Deuteronomy 9

Lahu Bible Edited © Thailand Bible Society and Bible Society of Myanmar, 2010, 2020.

← Chapter 8 Jump to: Chapter 10 →

1Iˉsaˍreˍlaˆ chaw hui-oˬ, na sheˍ. Ya‸ nyi nawˬ hui Yawˇdanˍ lawˬ hta‸ hkanˍ leh, nawˬ hui a‸ kehˉ awˬ gʼaˇ uiˍ ve chaw hui ve mvuhˇmiˬ hkʼaw gʼa lo‸-e tuˬ yoˬ. Yawˇ hui ve venˇ teˇ hpaˍ uiˍ jaˇ leh, lanˇ venˇ teˇ hpaˍ htawˇ mvuh jaˇ ve yoˬ.

2Yawˇ hui ve awˬ to ka‸ uiˍ jaˇ leh awˬ gʼaˇ uiˍ jaˇ ve yoˬ. Yawˇ hui lehˬ chaw lonˉ teˇ hpaˍ hpeh‸ leh, chaw teˇ gʼaˇ ka‸ yawˇ hui hta‸ tawˍ da‸ maˇ gʼaˇ ve hta‸ nawˬ hui gʼa kaˇ chehˇ ve yoˬ.

3Ya‸ hkʼaˇ, Gʼuiˬsha lehˬ to‸ baˬ kʼai chehˇ ve aˬ miˍ hkʼa shuˍ, nawˬ hui gʼuˇ suhˍ lo kʼai chehˇ ve hta‸ nawˬ hui gʼa mawˬ tuˬ yoˬ. Nawˬ hui awˬ gʼuˇ suhˍ lo kʼai chehˇ htaˇ, Yawˇ ka ti‸ te taˍ peuˬ ve hkʼe nawˬ hui mvuhˇmiˬ oˇ ve hta‸ gʼa tuˬ, Yawˇ lehˬ chaw oˇ ve teˇ hpaˍ hta‸ te luˬ piˇ tuˬ yoˬ.

4Gʼuiˬsha lehˬ nawˬ hui awˬ pon chaw oˇ ve teˇ hpaˍ hta‸ gʼa‸ kʼoˬ laˇ ve teˇ yanˇ, nawˬ hui keunˍ ve pa taw Yawˇ nawˬ hui hta‸ oˇ kaˬ lo shiˍ veu laˇ ve yoˬ, teh‸ taˇ kʼoˆ. Oˇ hkʼe maˇ heˆ. Gʼuiˬsha chaw oˇ ve teˇ hpaˍ hta‸ gʼa‸ kʼoˬ piˇ ve lehˬ, yawˇ hui haiˬ jaˇ ve pa taw yoˬ.

5Nawˬ hui da‸ jaˇ leh cawˇ ve kanˉ hta‸ tiˉ te ve pa taw, Gʼuiˬsha nawˬ hui hta‸ mvuhˇmiˬ oˇ ve hkʼaw chehˇ tcuh laˇ ve maˇ heˆ. Chaw oˇ ve teˇ hpaˍ hta‸ Yawˇ gʼa‸ kʼoˬ piˇ ve lehˬ, yawˇ hui haiˬ jaˇ leh, Gʼuiˬsha Yawˇ Aˍbraˍhanˍ, Iˉcaˆ leh Yaˍkoˆ hui hta‸ ka ti‸ gʼa te piˇ taˍ peuˬ ve hta‸ pa taw yoˬ.

6Nawˬ hui keunˍ ve chaw hpeh‸ ve pa taw, hkuiˇ jaˇ da‸ jaˇ ve mvuhˇmiˬ oˇ ve Gʼuiˬsha nawˬ hui hta‸ piˇ laˇ ve maˇ heˆ, teh‸ hkʼa deh‸ dawˇ nawˇ taˍ-o‸. Nawˬ hui lehˬ nyi ma heh jaˇ ve chaw hpeh‸ ve yoˬ.

