Job 1

Kirundi (Bibliya Yera 1951, 1967 (Burundi))

Jump to: Chapter 2 →

1Mu gihugu c’i Uzi hār’ umuntu yitwa Yobu; kand’ uwo muntu yar’ umuntu atunganye w’umugororotsi, yubaha Imana, akitandukanya n’ikibi.

2Yar’ afise abahungu ndwi n’abakobga batatu.

3Itunga ryiwe ryar’ intama ibihumbi ndwi, n’ingamiya ibihumbi bitatu, n’inka igihumbi zirima, n’indogoba zivyara amajana atanu, n’abahinda mu rugo benshi cane; nuk’ uwo muntu yar’ ūhambaye gusumba abantu bose b’i burasirazuba.

4Kand’ abahungu biwe bāhora barondera amazimano mu nzu y’ umuntu wese muri bo ku musi ashinze, bagatumira bashiki babo ukw ari batatu ngo baze gusangira na bo.

5Nuk’ ukw imisi y’amazimano yabo yahera, Yobu yabatumako ngw abeze, akavyuka kare mu gatondo, agatanga ibimazi vyoswa bihwanye n’igitigiri ca bose: kuko Yobu yavuga, ati Kumbure abahungu banje bācumuye, barogota ku Mana mu mitima yabo. Uko ni ko Yobu yahora agenza ubudasiba.

6Umusi ur’ izina abana b’Imana baje bashengereye Uhoraho, kandi na Satani yazananye na bo.

7Uhoraho abaza Satani, at’ Uvuye hehe? Satani yishura Uhoraho, ati Mvuye gukwiragira mw isi no kuyigendagendamwo.

8Uhoraho abaza Satani, ati Mbega witegereje umusavyi wanje Yobu, yukw ata wuhwanye na we mw isi, ar’ umuntu atunganye w’umugororotsi, anyubaha, akitandukanya n’ikibi?

9Maze Satani yishura Uhoraho, ati Mbeg’ ugira ngo Yobu yubahira Imana ubusa?

10Ntiwamuzitiriye uruzitiro rumukikije, bo n’inzu yiwe, n’ivy’ atunze vyose? Wahezagiye igikorwa c’amaboko yiwe, kand’ itunga ryiwe ryagwiriye mu gihugu.

11Ariko pfa gutuma ukuboko kwawe, wubike ivy’ afise vyose, urābe kw atazokurogotako imbonankubone.

12Uhoraho yishura Satani, at’ Eh’ ivy’ afise vyose biri mu kuboko kwawe; ariko we ku mutumba wiwe ntuz’ umukoreko. Nuko Satani aca arasohoka, ava imbere y’Uhoraho.

13Maz’ umusi ur’ izina, abahungu n’abakobga ba Yobu bāriko barasangira, banywera vino mu nzu ya mukuru wabo,

14haza imbitsi kuri Yobu, it’ Inka zariko zirarima, n’indogoba zarisha i ruhande yazo;

15maz’ Abasabeya barazinyaze, barazitwaye: mbere n’abungere babaririkishije inkota; ni jewe jenyene ndokotse wo kuza kubikubikira.

16Akibivuga, haza uwundi na we, at’ Umuriro w’Imana watibutse uva mw ijuru, uyigiza intama n’abungere, urabimara; ni jewe jenyene ndokotse wo kuza kubikubikira.

17Akibivuga, haza uwundi na we, at’ Abakaludaya bigize imice itatu, banyaze ingamiya, barazitwaye: mbere n’abungere babaririkishije inkota; ni jewe jenyene ndokotse wo kuza kubikubikira.

18Akibivuga, haza uwundi na we, at’ Abahungu bawe n’abakobga bawe bāriko barasangira banywera vino mu nzu ya mukuru wabo,

19nuko haza umuyaga w’ igihuhuta uturutse mu bugaragwa, uhitana imfuruka zine z’inzu; maz’ isidukira kur’ abo bahungu, barapfa; ni jewe jenyene ndokotse wo kuza kubikubikira.

20Maze Yobu ava hasi, yitantamurirak’ umutamana wiwe yimosha inkomvorera, yikubita hasi, arasenga,

21ati Navuye mu nda ya mama nambaye ubusa, kandi nzosubira mu nda y’isi ata co nambaye. Uhoraho ni we yagavye, kand’ Uhoraho ni we agaburuje: izina ry’Uhoraho ni rishemagizwe.

22Mur’ ivyo vyose Yobu ntiyakoze icaha, canke ngw aherereze amafuti ku Mana.

Jump to: Chapter 2 →