Deuteronomy 25

Lahu Bible Edited © Thailand Bible Society and Bible Society of Myanmar, 2010, 2020.

← Chapter 24 Jump to: Chapter 26 →

1Iˉsaˍreˍlaˆ chaw nyiˇ gʼaˇ ya‸ da‸ leh shaˉ nanˉ lo kʼai ve hkʼaw, teˇ gʼaˇ lehˬ te‸ chiˉ ya‸ kuiˬ maˇ cawˬ. Ya‸ hkʼaˇ, teˇ gʼaˇ leh venˇbaˆ cawˬ ve yoˬ.

2Venˇbaˆ cawˬ ve chaw oˇ ve hta‸ jaw‸ hpehˇ tuˬ tawˇ piˇ ve kʼo, chaw oˇ ve hta‸ miˬ chaˇ hkʼoˆ lo boˆ zuh‸ tcuh leh gʼa jaw‸ hpehˇ piˇ ve yoˬ. Yawˇ te ya‸ ve venˇbaˆ uiˍ ve i ve hta‸ nyi leh, keunˍ da‸ ve hkʼe gʼa jaw‸ ve yoˬ.

3Maˇ jaˇ ve awˇ chi hkʼe awˬ hkʼoˆ maˇ gʼa jaw‸. Oˇ ve a‸ kehˉ jaw‸ ve kʼo, yawˇ hta‸ taˍ nehˬ piˇ ve hkʼe hpeh‸ ve yoˬ.

4Caˬ naˆ chehˇ ve nuˇ maw‸ kʼaw hta‸ nawˬ maˇ gʼa hoˆ taˍ.

5Teˇ geh chehˇ taˍ ve awˬ viˉ awˬ nyi teˇ gʼaˇ gʼaˇ suh kʼai ve kʼo, yawˇ ve awˬ miˇ ma awˬ nu ve chaw hta‸ maˇ gʼa heuˆ tcuh. Yawˇ ve awˬ nyi paˍ lehˬ, yawˇ awˬ viˉ paˍ miˇ ma hta‸ gʼa kʼaw‸ heuˆ ve yoˬ.

6Yawˇ huiˉ maˬ geh lo awˉ lawˉ peuˇ paw la ve yaˇ paˍ lehˬ, yawˇ awˬ viˉ paˍ ve yaˇ teh‸ gʼa shawˍ piˇ ve yoˬ. Oˇ hkʼe te ve hkʼaw, yawˇ ve awˬ ceuˬ awˬ hkʼaˇ Iˉsaˍreˍlaˆ chaw awˬ hkʼaw lo gʼa cawˬ la piˇ ve yoˬ.

7Ya‸ hkʼaˇ, yawˇ ve awˬ nyi paˍ lehˬ, yaˇ miˇ oˇ ve hta‸ maˇ heuˆ gaˇ ve kʼo, yaˇ miˇ oˇ ve lehˬ venˇ hkʼaw chehˇ taˍ ve awˬ hoˉ awˬ naˬ teˇ hpaˍ geh kʼai leh, yawˇ hui hta‸ chi hkʼe gʼa kʼoˆ piˇ ve yoˬ. Ngaˬ hpawˇ ve awˬ nyi paˍ lehˬ, yawˇ te cawˇ ve kanˉ hta‸ maˇ te. Iˉsaˍreˍlaˆ chaw awˬ hkʼaw lo yawˇ ve awˬ viˉ paˍ ve awˬ ceuˬ awˬ hkʼaˇ cawˬ la tuˬ maˇ te law, teh‸ yawˇ hui hta‸ gʼa kʼoˆ piˇ ve yoˬ.

