Deuteronomy 14

Lahu Bible Edited © Thailand Bible Society and Bible Society of Myanmar, 2010, 2020.

← Chapter 13 Jump to: Chapter 15 →

1Nawˬ hui lehˬ Gʼuiˬsha ve chaw hpeh‸ ve yoˬ. Suh peuˬ ve chaw hui awˬ pon dawˇ haˍ leh paˆ hawˬ ve teˇ yanˇ, awˬ nu ve chaw hui te ve hkʼe a shu yawˇ awˬ to hta‸ shawˆ hkʼaw ve maˇ kʼoˆ, uˉ hkeh mvuh chiˇ baˬ ve maˇ kʼoˆ maˇ gʼa te.

2Nawˬ hui lehˬ Gʼuiˬsha hta‸ caˉ da‸ ve chaw hpeh‸ ve yoˬ. Yawˇ ve chaw hpeh‸ la piˇ tuˬ, Gʼuiˬsha lehˬ miˬguiˬ hkʼoˆ cawˬ ve awˬ nu ve chaw ceuˬ hkʼa peu-eˬ hkʼaw, nawˬ hui hta‸ leuˆ yuˬ taˍ peuˬ ve yoˬ.

3Gʼuiˬsha maˇ da‸ maˇ kehˬ teh‸ shawˍ taˍ ve to nuˇ to shaˆ chi teˇ hpaˍ hta‸ taˇ caˇ.

4Nawˬ hui to nuˇ to shaˆ chi teˇ hpaˍ hta‸ caˇ hpeh‸ ve yoˬ. Nuˇ, yawˬ, aˉ che‸,

5hkuiˉ zuhˬ, yawˬ awˬ hteunˍ, haˇ tawˉ pehˆ, tsuh piˉ kʼaweh‸,

6leh hkui kiˆ cawˬ ve to nuˇ to shaˆ leh, caˇ tuˬ hta‸ kʼaw‸ a‸ tawˆ leh behˇ caˇ puiˉ ve to nuˇ to shaˆ chi teˇ hpaˍ hpeh‸ ve yoˬ.

7Hkui kiˆ maˇ cawˬ leh caˇ tuˬ maˇ geuˆ puiˉ ve to nuˇ to shaˆ hkʼaˬ ve teˇ ceuˬ hta‸ maˇ kʼoˆ maˇ gʼa caˇ. Kaˍlaˍoˆ, pa taiˇ hkʼe ve hta‸ nawˬ hui maˇ gʼa caˇ. Yawˇ hui lehˬ caˇ tuˬ hta‸ kʼaw‸ a‸ tawˆ leh behˇ caˇ puiˉ ve htawˇ hkui kiˆ maˇ cawˬ. Chi hta‸ pa taw, yawˇ hui hta‸ maˇ da‸ kehˬ, teh‸ nawˬ hui gʼa shawˍ taˍ ve yoˬ.

8Va‸ shaˍ taˇ caˇ. Maˇ daˬ kehˬ teh‸ nawˬ hui gʼa shawˍ taˍ ve yoˬ. Yawˇ hui lehˬ hkui kiˆ cawˬ ve htawˇ, caˇ tuˬ hta‸ kʼaw‸ a‸ tawˆ leh caˇ maˇ puiˉ. Chi hkʼe ve to nuˇ to shaˆ hta‸ taˇ caˇ. Suh taˍ ve awˬ to hta‸ ka‸ taˇ htawˇ.

9Awˬ biˉ leh awˬ shehˆ cawˬ ve ngaˇ hkʼaˬ ve teˇ ceuˬ hta‸ maˇ kʼoˆ nawˬ hui caˇ hpeh‸ ve yoˬ.

10Ya‸ hkʼaˇ, awˬ biˉ leh awˬ shehˆ maˇ cawˬ ve ngaˇ hkʼaˬ ve teˇ ceuˬ hta‸ maˇ kʼoˆ, nawˬ hui maˇ gʼa caˇ. Maˇ da‸ maˇ kehˬ teh‸ nawˬ hui gʼa shawˍ taˍ ve yoˬ.

11Da‸ kehˬ ve ngaˆ hkʼaˬ ve teˇ ceuˬ hta‸ maˇ kʼoˆ nawˬ hui caˇ hpeh‸ ve yoˬ. Ya‸ hkʼaˇ, ngaˆ chi teˇ hpaˍ hta‸ nawˬ hui maˇ gʼa caˇ. Aˉ ceˬ, hkawˍtawehˍ, naˬ beuˬ ngaˆ, aˉ naˆ kʼaˍ, laˇ tsuhˇ gʼuiˬ hkʼaw chehˇ ve ngaˆ, ngaˆ hpu ma, kawehˆ, lo tuˬ ma, leh poˬnaˉ chi teˇ hpaˍ hta‸ nawˬ hui maˇ gʼa caˇ.

