Job 33

Kirundi (Bibliya Yera 1951, 1967 (Burundi))

← Chapter 32 Jump to: Chapter 34 →

1Enda rero Yobu, wumve ivyo mvuga, Kand’ utegere amatwi amajambo yanje yose.

2Ehe nteranuye akanwa, Ururimi rwanje ruvugiye mu kanwa kanje.

3Amajambo yanje agira aserure ukugororoka kw’umutima wanje, Kand’ ivyo nzi iminwa yanje irabivuga ata buryarya.

4Mpwemu w’Imana ni we yandemye, Kand’ uguhumeka kw’Īshobora vyose ni kwo kwampaye ubugingo.

5Ni wabishobora unyishure, Amajambo yawe uyatumberanirize imbere yanje, uve hasi uhagarare.

6Rāba mpwanye nawe imbere y’Imana, Nanje n’uko nabumbge mw ibumba.

7Ehe nta gitinyiro mfise co kugutera ubgoba, Cank’ ijunja ng’ untinye.

8N’ukuri wavuze numva, Kandi numvise ivyo amajambo yawe avuga;

9Ng’ Uratunganye, ngo Nta gicumuro ugira; Ngo Nta rubanza rugutsinze, ngo Nta n’ukugabitanya ugira:

10Ariko ngw Imana ikuronderakw inyanduruko, Ikakwiyumvira nk’umwansi wayo;

11Ngw ibirenge vyawe ibishira mu mpatane z’ibiti, Ikitegereza inzira zawe zose.

12Reka nkwishure: mur’ ivyo ntugororotse; Kukw Imana irengeye abantu.

13N’iki gituma uyihāririza? Kukw ata co yirirwa isobanura mu vyayo.

14Kukw Imana, har’ ah’ ivuga mu buryo bumwe, Har’ ah’ ivuga mu bundi, nah’ umuntu atobibabara.

15Mu nzozi, mw iravūta ryo mw ijoro, Igihe itiro ryinshi ritwaye abantu, Bisinziriye ku mariri yabo;

16Ni ho izibūra amatwi y’abantu, Ikabatēza ubgoba ivyo ibabūrira,

17Kugira ngw igaburuze umuntu imigabo yiwe, Imurinde ubgibone.

18Umutima wiwe iwukiza rwa rwobo, N’ubugingo bgiwe ngo ntibgicwe n’inkota.

19Kandi har’ ah’ ahanwa n’ uburibge ari ku buriri bgiwe, Akagira uburibge budahorerekeza mu magufa yiwe:

20Bigatuma umutima wiwe uhura ivyo kurya, Akazinukwa ibiryoshe.

21Umubiri wiwe urananuka, ukayongayonga; N’amagufa yiwe atāboneka agasohoka.

22Mber’ umutima wiwe ukaba wēgereye rwa rwobo, N’ubugingo bgiwe bukēgēra intumwa z’urupfu.

23Namba yoba kumwe n’umumarayika, Ari we mushikirwa umwe mu gihumbi, Wo kumenyesha umuntu ukw akwiye kugenza;

24Ni ho amugirira imbabazi, Ati Murekure, yoye kumanuka ngw aje muri rwa rwobo; Mbonye ikimucungura.

25Umubiri wiwe uzotonyanga itōto kurusha uw’ umwana; Azokwiyubura, abe nko mu misi yo mu buto bgiwe.

26Asenga Imana, na yo ikamuhāngaza, Bituma arāba mu nyonga hayo anezerewe: Kand’ ikagarukanira umuntu ukugororoka kwiwe.

27Aririmbira imbere y’abantu, Ati Naracumuye, ngoreka ibiroranye, Ariko nta co vyammariye.

28Imana yacunguye umutima wanje ngo ntuje muri rwa rwobo, Kand’ ubugingo bganje buzokwitegereza umuco.

29Rāba, ivyo vyose Imana ni yo ibikora, Igenza irtyo umuntu kabiri, mbere n’ubugira gatatu,

30Kugira ngw igarukane umutima wiwe ngo ntuje muri rwa rwobo, Abone kumurikirwa n’umuco w’ubugingo.

31Enda bishirek’ umutima, Yobu we, untege amatwi: Ucereze, nanje mvuge.

32Asangw’ uri n’ico uvuga, unyishure: Vuga, kuko nifuza k’uboneka k’ugororotse.

33Namb’ ata kiriho, untege amatwi: Ucereze, nanje ngucishe ubgenge.

← Chapter 32 Jump to: Chapter 34 →