Job 31

Kirundi (Bibliya Yera 1951, 1967 (Burundi))

← Chapter 30 Jump to: Chapter 32 →

1Nasezeranye isezerano n’ amaso yanje; None noshobora nte gushira ijisho ku mwigeme?

2Kuk’ umugabane Imana yompa uvuye mw ijuru woba iki? N’inyegu ivuye iyo hejuru Īshobora vyose yompa yoba inki?

3Mbega ntiyoba ubugesera bubīkirwa umugabitanyi, N’ivyago bibīkirwa inkozi z’ ibibi?

4Mbega yo yo ntiyitegereza inzira zanje, Igaharūra intambuko zanje zose?

5Asangwa naragendeye mu binyoma, Ikirenge canje kikihutishwa no kuja kugunga,

6Ni ngerwe ku munzane w’ ukuri, Kugira ngw Imana imenye ukugororoka kwanje!

7Asangw’ ibirenge vyanje vyarakebeje mu nzira, Umutima wanje ugakurikira amaso yanje, Kand’ asangwa har’ agasembga na kamwe kometse ku biganza vyanje:

8Ndakarima, birye uwundi, Mbere n’imirima yo mu ndimiro yanje irandurwe!

9Asangw’ umutima wanje warasutswe n’umugore, Nkabunda ku muryango w’ umubanyi wanje:

10Umugore wanje aragasēra uwundi, Kand’ akindweko n’abandi.

11Kukw ico coba ar’ ishano ritavugwa, Mbere coba ar’ ikibi co guhanirwa mu bacamanza;

12Coba ar’ umuriro utongora gushitsa uhoneje, Ugaturira imirima yanje yose.

13Asangwa narīrengagije ivy’ umushumba wanje cank’ ivy’ incoreke yanje, Igihe banyitwarako:

14None nzobikika nte, igihe Imana izokwisidukira? Noyishura iki, igihe ije kumbazaguza?

15Mbeg’ iyandemeye mu nda ya mama si yo yamuremye na we? Iyatubumbiye mu nda s’ imwe?

16Asangwa narīmye abagorwa ico bifuza, Canke naratumye amaso y’ abapfakazi akoboka;

17Cank’ asangwa narigunganye ivyo kurya vyanje, Impfuvyi ntibikoreko,

18Kand’ uhereye mu buto bganje ari jewe nayireze ndi nka se, N’umupfakazi ari jewe namuhagarikiye, nkiva mu nda ya mama;

19Kand’ asangwa har’ uwo nabonye yishwe no kubura ico yambara, Cank’ umukene abuze ico yipfuka,

20Asangw’ urukenyerero rwiwe rutampezagiye, Kand’ atāsusurukijwe n’ubgoya bg’intama zanje;

21Kand’ asangwa narabanguriye ukuboko impfuvyi, Kubgo kugira aho mpininikiye mu rukinja;

22Asangwa vyarabaye birtyo, igitugu canje kiragatandukana n’urubeshi, N’ukuboko kwanje gucike gutandukane n’igufa!

23Kukw ivyago vyovuye ku Mana vyantera ubgoba, Narashishwa kubg’ igitinyiro cayo.

24Asangwa naragize izahabu ivyizigiro vyanje, Nkabarira izahabu nziza, nti Ni wewe nishimiye;

25Kand’ asangwa nanejerejwe n’uk’ ubutunzi bganje ari bginshi, Kandi yuk’ ukuboko kwanje kwaronse vyinshi;

26Kand’ asangwa naritegereje izuba igihe ryaka, Cank’ ukwezi kugendera mu bgiza bgakwo,

27Umutima wanje ugasukwa na vyo mu mpisho, Nkabiha ukuboko kwanje:

28Ivyo na vyo vyoba ar’ ikibi co guhanirwa mu bacamanza, Kuko noba nihakanye Imana iri hejuru.

29Asangwa naranejerejwe n’uk’ ūnyanka ageshejwe, Canke nkitereshwa hejuru n’ ukw ivyago bimushitseko,

30Kand’ ari jewe nari narazitiye akanwa kanje ngo ntigacumure, Ntikamuvume ngo kamwifurize gupfa;

31Kand’ asangw’ abo mu rugo rwanje batavuga, Bati Ni nde yobona umuntu n’umwe atāhāgijwe n’inyama yagabura?

32Kandi kw ata mushitsi narāje hanze, Arikw ingenzi nama ndayugururira;

33Kand’ asangwa naratwikiriye ibicumuro vyanje nka Adamu, Ngahisha ibigabitanyo vyanje mu gikiriza,

34Mbitewe no gutinya ishengero mu kigohe, No gutinya kugawa n’iyindi miryango, Bigatuma nihorera, sindenge n’irembo—

35Icompa hakagira ūnyumviriza! Ivyo nireguje ndabitereye igikumu: Īshobora vyose n’ inyishure! Kand’ icompa nkabona ibirego vyanditswe n’umwansi wanje!

36N’ukuri novyikorera ku rutugu, Nkavyipfundikako nk’igitsibo.

37Noyimenyesha igitigiri c’intambuko zanje, Noyishikīra nk’uk’ umuganwa ashikīra umwami.

38Asangwa mu bgatsi bganje hatakishwa no kundega, N’ubusize bgaho bukarira;

39Kand’ asangwa narariye ivyeze vyaho ata co nishuye, Cank’ asangwa narishe nabi bene ho:

40Asangwa vyarabaye birtyo, amahwa arakamera ahobaye ingano, N’ikigunda ahobaye sayiri. Amajambo ya Yobu agarukiye aho.

← Chapter 30 Jump to: Chapter 32 →