Deuteronomy 22

Lahu Bible Edited © Thailand Bible Society and Bible Society of Myanmar, 2010, 2020.

← Chapter 21 Jump to: Chapter 23 →

1Nawˬ hui ve awˬ viˉ awˬ nyi Iˉsaˍreˍlaˆ chaw teˇ gʼaˇ ve nuˇ, maˇ heˆ kʼo yawˬ ehˉ teˇ hkeh hpaw toˇ chehˇ ve hta‸ gʼa mawˬ ve kʼo, nawˬ hta‸ maˇ caˉ da‸ ve hkʼe maˇ gʼa te. Hpeh yuˬ leh yawˇ geh gʼa sheh hkʼaw‸ kʼoˬ piˇ ve yoˬ.

2Ya‸ hkʼaˇ, awˬ shehˍ hpaˇ lehˬ vuiˇ kuiˬ lo chehˇ taˍ ve, maˇ heˆ kʼo awˬ shehˍ hpaˇ hta‸ nawˬ maˇ shiˍ ve kʼo, nawˬ ve yehˬ lo gʼa hpeh taˍ ve yoˬ. Awˬ shehˍ hpaˇ gʼa‸ ca gaˬ la ve kʼo, yawˇ hta‸ gʼa kʼaw‸ hkʼaw‸ piˇ ve yoˬ.

3Piˉ laˬ, maˇ heˆ kʼo, hpa teˇ cheˆ cheˆ maˇ kʼoˆ, awˬ nu ve mawˇ hkʼaˬ ve teˇ ceuˬ hta‸ maˇ kʼoˆ nawˬ gʼa mawˬ ve kʼo, oˇ ve hkʼa shuˍ gʼa te ve yoˬ.

4Iˉsaˍreˍlaˆ chaw ve piˉ laˬ, maˇ heˆ kʼo nuˇ teˇ hkeh paiˍ taˍ ve hta‸ nawˬ gʼa mawˬ ve kʼo, nawˬ hta‸ maˇ caˉ da‸ ve hkʼe maˇ gʼa te chehˇ. Gʼa kʼaw‸ cawˍ tu piˇ ve yoˬ.

5Yaˇ miˇ teˇ hpaˍ lehˬ, hawˉ hkʼaˆ paˍ ve veu‸ kʼaˇ hta‸ maˇ gʼa veu‸ deh. Hawˉ hkʼaˆ htawˇ yaˇ miˇ ve veu‸ kʼaˇ hta‸ maˇ gʼa veu‸ deh. Oˇ hkʼe te ve chaw hta‸ Gʼuiˬsha canˇ ve yoˬ.

6Suhˆ cehˬ hkʼoˆ, maˇ heˆ kʼo miˬ chaˇ hkʼoˆ lo ngaˆ hpui teˇ maˬ hkʼaw ngaˆ ma peuˍ mvuhˍ chehˇ ve, maˇ heˆ kʼo awˬ yehˇ geh chehˇ taˍ ve hta‸ nawˬ gʼa mawˬ ve kʼo, awˬ ma peuˍ hta‸ nawˬ maˇ gʼa yuˬ.

7Awˬ yehˇ hta‸ nawˬ yuˬ hpeh‸ ve yoˬ. Ya‸ hkʼaˇ, awˬ ma peuˍ hta‸ nawˬ gʼa hpehˇ peu ve yoˬ.

8Nawˬ yehˬ awˬ suhˉ teˇ maˬ te ve kʼo, koˇ caˉ hta‸ hkʼa deh‸ gʼa ko taˍ ve yoˬ. Oˇ hkʼe te taˍ ve kʼo, chaw teˇ gʼaˇgʼaˇ ce suh-e ve htawˇ, nawˬ te‸ chiˉ venˇbaˆ maˇ cawˬ.

9Nawˬ ve a pehˉ meuˇ hko hkʼaw awˬ nu ve iˉ shiˍ cehˬ maˇ gʼa ti keu. Oˇ hkʼe ti keu ve kʼo, iˉ shiˍ oˇ ve nyiˇ ceuˬ ceuˬ hta‸ nawˬ gʼa caˇ tuˬ ve maˇ heˆ.

10Nuˇ leh piˉ laˬ hta‸ teˇ ceh te leh ti mi maˇ gʼa mehˇ.