7Heh puiˉ hkʼaw lo nawˬ hui Gʼuiˬsha nyi ma zuhˆ tuˬ hkʼaˬ hkʼe te piˇ taˍ peuˬ ve hta‸ hkʼaˬ htaˆ ka‸ dawˇ nawˇ taˍ-o‸. Eˇjiˇtu‸ mvuhˇmiˬ hkʼaw tanˬ tawˆ la ve teˇ nyi hta‸ te leh ya‸ nyi choˬ kaˬ lo gaˬ la htaˇ hkʼa gaˬ, nawˬ hui Gʼuiˬsha hta‸ kʼaw‸ hpfuhˆ chehˇ ve yoˬ.

8Siˉnaˆ hkʼaw paˇ lo htawˇ, nawˬ hui Gʼuiˬsha hta‸ nyi ma zuhˆ tuˬ te piˇ ve yoˬ. Nawˬ hui hta‸ te luˬ te sheˆ piˇ law‸ law‸ Gʼuiˬsha nyi ma zuhˆ ve yoˬ.

9Gʼuiˬsha nawˬ hui hta‸ piˇ taˍ ve awˬliˇtawˇhkawˇ bvuh‸ taˍ ve haˉ pui baˉ teˇ hpaˍ hta‸ ca yuˬ tuˬ, ngaˬ hkʼaw hkʼoˆ lo taˆ-e ve yoˬ. Ngaˬ oˇ kaˬ lo 40 nyi 40 haˉ, te‸ chiˉ maˇ caˇ maˇ dawˬ leh chehˇ taˍ ve yoˬ.

10Oˇ ve hkʼaw‸ nawˉ, Gʼuiˬsha Yawˇ bvuh‸ taˍ ve haˉ pui baˉ nyiˇ maˬ ngaˬ hta‸ pe‸ laˇ ve yoˬ. Haˉ pui baˉ oˇ ve teˇ hpaˍ awˬ hkʼoˆ lo, nawˬ hui hkʼaw chi ve awˬ hkuiˉ puiˍ lo huˉ chehˇ htaˇ, Yawˇ aˬ miˍ ha hkʼaw chehˇ taˍ leh nawˬ hui hta‸ kʼoˆ laˇ peuˬ ve awˬliˇtawˇhkawˇ oˇ ve teˇ hpaˍ bvuh‸ taˍ ve yoˬ.

1140 nyi 40 haˉ ponˬ peuˬ hkʼaw‸ nawˉ, awˬliˇtawˇhkawˇ bvuh‸ taˍ ve haˉ pui baˉ oˇ ve nyiˇ maˬ, Gʼuiˬsha ngaˬ hta‸ pe‸ laˇ ve yoˬ.

12Oˇ ve hkʼaw‸ nawˉ, Gʼuiˬsha ngaˬ hta‸ chi hkʼe kʼoˆ laˇ ve yoˬ. Nawˬ haˆ haˆ kʼaw‸ ya‸-e loˬ. Awˬ lawn kʼo, nawˬ Eˇjiˇtu‸ mvuhˇmiˬ hkʼaw shiˍ tawˆ la piˇ taˍ ve chaw oˇ ve teˇ hpaˍ nyi ma kʼaw‸ pa leh, haiˬ ve kanˉ te chehˇ taˍ peuˬ. Yawˇ hui lehˬ ngaˬ ve tawˇ hta‸ ponˬ leuˉ leh, shaˉ ho‸ teˇ maˬ te teh taˍ peuˬ.

13Chaw chi teˇ hpaˍ ve nyi ma hkʼaˬ ma heh jaˇ ve hta‸ ngaˬ shiˍ taˍ ve yoˬ.