19Poˬ puiˉ ve pfuhˇ shehˍ ma hkʼa peu-eˬ ve lehˬ, maˇ da‸ kehˬ ve pa taw nawˬ hui maˇ gʼa caˇ.

20Da‸ kehˬ ve pfuhˇ shehˍ ma teˇ hpaˍ hta‸ tiˉ nawˬ hui gʼa caˇ ve yoˬ.

21Yawˇ hkʼaˇ yawˇ suh-e ve to nuˇ to shaˆ teˇ hpaˍ hta‸ maˇ gʼa caˇ. Nawˬ hui geh chehˇ taˍ ve hkehˉ chaw teˇ hpaˍ caˇ hpeh‸ ve yoˬ. Maˇ heˆ kʼo, shu hta‸ hawˇ piˇ hpeh‸ ve yoˬ. Nawˬ hui lehˬ Gʼuiˬsha ve chaw hpeh‸ ve yoˬ. Yawˬ ehˉ, maˇ heˆ kʼo aˉ che‸ ehˉ hta‸ yawˇ awˬ e ve cuˉ gʼuiˬ hkʼaw maˇ gʼa keu caˉ caˇ.

22Teˇ hkʼaw‸ le le, nawˬ hui ve ti mi hkʼaw tawˆ la ve awˬ shiˍ awˬ nu teˇ chi pun teˇ pun hta‸ teˇ kaˬ lo hkʼa deh‸ gʼa fuiˍ teh taˍ ve yoˬ.

23Oˇ ve hkʼaw‸ nawˉ, Gʼuiˬsha Yawˇ leuˆ yuˬ taˍ ve oˉ kʼoˍ pui kuiˬ lo kʼai leh, Yawˇ mehˆ gʼuˇ suhˍ lo nawˬ hui ve teˇ chi pun teˇ pun tanˇ taˍ ve awˬ shiˍ awˬ nu, a pehˉ meuˇ gʼuiˬ, shaˍlonˍ chu, leh awˉ lawˉ peuˇ paw la ve ceˇ teˇ hpaˍ hta‸ tiˇ caˇ-oˆ. Nawˬ hui ve Gʼuiˬsha hta‸ hkʼaˬ htaˆ ka‸ yawˆ yan hkawˇ nawˇ tuˬ chi hkʼe te tcuhˉ taˍ-o‸.

24Oˉ kʼoˍ pui kuiˬ oˇ ve lehˬ nawˬ hui hta‸ vuiˇ da‸ jaˇ leh, teˇ chi pun teˇ pun tanˇ tuˬ yuˬ kʼai maˇ gʼa ve kʼo, chi hkʼe te-o.

25Tanˇ tuˬ oˇ ve teˇ hpaˍ hta‸ hawˇ leh, Gʼuiˬsha hta‸ oˉ kʼoˍ pui kuiˬ lo hpu hta‸ yuˬ kʼai piˇ-oˆ.

26Oˇ kaˬ lo nawˬ hui caˇ gaˇ ve nuˇ shaˍ, yawˬ ehˉ shaˍ, a pehˉ meuˇ gʼuiˬ, tzuhˬ hta‸ vuiˬ leh, nawˬ hui ve miˇ yaˇ teˇ hpaˍ geh teˇ geh, Gʼuiˬsha mehˆ guˇ suhˍ ha lehˬ ha kʼa te caˇ hpeh‸ ve yoˬ.

27Nawˬ hui ve venˇ hkʼaw chehˇ taˍ ve Leˍviˆ chaw hui hta‸ taˇ leunˇ. Yawˇ hui lehˬ te‸ chiˉ mawˇ jeˬ maˇ cawˬ.

28Shehˆ hkʼaw‸ peuˬ ve teˇ pawˆ le le, nawˬ hui ve awˬ shiˍ awˬ nu teˇ chi pun teˇ pun hta‸ yuˬ laˬ leh, nawˬ hui ve venˇ hkʼaw ha‸ shaˉ taˍ-o‸.

29Caˇ tuˬ chi teˇ hpaˍ lehˬ, te‸ chiˉ mawˇ jeˬ maˇ cawˬ ve Leˍviˆ chaw, hkehˉ chaw, yaˇcuˬshi leh mehˇchawˇma teˇ hpaˍ awˬ pon hpeh‸ ve yoˬ. Nawˬ hui oˇ hkʼe te chehˇ ve kʼo, nawˬ hui hkʼa te ve kanˉ hkʼa peu-eˬ hta‸ Gʼuiˬsha awˬ bon na‸ laˇ tuˬ yoˬ.

← Chapter 13 Jump to: Chapter 15 →