Deuteronomy 21

Lahu Bible Edited © Thailand Bible Society and Bible Society of Myanmar, 2010, 2020.

← Chapter 20 Jump to: Chapter 22 →

1G’uiˬsha piˇ laˇ ve mvuhˇmiˬ hk’aw, shu tiˇ pehˍ taˍve chaw teˇ g’aˇ hta‸ nawˬ hui g’a mawˬ leh, tiˇ pehˍ shehˍ hpaˇ hta‸ maˇ shiˍ ve k’o,

2nawˬ hui ve awˬ hoˉ awˬ naˬ leh suhˉ jehˬ shehˍ hpaˇ teˇ hpaˍ lehˬ oˇ kaˬ lo k’ai leh, chaw suh oˇ ve venˇ hk’aˬ ve teˇ maˬ hta‸ neˇ da‸ jaˇ ve hta‸ g’a shiˍ tuˬ hk’a deh‸ g’a tehˆ nyi ve yoˬ.

3Oˇ hk’e te peuˬ hk’aw‸ nawˉ, chaw suh oˇ ve hta‸ neˇ da‸ jaˇ ve venˇ hk’aw chehˇ ve awˬ hoˉ awˬ naˬ teˇ hpaˍ lehˬ, teˇ pawˆ ka‸ kanˉ maˇ tcuh jaw sheˍ ve nuˇ ma haˉ teˇ hkeh hta‸ yuˬ leh,

4teˇ pawˆ ka‸ maˇ fiˍ ve iˉ kaˆ lawˬ cawˬ kuiˬ leh, shu teˇ pawˆ ka‸ maˇ te caˇ jaw sheˍ ve chehˇ kuiˬ lo yuˬ k’ai leh, oˇ kaˬ lo nuˇ ma haˉ ve k’awˍ peˍ hta‸ g’a awˉ hteh piˇ ve yoˬ.

5Leˍviˆ chaw paw hkuˇ teˇ hpaˍ htawˇ oˇ kaˬ lo g’a k’ai ve yoˬ. Awˬ lawn k’o, yawˇ hui lehˬ chi hk’e ve haˍ ve kanˉ hta‸ suhˉ g’a jehˬ piˇ tuˬ ve awˬ hk’oˆ, G’uiˬsha ve kanˉ hta‸ te tuˬ leh, Yawˇ ve awˬ meh hk’aw bon na‸ piˇ tuˬ G’uiˬsha leuˆ yuˬ taˍ ve chaw hpeh‸ ve pa taw yoˬ.

6Chaw suh oˇ ve hta‸ neˇ da‸ jaˇ ve venˇ hk’aw chehˇ taˍ ve awˬ hoˉ awˬ naˬ teˇ hpaˍ lehˬ, nuˇ ma haˉ oˇ ve awˬ hk’oˆ lo a shu yawˇ ve la‸ sheh tsuhˇ leh chi hk’e g’a k’oˆ ve yoˬ.

7Ngaˬ hui lehˬ chaw chi hpaˇ hta‸ maˇ tiˇ pehˍ. A shu teˇ g’aˇ tiˇ pehˍ ve hta‸ ka‸ ngaˬ hui maˇ shiˍ.

8G’uiˬsha-oˬ, nawˬ Eˇjiˇtu‸ mvuhˇmiˬ hk’aw htaiˍ hk’aw‸ piˇ taˍ ve Iˉsaˍreˍlaˆ chaw chi teˇ hpaˍ ve venˇbaˆ hta‸ a ciˉ hpehˇ piˇ-oˆ. Chaw chi teˇ g’aˇ suh-e ve ngaˬ hui awˬ hk’oˆ venˇbaˆ taˇ gaˬ la piˇ-oˆ, teh‸ g’a k’oˆ ve yoˬ.

9G’uiˬsha k’oˆ taˍ ve hk’e nawˬ hui hk’a deh‸ na yuˬ leh te chehˇ ve k’o, chaw chi hpaˇ suh-e ve venˇbaˆ nawˬ hui awˬ hk’oˆ lo gaˬ la tuˬ ve maˇ heˆ.

10G’uiˬsha nawˬ hui hta‸ ma‸ bawˆ g’aˇ piˇ lawˬ leh, nawˬ hui chaw laiˉ g’aˇ hta‸ hpeh g’a ve hk’aw,

11awˬ hkiˇ awˬ naˬ da‸ ve yaˇ miˇ hta‸ htawˇ nawˬ hui g’a mawˬ leh heuˆ gaˇ tuˬ yoˬ.

12Yaˇ miˇ oˇ ve hta‸ nawˬ ve yehˬ lo shiˍ k’ai leh, uˉ hkeh mvuh leh la‸ shiˍ k’uˉ teˇ hpaˍ hta‸ nuˆ baˬ piˇ-oˆ.

