te taˍ ve shaˉ ho‸ teˇ hpaˍ hta‸ oˉ kʼoˍ gʼa pui tuˬ yoˬ.

37Mvuhˇmiˬ oˇ ve hkʼaw chehˇ ve chaw teˇ hpaˍ lehˬ, nawˬ hui hkʼaˬ hkʼe hpeh‸ la peuˬ ve hta‸ gʼa mawˬ leh kawˆ jaˇ tuˬ yoˬ. Yawˇ hui nawˬ hui hta‸ kʼoˆ guiˇ gʼuiˬ guiˇ tuˬ yoˬ.

38Nawˬ hui awˬ shiˍ awˬ nu maˇ maˇ ti taˍ ve htawˇ, a ciˉ ceh tiˉ gʼa gʼeu‸ jaw‸ tuˬ yoˬ. Awˬ lawn kʼo, paˉ ce‸ teˇ hpaˍ caˇ baˬ peuˬ ve pa taw yoˬ.

39Nawˬ hui a pehˉ meuˇ hko te leh hkʼa deh‸ ha‸ shaˉ taˍ ve htawˇ, pfuhˇ shehˍ ma caˇ baˬ peuˬ ve pa taw, nawˬ hui a pehˉ meuˇ gʼuiˬ gʼa dawˬ tuˬ ve maˇ heˆ.

40Nawˬ hui ve mvuhˇmiˬ hkʼaˬ ti chi ti lo shaˍlonˍ cehˬhkʼa biˇ cawˬ tuˬ yoˬ. Ya‸ hkʼaˇ, awˬ shiˍ hkʼa peu-eˬ ce kʼai ve pa taw, shaˍlonˍ chu gʼa tuˬ ve maˇ heˆ.

41Nawˬ hui ve yaˇ paˍ yaˇ miˇ hkʼa biˇ cawˬ ve htawˇ, yawˇ hui hta‸ ma‸ bawˆ kuiˬ lo shu hpeh kʼai ve pa taw, nawˬ hui geh teˇ gʼaˇ ka‸ cawˬ taˉ tuˬ ve maˇ heˆ.

42Nawˬ hui ve iˉ shiˍ cehˬ leh caˬ cehˬ teˇ hpaˍ hta‸ pfuhˇ shehˍ ma caˇ baˬ peuˬ tuˬ yoˬ.

43Nawˬ hui ve mvuhˇmiˬ hkʼaw chehˇ taˍ ve buiˇshaˆaˉnaˆ chaw teˇ hpaˍ awˬ gʼaˇ uiˍ la leh, nawˬ hui lehˬ awˬ gʼaˇ nuˇ kʼai tuˬ yoˬ.

44Yawˇ hui nawˬ hui hta‸ chiˇ laˇ tuˬ ve hpu cawˬ tuˬ yoˬ. Ya‸ hkʼaˇ, nawˬ hui yawˇ hui hta‸ chiˇ piˇ tuˬ ve hpu cawˬ tuˬ ve maˇ heˆ. Awˬ leh meuˇ gaˬ htaˇ, nawˬ hui lehˬ yawˇ hui uˉ peunˍ ve awˬ hawˉ gʼa chehˇ tuˬ yoˬ.

45Nawˬ hui Gʼuiˬsha ve tawˇ hta‸ maˇ na yuˬ ve pa taw, nawˬ hui luˬ suh sheˆ suh htaˇ hkʼa gaˬ, kawˆ tuˬ dawˇ haˍ tuˬ ve awˬ ceuˬ chi teˇ hpaˍ nawˬ hui awˬ hkʼoˆ gaˬ la tuˬ yoˬ.

46Chi ve lehˬ, nawˬ hui leh nawˬ hui ve awˬ ceuˬ awˬ hkʼaˇ teˇ hpaˍ hta‸ Gʼuiˬsha ciˍ yanˍ laˇ ve awˬ heˆ hpeh‸ ve yoˬ.

47Teˇ ceuˬ le le awˬ hkʼaw lo, Gʼuiˬsha nawˬ hui hta‸ bon na‸ laˇ chehˇ ve yoˬ. Ya‸ hkʼaˇ, nawˬ hui lehˬ Yawˇ ve kanˉ hta‸ ha lehˬ ha kʼa maˇ te.

