1 Chronicles 13

Romani Sinte 2024 (O Debleskro Lab 2024 (Sinte-Manouche))

← Chapter 12 Jump to: Chapter 14 →

1Oun o David beshas pes khetne kol pralstunentsa pral i zero lourdende oun kolentsa pral sheel lourdende oun kol vavar bare lourdentsa oun rakras lentsa.

2Palle penas lo ap i tsele Israelitarya, kay kote his: “Te hi t'menge mishto, oun lačo glan maro baro Debleskre yaka, palle bičras mer bičepangre pash mare phralende an i tsele kotya o themestar Israel, ninna pash i rashayende oun i Levitarya, kote kay yon djivenn. Oun mer moukah lenge te penell, te venn le pash mende khetne.

3Mer khetne kamah ko morhton, kay o Debleskre deesh laba dren hi, pale pash mende te lell. An ko tsiro, har o Saul djivas, poučam gar pal leste.”

4Kote penan i tsele Israelitarya, kay kote khetne his: “Kova hi mishto. Mer krah kova.”

5Yaake moukas o David i tsele Israelitaryen khetne gole te dell, kotar, kay o pani Sihor hi an o them Egiptia, bis kotar, kay djal pash o foro Lebo-Hamat, te lenn le ko morhton o deesh labentsa o Deblestar dran o foro Kiryat-Yearim.

6Oun o David djas i tsele Israelentsa pral an o foro Baala. Kava hi i vavar lab o foreske Kiryat-Yearim, oun hi an o them Youda čiddo. Kote his o morhton tardo o baro Deblestar, kay beshdo hi pral i bolepangre, kay kharenna Keroubim, oun kay vell yob an-mangedo.

7Oun yon moukan ko morhton ap i nevo vourdin dran o kheer te anell, kay o Abinadab djivell. Oun o Ouza oun leskro phraal djan o vourdineha oun dan ap leste yak.

8O David oun i tsele menshe an Israel khelan barhteles glan o Debleste, givan gilya, oun kran bashepen ap doryengre bashepangre, ap pauke, ap phourdepangre oun vavar bashepangre.

9Har van le pash ko djobeskri platsa o morshestar Kidon, kaman i groumya vin te phagell, oun o Ouza rikras o morhton, te perell lo gar.

10Kova hounte krals lo gar. Yob hounte tapras gar o Debleskro morhton an. Koy vas o baro Debleskri rholi pral o Ouza. Oun o Devel maras les koy. Oun yob meras kote glan o Debleste.

11Koy vas o David rhoyedo, kay o baro Devel o Ouzaes yaake krik las. Doleske kharell koy platsa Perez-Ouza gomme kay dives.

12Oun o David trashas o Deblestar ap ko dives, oun penas: “Har nay lau me o Debleskro morhton pash mande?”

13Oun yob moukas les gar pash peste te anell an o Davideskro foro. Na-a, yob moukas les an ko kheer te anell, kay djivell o Obed-Edom. Kova his i morsh dran o foro Gat.

14Yaake ačas o baro Debleskro morhton triin čon an koleskro kheer. Oun o baro Devel čivas peskri barht oun zoor ap leste oun ap halauter, hoy les his.

← Chapter 12 Jump to: Chapter 14 →