11Yawˬ mvuh leh gʼo‸ hkeh hkaw‸ da‸ leh te chiˇ taˍ ve hpa hta‸ nawˬ veu‸ kʼaˇ maˇ gʼa te veu‸.

12Nawˬ ve veu‸ kʼaˇ awˇ ceˍ awˇ hpawˇ lo suhˉ veˆ awˬ han gʼa tawˉ keu taˍ ve yoˬ.

13Chaw teˇ gʼaˇ awˬ miˇ ma heuˆ peuˬ hkʼaw‸ nawˉ, yaˇ miˇ oˇ ve hta‸ maˇ kʼaw‸ heuˆ gaˇ ve pa taw,

14maˇ hteˇ maˇ cawˇ ve shaˉ hkiˆ hkanˍ leh, yaˇ miˇ oˇ ve hta‸ yawˇ heuˆ htaˇ, yaˇ miˇ haˉ maˇ heˆ law teh‸ kʼoˆ ve kʼo,

15yaˇ miˇ ve awˬ pa awˬ e lehˬ, yaˇ miˇ chi yaˇ miˇ haˉ hpeh‸ tehˬ ve hta‸ shaˉ hkiˆ te tuˬ, awˬ suhˍ ngawˉ taˍ ve hkʼawˇ zuh‸ hpui hta‸ yuˬ leh shaˉ nanˉ lo awˬ hoˉ awˬ naˬ teˇ hpaˍ geh gʼa kʼai ve yoˬ.

16Oˇ htaˇ yaˇ miˇ awˬ pa lehˬ, Ngaˬ yaˇ miˇ chaw chi hpaˇ hta‸ ka piˇ taˍ ve yoˬ. Ya‸ hkʼaˇ, chi beu‸ yawˇ maˇ kʼaw‸ heuˆ gaˇ ve law.

17Yawˇ lehˬ maˇ hteˇ maˇ cawˇ ve tawˇ hta‸ yaw leh, Yaˇ miˇ chi yaˇ miˇ haˉ maˇ heˆ law, teh‸ kʼoˆ chehˇ ve yoˬ. Ngaˬ yaˇ miˇ chi yaˇ miˇ haˉ hpeh‸ tehˬ ve shaˉ hkiˆ chi hkʼe cawˬ ve yoˬ. Awˬ suhˍ ngawˉ taˍ ve hkʼawˇ zuh‸ hpui chi hta‸ nyi-o, teh‸ yawˇ hui hta‸ gʼa kʼoˆ piˇ ve yoˬ.

18Oˇ htaˇ, awˬ hoˉ awˬ naˬ teˇ hpaˍ lehˬ, hawˉ hkʼaˆ oˇ ve hta‸ yuˬ leh gʼa jaw‸ hpehˇ ve yoˬ.

19Chi hkʼoˆ, yawˇ hui yawˇ hta‸ teˇ ha hteh‸ meuˉ leh, hpu oˇ ve yaˇ miˇ ve awˬ pa hta‸ gʼa piˇ ve yoˬ. Awˬ lawn kʼo, chaw oˇ ve lehˬ Iˉsaˍreˍlaˆ yaˇ miˇ ve awˬ me‸ awˬ hponˇ hta‸ te luˬ ve pa taw yoˬ. Yawˇ lehˬ yaˇ miˇ oˇ ve hta‸ gʼa kʼaw‸ heuˆ leh, yawˇ teˇ co-e yaˇ miˇ oˇ ve hta‸ maˇ gʼa baˬ.

20Ya‸ hkʼaˇ, hawˉ hkʼaˆ paˍ oˇ ve hpaˇ kʼoˆ ve hkʼe cawˇ leh, yaˇ miˇ hpawˇ lo te‸ chiˉ shaˉ hkiˆ maˇ cawˬ ve kʼo,

21yaˇ miˇ oˇ ve hta‸ yawˇ awˬ pa ve yehˬmiˉhpe‸ lo gʼa shiˍ kʼo‸-e leh, venˇ hkʼaw chehˇ ve hawˉ hkʼaˆ teˇ hpaˍ yawˇ hta‸ haˉ pui gʼa baˬ pehˍ piˇ ve yoˬ. Awˬ lawn kʼo, yawˇ lehˬ awˬ hpawˇ maˇ heuˆ sheˍ htaˇ ka‸ shu hta‸ haˉ chawˇ ca te jaw leh, ya‸ taw tuˬ uiˍ jaˇ ve kanˉ hta‸ te taˍ peuˬ ve pa taw yoˬ. Cha‸ chiˆ ve awˬ ceuˬ chi hkʼe ve hta‸ nawˬ hui oˇ hkʼe gʼa te yuˬ baˬ ve yoˬ.