8Oˇ htaˇ, awˬ hoˉ awˬ naˬ oˇ ve teˇ hpaˍ lehˬ, awˬ nyi paˍ oˇ ve hta‸ kuˬ leh gʼa na nyi ve yoˬ. Yawˇ lehˬ yaˇ miˇ oˇ ve hta‸ maˇ heuˆ gaˇ, teh‸ kʼoˆ ve kʼo,

9yaˇ miˇ oˇ ve lehˬ awˬ hoˉ awˬ naˬ oˇ ve teˇ hpaˍ gʼuˇ suhˍ lo kʼai leh, chaw oˇ ve hpaˇ ve hkuiˉ nuˆ teˇ paˉ hta‸ kʼehˆ yuˬ peuˬ hkʼaw‸ nawˉ, yawˇ ve mehˆ hpfuhˇ hkʼaw ciˉgʼuiˇ hpe‸ keu leh, A shu yawˇ ve awˬ viˉ paˍ awˬ pon awˬ ceuˬ awˬ hkʼaˇ cawˬ la piˇ tuˬ maˇ te gaˇ ve chaw lehˬ, chi hkʼe gʼa hkanˍ ve yoˬ, teh‸ yawˇ hta‸ gʼa kʼoˆ piˇ ve yoˬ.

10Iˉsaˍreˍlaˆ mvuhˇmiˬ hkʼaˬ ti chi ti lo chaw oˇ ve hpaˇ hta‸, Shu hkuiˉ nuˆ kʼehˆ baˬ piˇ ve hta‸ gʼa hkanˍ ve chaw, teh‸ shu kʼoˆ da‸ kʼai tuˬ yoˬ.

11Chaw nyiˇ gʼaˇ ya‸ da‸ leh, teˇ gʼaˇ ve awˬ miˇ ma lehˬ yawˇ ve awˬ hpawˇ hta‸ ca ga piˇ ve hkʼaw, awˬ nu ve chaw teˇ gʼaˇ ve nyiˍ hta‸ gʼa htawˇ heuˆ ve kʼo,

12yaˇ miˇ oˇ ve hta‸ taˇ ha kʼaˉ chehˇ. Yawˇ ve la‸ sheh hta‸ gʼa tawˆ baˬ piˇ ve yoˬ.

13Nawˬ hui mawˇ hawˇ mawˇ pa ve hkʼaw, maˇ biˇ ve ma‸ cawehˬ shiˍ leh, maˇ cawˇ ve tehˆ tuˬ hta‸ maˇ gʼa yehˇ.

15Nawˬ hui Gʼuiˬsha piˇ laˇ taˍ ve mvuhˇmiˬ oˇ ve hkʼaw maw maw gʼa chehˇ tuˬ, biˇ ve ma‸ cawehˬ shiˍ leh, cawˇ ve tehˆ tuˬ hta‸ ceh tiˉ yehˇ-oˆ.

16Heˍ caˇ ve chaw hta‸ Gʼuiˬsha canˇ ve yoˬ.

17Nawˬ hui Eˇjiˇtu‸ mvuhˇmiˬhkʼaw tawˆ la chehˇ htaˇ, Aˍmaˍlehˆ chaw nawˬ hui hta‸ hkʼaˬ hkʼe te laˇ taˍ peuˬve hta‸ dawˇ nawˇ-oˆ.

18Yawˇ hui lehˬ, Gʼuiˬsha hta‸ kawˆ ve nyi ma maˇ cawˬ. Nawˬ hui gʼaˇ heuˬ chehˇ ve teˇ yanˇ, yawˇ hui lehˬ nawˬ hui hkʼaˇ suh gʼa‸ laˬ chehˇ ve chaw hkʼa peu-eˬ ve hta‸ tiˇ pehˍ piˇ ve yoˬ.

19Chi hta‸ pa taw, mvuhˇmiˬ oˇ ve Gʼuiˬsha nawˬ hui hta‸ piˇ laˇ leh, nawˬ hui gawˬ lehˍ gʼa chehˇ ve teˇ yanˇ, chaw teˇ gʼaˇ ka‸ yawˇ hui hta‸ maˇ gʼa kʼaw‸ dawˇ nawˇ tuˬ, Aˍmaˍlehˆ chaw hkʼa peu-eˬ ve hta‸ tiˇ pehˍ piˇ-oˆ.

← Chapter 24 Jump to: Chapter 26 →