1 Chronicles 20

Romani Sinte 2024 (O Debleskro Lab 2024 (Sinte-Manouche))

← Chapter 19 Jump to: Chapter 21 →

1Oun ko bersh djas trouyel. Oun an ko tsiro, kay kol bare raya an o kourepen djan, djas o Yoab peskre lourdentsa an o kourepen. Oun yon kouran pen i Ammonentsa, kran lengro them paash oun čivan pen troul o foro Rabba. O David ačas an Yerusalem. Oun o Yoab las o foro Rabba dren oun das les an kotya.

2Palle vas ninna o David oun las o baro rayeske dran o them Ammon leskro shereskro sonakay tele. Kova his 35 (triyanda-te-panč) kilogramme pharo, oun ap leste his kouč barra. Oun kava shereskro sonakay čivan yon ap o Davideskro shero. Oun yob anas boud bravlepen dran ko foro krik.

3Kol menshen dran ko foro anas lo vin. Oun kolla hounte boudran phares ap i činepangre, te činenn le bar, oun ap i sasterne tover oun vavar sasterne koola. Yaake kras o David kol tsele foryentsa kol Ammonendar. Pal kova djas o David peskre tsele lourdentsa pale an o foro Yerusalem.

4Koy pal vas i vavar kourepen kol Filistarentsa pash o foro Geser. Koy das o Sibkay dran o gab Housha i vavar morshes kol bare menshendar moulo. Koleskro lab his Sippay. Yaake van i Filistarya dino.

5Pal kova vas pale i kourepen i Filistarentsa. Koy das o Elhanan, koleskro dad o Yayr his, o morshes Lami moulo. Kova hi i phraal o Goliatestar dran Gat. Koles his i lengsto vitsepaskro čouri. Oun ko kotar kasht, hoy ko vitsepaskro čouri rikrella, his yaake pesso har i tikno rouk.

6Pal kova vas pale i kourepen pash o foro Gat. Mank i Filistarya his i vavar baro morsh. Koles his shob goushte ap hako vast, oun shob tsebe ap hako piro.

7Oun yob praasas o Israel. Oun o Yonatan, koleskro dad o Shimea his, das les moulo. O Shimea his i phraal o Davidestar.

8Kolla his bare morsha oun djivan an o foro Gat. Oun kolla van moulo dino o Davidestar oun leskre lourdendar.

← Chapter 19 Jump to: Chapter 21 →