22Chaw teˇ gʼaˇ lehˬ, shu miˇ ma hta‸ haˉ chawˇ te ve kʼo, yawˇ huiˉ maˬ nyiˇ gʼaˇ gʼaˇ hta‸ gʼa tiˇ pehˍ ve yoˬ. Cha‸ chiˆ ve awˬ ceuˬ chi hkʼe ve hta‸ nawˬ hui oˇ hkʼe gʼa te yuˬ baˬ ve yoˬ.

23Venˇ hkʼaw lo chaw teˇ gʼaˇ lehˬ, shu heuˆ tuˬ ka ti‸ te taˍ peuˬ ve yaˇ miˇ teˇ gʼaˇ hta‸ haˉ chawˇ ca te ve kʼo,

24yawˇ huiˉ maˬ nyiˇ gʼaˇ gʼaˇ hta‸ venˇ baˬ lo shiˍ kʼai leh haˉ pui gʼa baˬ pehˍ ve yoˬ. Yaˇ miˇ oˇ ve lehˬ venˇ hkʼaw chehˇ taˍ ve htawˇ, shu ca behˇ la htaˇ maˇ kuˬ ve pa taw yoˬ. Hawˉ hkʼaˆ oˇ ve lehˬ, shu heuˆ tuˬ ka ti‸ te taˍ peuˬ ve yaˇ miˇ hta‸ haˉ chawˇ te ve pa taw yoˬ. Cha‸ chiˆ ve awˬ ceuˬ chi hkʼe ve hta‸ nawˬ hui oˇ hkʼe gʼa te yuˬ baˬ ve yoˬ.

25Heh puiˉ hkʼaw lo chaw teˇ gʼaˇ lehˬ, shu heuˆ tuˬ ka ti‸ te taˍ ve yaˇ miˇ hta‸ haˉ chawˇ te ve kʼo, hawˉ hkʼaˆ oˇ ve hta‸ ceh tiˉ gʼa tiˇ pehˍ ve yoˬ.

26Yaˇ miˇ hta‸ te‸ chiˉ maˇ gʼa te. Yawˇ lehˬ suh keunˍ ve venˇbaˆ maˇ cawˬ. Chi ve lehˬ, chaw teˇ gʼaˇ shu hta‸ ya‸ da‸ lehˬ shu hta‸ tiˇ pehˍ piˇ ve hkʼe ceh hpeh‸ ve yoˬ.

27Chaw oˇ ve lehˬ heh puiˉ hkʼaw lo yaˇ miˇ oˇ ve hta‸ haˉ chawˇ te ve yoˬ. Yaˇ miˇ oˇ ve kuˬ ve htawˇ, yawˇ hta‸ ca ga la paˍ teˇ gʼaˇ ka‸ maˇ cawˬ.

28Chaw teˇ gʼaˇ lehˬ, shu hta‸ heuˆ tuˬ ka ti‸ maˇ te sheˍ ve yaˇ miˇ teˇ gʼaˇ hta‸ guiˇ ya‸ ve kʼo,

29yawˇ lehˬ yaˇ miˇ ve awˬ pa hta‸ hkehˉ caˇ hpfuhˇ 50 hteh‸ gʼa keu piˇ leh, yaˇ miˇ oˇ ve hta‸ gʼa heuˆ ve yoˬ. Awˬ lawn kʼo, yaˇ miˇ oˇ ve hta‸ yawˇ guiˇ ya‸ peuˬ ve pa taw yoˬ. Yawˇ teˇ co-e yaˇ miˇ oˇ ve hta‸ maˇ gʼa baˬ.

30Chaw hkʼaˬ ve teˇ gʼaˇ maˇ kʼoˆ, a shu yawˇ awˬ pa ve awˬ miˇ ma hta‸ haˉ chawˇ te leh, yawˇ ve awˬ me‸ awˬ hponˇ hta‸ maˇ gʼa te luˬ piˇ.

← Chapter 21 Jump to: Chapter 23 →