14Nawˬ ngaˬ hta‸ te‸ chiˉ taˇ kʼoˆ laˇ-oˆ. Chaw teˇ gʼaˇ ka‸ yawˇ hui hta‸ maˇ gʼa kʼaw‸ dawˇ nawˇ tuˬ, ngaˬ yawˇ hui hta‸ te luˬ te sheˆ piˇ tuˬ yoˬ. Oˇ ve hkʼaw‸ nawˉ, ngaˬ nawˬ hta‸ yawˇ hui a‸ kehˉ awˬ gʼaˇ uiˍ jaˇ ve chaw ceuˬ lonˉ teˇ ceuˬ ve awˬ pa hpeh‸ la piˇ tuˬ yoˬ, teh‸ ngaˬ hta‸ kʼoˆ laˇ ve yoˬ.

15Hkʼe te leh, ngaˬ awˬliˇtawˇhkawˇ bvuh‸ taˍ ve haˉ pui baˉ oˇ ve nyiˇ maˬ hta‸ yuˬ leh hkʼaw hkʼoˆ lo ya‸ la ve yoˬ. Hkʼaw hkʼoˆ lo aˬ miˬ ha ba tawˆ la chehˇ ve yoˬ.

16Nawˬ hui lehˬ Gʼuiˬsha piˇ taˍ ve tawˇ hta‸ ponˬ leuˉ leh, shi nuˇ shaˉ ho‸ teˇ maˬ te teh taˍ laˇ ve hta‸ ngaˬ gʼa mawˬ ve yoˬ.

17Hkʼe te leh, nawˬ hui mehˆ gʼuˇ suhˍ ngaˬ haˉ pui baˉ oˇ ve nyiˇ maˬ hta‸ miˬ chaˇ hkʼoˆ lo baˬ peu leh hkoˇ sheˬ ve yoˬ.

18Oˇ htaˇ, ngaˬ lehˬ 40 nyi 40 haˉ hkʼa gaˬ te‸ chiˉ maˇ caˇ maˇ dawˬ leh, Gʼuiˬsha mehˆ gʼuˇ suhˍ teˇ pawˆ kʼaw‸ boˆ taˍ ve yoˬ. Ngaˬ chi hkʼe te ve lehˬ, nawˬ hui Gʼuiˬsha hta‸ te ya‸ jaˇ leh, Yawˇ nyi ma zuhˆ tuˬ te piˇ peuˬ ve pa taw yoˬ.

19Gʼuiˬsha nyi ma zuhˆ ve hta‸ ngaˬ kawˆ jaˇ ve yoˬ. Awˬ lawn kʼo, yawˇ nawˬ hui hta‸ te luˬ te sheˆ piˇ law‸ law‸ nyi ma zuhˆ jaˇ chehˇ ve yoˬ. Ya‸ hkʼaˇ, Gʼuiˬsha lehˬ ngaˬ lawˬ hkawˉ ve awˬ hkawˇ hta‸ teˇ pawˆ kʼaw‸ na yuˬ laˇ ve yoˬ.

20Gʼuiˬsha lehˬ, Aˍronˍ hta‸ ka‸ nyi ma zuhˆ jaˇ leh, yawˇ hta‸ tiˇ pehˍ gaˇ ve yoˬ. Hkʼe te leh, Aˍronˍ awˬ pon ka‸ ngaˬ Gʼuiˬsha hta‸ lawˬ hkawˉ ve yoˬ.

21Nawˬ hui te teh taˍ ve venˇbaˆ uiˍ jaˇ ve shi nuˇ shaˉ ho‸ oˇ ve hta‸ ngaˬ yuˬ leh aˬ miˍ hkʼaw baˬ keu ve yoˬ. Oˇ ve hkʼaw‸ nawˉ, shaˉ ho‸ oˇ ve hta‸ ngaˬ teˍ meu-e leh hkʼaw hkuiˉ puiˍ lo ya‸ la chehˇ ve iˉ kaˆ lawˬ hkʼaw baˬ keu ve yoˬ.