48Chi hta‸ pa taw, nawˬ hui lehˬ Gʼuiˬsha peu laˇ chehˇ ve canˇ paˍ teˇ hpaˍ ve awˬ ceˬ gʼa te leh, awˍ meu‸ ve, iˉ kaˆ shiˉ ve, veu‸ kʼaˇ maˇ cawˬ ve, chi teˇ hpaˍ hta‸ gʼa hkanˍ tuˬ yoˬ. Nawˬ hui luˬ peuˬ sheˆ peuˬ htaˇ hkʼa gaˬ, Gʼuiˬsha nawˬ hui hta‸ hehnˇ chaweh fawˉ mehˍ laˇ tuˬ yoˬ.

49Nawˬ hui a ciˉ ka‸ maˇ shiˍ ve vuiˇ kuiˬ lo chehˇ ve chaw ceuˬ teˇ hpaˍ hta‸ Gʼuiˬsha nawˬ hui geh peu laˇ tuˬ yoˬ.

50Yawˇ hui nyi ma uiˍ jaˇ leh, chaw mawˇ yaˇ ehˉ hkʼaˬ ve teˇ gʼaˇ hta‸ maˇ kʼoˆ, ha kʼaˉ piˇ tuˬ ve maˇ heˆ.

51Yawˇ hui lehˬ, nawˬ hui ve ceˇ leh awˬ shiˍ awˬ nu teˇ hpaˍ hta‸ caˇ peuˬ sheˬ ve pa taw, nawˬ hui gʼa meu‸ jehˇ tuˬ yoˬ. Nawˬ hui awˬ pon caˬ shiˍ, a pehˉ meuˇ gʼuiˬ, shaˍlonˍ chu, nuˇ, yawˬ teˇ hpaˍ teh taˉ laˇ tuˬ ve maˇ heˆ. Nawˬ hui gʼa suh tuˬ yoˬ.

52Gʼuiˬsha nawˬ hui hta‸ piˇ laˇ taˍ ve venˇ teˇ maˬ le le hta‸ yawˇ hui bawˆ yuˬ leh, nawˬ hui gʼaˇ va chehˇ ve mvuh jaˇ yeˬ jaˇ ve ta‸ yehˬ teˇ hpaˍ paˆ kʼai tuˬ yoˬ.

53Canˇ paˍ teˇ hpaˍ nawˬ hui ve venˇ hta‸ hoˆ tiˍ taˍ ve teˇ yanˇ, nawˬ hui lehˬ awˍ meu‸ jaˇ ve pa taw, Gʼuiˬsha nawˬ hui hta‸ piˇ taˍ ve yaˇ teˇ hpaˍ hta‸ htawˇ tiˇ caˇ tuˬ yoˬ.

54Chaw uiˍ chaw mvuh teˇ hpaˍ htawˇ meu‸ jaˇ kaˆ jaˇ ve pa taw, a shu yawˇ ve yaˇ hta‸ tiˇ caˇ tuˬ yoˬ.

55Ya‸ hkʼaˇ, yawˇ ve awˬ viˉ awˬ nyi, yawˇ ve awˬ miˇ ma leh awˬ nu ve chaw teˇ hpaˍ hta‸ caˍ piˇ tuˬ ve maˇ heˆ.

56Paw sha jaˇ leh ya‸ kʼaw maˇ juˇ toˇ jaw ve awˬ me‸ awˬ hponˇ cawˬ ve yaˇ miˇ teˇ hpaˍ htawˇ, oˇ hkʼe hpeh‸ la tuˬ yoˬ.

57Canˇ paˍ teˇ hpaˍ yawˇ chehˇ taˍ ve venˇ hta‸ ca hoˆ la ve teˇ yanˇ, awˍ meu‸ jaˇ ve pa taw paw la gehˇ sheˍ ve yawˇ ve yaˇ hta‸ tiˇ caˇ tuˬ yoˬ. Yawˇ ve awˬ hpawˇ, leh awˬ nu ve chaw teˇ hpaˍ hta‸ caˍ piˇ tuˬ ve maˇ heˆ.

58Li‸ daw chi hkʼaw bvuh‸ taˍ ve awˬliˇtawˇhkawˇ teˇ hpaˍ hta‸ nawˬ hui maˇ na yuˬ leh, anˇ tuˬ uiˍ ve Gʼuiˬsha ve awˬ meh hta‸ nawˬ hui maˇ yawˆ yan ve kʼo,

59Yawˇ lehˬ mehˉ kʼai maˇ gʼa ve naˬ beuˬ teˇ hpaˍ, nawˬ leh nawˬ ve awˬ ceuˬ awˬ hkʼaˇ teˇ hpaˍ awˬ hkʼoˆ lo gaˬ la piˇ tuˬ yoˬ.