13Yawˇ hta‸ veu‸ k’aˇ awˬ suhˉ k’aw‸ htaiˍ piˇ-oˆ. Yawˇ lehˬ nawˬ ve yehˬ hk’aw chehˇ taˍ leh, teˇ ha pa hk’a gaˬ yawˇ ve awˬ pa aw e pon dawˇ haˍ leh g’a paˆ hawˬ chehˇ ve yoˬ. Oˇ hk’e te peuˬ hk’aw‸ nawˉ, nawˬ yawˇ hta‸ heuˆ hpeh‸ ve yoˬ.

14Awˬ hk’aw‸ nawˉ, nawˬ yawˇ hta‸ maˇ kaw‸ heuˆ gaˇ ve k’o, yawˇ hta‸ hk’e leˇ g’a tawˆ k’ai tcuh ve yoˬ. Nawˬ yawˇ hta‸ g’a heuˆ peuˬ ve pa taw, yawˇ hta‸ awˬ ceˬ ma hk’e shawˍ leh hawˇ caˇ tuˬ a hkaw-anˬ maˇ cawˬ.

15Chaw teˇ g’aˇ awˬ miˇ ma nyiˇ g’aˇ cawˬ leh, nyiˇ g’aˇ g’aˇ ka‸ yaˇ paˍ paw la taˍ ve yoˬ. Ya‸ hk’aˇ, yaˇ paˍ uiˍ teˇ g’aˇ lehˬ yawˇ ha‸ jaˇ ve awˬ miˇ ma geh paw la taˍ ve yaˇ maˇ heˆ.

16Yawˇ ve yaˇ teˇ hpaˍ hta‸ awˬ shinˉ pehˬ piˇ ve teˇ yanˇ, yawˇ ha‸ jaˇ ve awˬ miˇ ma ve yaˇ paˍ hta‸ yaˇ paˍ uiˍ ve awˬ shinˉ piˇ ve maˇ g’a te.

17Yawˇ maˇ ha‸ ve awˬ miˇ ma teˇ g’aˇ ve yaˇ hpeh‸ ve htawˇ, yawˇ lehˬ yaˇ paˍ uiˍ hpeh‸ ve k’o, yawˇ hta‸ awˬ shinˉ nyiˇ pun g’a piˇ ve yoˬ. Awˬ pa lehˬ, yaˇ paˍ uiˍ hta‸ g’a taˍ uiˍ leh, yawˇ g’a keunˍ ve awˬ shinˉ g’a piˇ ve yoˬ.

18Awˬ pa teˇ g’aˇ lehˬ, yawˇ ve yaˇ paˍ haiˬ jaˇ leh hk’aˬ ma jaw‸ maˍ piˇ ve htawˇ, yawˇ ve tawˇ hta‸ maˇ na yuˬ ve k’o,

19yawˇ lehˬ yaˇ oˇ ve hta‸ venˇ hk’aw ve awˬ hoˉ awˬ naˬ teˇ hpaˍ geh g’a shiˍ k’ai piˇ ve yoˬ.

20Yaˇ chi lehˬ, ngaˬ maˍ piˇ ve tawˇ hta‸ maˇ na yuˬ. Yawˇ lehˬ hpu hta‸ hk’e leˇ yehˇ baˬ leh, tzuhˬ bvuhˆ paˍ hpeh‸ chehˇ ve yoˬ, teh‸ yawˇ hui hta‸ g’a k’oˆ piˇ ve yoˬ.

21Oˇ htaˇ, awˬ hoˉ awˬ naˬ teˇ hpaˍ yawˇ hta‸ haˉ pui g’a baˬ pehˍ ve yoˬ. Haiˬ ve awˬ ceuˬ chi hta‸ chi hk’e g’a te yuˬ baˬ ve yoˬ. Awˬ lawn chi hta‸ hk’a g’a kaˇ ve Iˉsaˍreˍlaˆ chaw hk’a peu-eˬ kawˆ jaˇ tuˬ yoˬ.

22Chaw teˇ g’aˇ te ya‸ ve pa taw, yawˇ hta‸ aˉ caˆ hkeh hpeh yu pehˍ piˇ ve k’o, yawˇ hta‸ mehˆ muiˉ naˆ la htaˇ hk’a gaˬ maˇ g’a teh taˍ.

23Oˇ ve teˇ nyi tiˉ hk’aw g’a ca tuˍ piˇ ve yoˬ. Awˬ lawn k’o, chaw hta‸ hpeh yu pehˍ ve teˇ ceuˬ lehˬ, mvuhˇmiˬ hk’oˆ lo G’uiˬsha hkeu ve hta‸ gaˬ la piˇ lawˬ ve yoˬ. G’uiˬsha nawˬ hui hta‸ piˇ laˇ taˍ ve mvuhˇmiˬ maˇ g’a cha‸ chiˆ k’ai tuˬ, chaw oˇ ve hta‸ g’a tuˍ piˇ ve yoˬ.

← Chapter 20 Jump to: Chapter 22 →