22Nawˬ hui lehˬ, Taˍbeˍraˆ, Maˍsaˍ, Kiˇbaˍtoˆhaˍtaˍvaˍ teh‸ kʼoˆ ve chehˇ kuiˬ teˇ hpaˍ hkʼaw htawˇ, Gʼuiˬsha hta‸ nyi ma zuhˆ tuˬ te piˇ ve yoˬ.

23Kaˍdeˍshaˆbaˍnaˍ teh‸ kʼoˆ ve chehˇ kuiˬ lo tu leh, Yawˇ nawˬ hui hta‸ piˇ laˇ chehˇ ve mvuhˇmiˬ lo kʼai tuˬ nawˬ hui hta‸ kʼoˆ piˇ ve teˇ yanˇ htaˇ htawˇ, nawˬ hui Yawˇ hta‸ kʼaw‸ hpfuhˆ ve yoˬ. Nawˬ hui Yawˇ hta‸ maˇ yonˍ leh yawˇ ve tawˇ hta‸ maˇ na yuˬ.

24Ngaˬ nawˬ hui hta‸ tanˬ shiˍ ve teˇ nyi hta‸ te leh, nawˬ hui Gʼuiˬsha hta‸ kʼaw‸ hpfuhˆ chehˇ ve yoˬ.

25Hkʼe te leh, ngaˬ lehˬ 40 nyi 40 haˉ Gʼuiˬsha mehˆ gʼuˇ suhˍ boˆ chehˇ taˍ ve yoˬ. Awˬ lawn kʼo, Gʼuiˬsha nawˬ hui hta‸ te luˬ te sheˆ piˇ tuˬ dawˇ cheˆ taˍ peuˬ ve hta‸ ngaˬ shiˍ ve pa taw yoˬ.

26Oˇ htaˇ, ngaˬ bon chi hkʼe lawˬ ve yoˬ. Kanˇ paˆ uiˍ jaˇ ve Gʼuiˬsha-oˬ, nawˬ ve kanˇ paˆ hta‸ cuˇ leh Eˇjiˇtu‸ mvuhˇmiˬ hkʼaw shiˍ tawˆ la piˇ taˍ ve nawˬ ve chaw chi teˇ hpaˍ hta‸ a ciˉ taˇ te luˬ piˇ-oˆ.

27Nawˬ ve awˬ ceˬ Aˍbraˍhanˍ, Iˉcaˆ, Yaˍkoˆ hui hta‸ a ciˉ dawˇ nawˇ leh, chaw chi teˇ hpaˍ nyi ma heh ve, cha‸ chiˆ ve, leh venˇbaˆ te taˍ peuˬ ve teˇ hpaˍ hta‸ a ciˉ taˇ tawnˇ taˍ piˇ-oˆ.

28Oˇ hkʼe maˇ heˆ kʼo, Nawˬ lehˬ chaw chi teˇ hpaˍ hta‸ nawˬ piˇ tuˬ ve mvuhˇmiˬ lo shiˍ kʼai piˇ maˇ gʼa ve pa taw, nawˬ yawˇ hui hta‸ canˇ leh heh puiˉ hkʼaw lo tiˇ pehˍ piˇ taˉ ve yoˬ, teh‸ Eˇjiˇtu‸ chaw teˇ hpaˍ kʼoˆ tuˬ yoˬ.

29Awˬ tehˬ kʼoˆ ve kʼo, chaw chi teˇ hpaˍ lehˬ nawˬ ve chaw ceuˬ hpeh‸ la tuˬ, nawˬ leuˆ yuˬ taˍ ve chaw hpeh‸ leh, Eˇjiˇtu‸ mvuhˇmiˬ hkʼaw lo nawˬshiˍ tawˆ la piˇ taˍ ve chaw teˇ hpaˍ hpeh‸ ve yoˬ, teh‸ ngaˬGʼuiˬsha hta‸ kʼoˆ piˇ ve yoˬ.

← Chapter 8 Jump to: Chapter 10 →