60Eˇjiˇtu‸ mvuhˇmiˬ hkʼaw nawˬ hui gʼa mawˬ jaw ve a naˍ teˇ hpaˍ, Yawˇ nawˬ hui awˬ hkʼoˆ lo gaˬ la piˇ leh nawˬ hui teˇ pawˆ ka‸ na-e la tuˬ ve maˇ heˆ.

61Awˬliˇtawˇhkawˇ li‸ daw chi ve hkʼaw maˇ bvuh‸ taˍ ve awˬ nu ve a naˍ leh naˬ beuˬ teˇ hpaˍ htawˇ, Yawˇ nawˬ hui awˬ hkʼoˆ lo gaˬ la piˇ leh, nawˬ hui luˬ kʼai sheˆ kʼai tuˬyoˬ.

62Nawˬ hui lehˬ, mvuhˇ naw ma hkʼoˆ lo cawˬ ve meu‸ keu shiˍ hkʼa shuˍ maˇ jaˇ ve htawˇ, Gʼuiˬsha ve tawˇ hta‸ maˇ na yuˬ ve pa taw, nawˬ hui a ciˉ ceh tiˉ cawˬ taˉ tuˬ yoˬ.

63Gʼuiˬsha nawˬ hui hta‸ da‸ la uiˍ la piˇ gaˇ ve nyi ma cawˬ ve hkʼe, nawˬ hui hta‸ te luˬ te sheˆ piˇ gaˇ ve nyi ma htawˇ cawˬ ve yoˬ. Nawˬ hui ca chehˇ tuˬ ve mvuhˇmiˬ oˇ ve hkʼaw, nawˬ hui lehˬ gʼawˬ baˬ ve hta‸ gʼa hkanˍ tuˬ yoˬ.

64Gʼuiˬsha nawˬ hui hta‸ mvuhˇ leh miˬ leh hkʼa gaˬ hpaˆ da‸ kʼai piˇ lawˬ leh, nawˬ hui ve awˬ puˍ awˬ pi hui teˇ pawˆ ka‸ oˉ kʼoˍ maˇ pui jaw ve, suhˆ leh haˉ pui shiˍ yuˬ te taˍ ve shaˉ ho‸ teˇ hpaˍ hta‸ oˉ kʼoˍ gʼa pui tuˬ yoˬ.

65Nawˬ hui gawˬ lehˍ gʼa chehˇ tuˬ ve maˇ heˆ. Nawˬ hui ve mvuhˇmiˬ teh‸ kʼoˆ tuˬ ve mvuhˇmiˬ maˇ cawˬ. Gʼuiˬsha lehˬ nawˬ hui hta‸ dawˇ haˍ piˇ, dawˇ maˇ tawˆ piˇ, leh nyi ma luˬ jaˇ piˇ lawˬ tuˬ yoˬ.

66Nawˬ hui lehˬ hkʼaˬ htaˆ ka‸ kawˆ kuiˬ dawˇ haˍ kuiˬ hkʼaw gʼa chehˇ leh, teˇ nyi teˇ haˉ le suh ve teˇ ceuˬ hta‸ gʼa kawˆ jehˇ chehˇ tuˬ yoˬ.

67Nawˬ hui hkʼa gʼa mawˬ ve awˬ ceuˬ hta‸ kawˆ ve nyi ma cawˬ tuˬ yoˬ. Mvuhˇ shawˉ htaˇ, nawˬ hui lehˬ mvuhˇ haˆ haˆ kʼaw‸ hpeu‸ la tcuh piˇ gaˇ leh, mvuhˇ hpeu‸ la htaˇ mvuhˇ haˆ haˆ kʼaw‸ htiˇ la tcuh piˇ gaˇ tuˬ yoˬ.

68Gʼuiˬsha nawˬ hui hta‸ Eˇjiˇtu‸ mvuhˇmiˬ lo maˇ gʼa kʼaw‸ kʼo‸-e teh‸ kʼoˆ taˍ peuˬ ve htawˇ, Yawˇ lehˬ nawˬ hui hta‸ haw lo‸ kʼoˍ hkʼaw keu leh Eˇjiˇtu‸ mvuhˇmiˬ lo kʼaw‸ kʼo‸-e tcuh laˇ tuˬ yoˬ. Oˇ kaˬ lo nawˬ hui lehˬ a shu yawˇ awˬ to hta‸ awˬ ceˬ hkʼa shuˍ chiˇ hawˇ tuˬ yoˬ. Ya‸ hkʼaˇ, chaw teˇ gʼaˇ ka‸ nawˬ hui hta‸ vuiˬ gaˇ tuˬ ve maˇ heˆ, teh‸ Moˉseˍ Iˉsaˍreˍlaˆ chaw hui hta‸ kʼoˆ piˇ ve yoˬ.