1 Chronicles 29

Romani Sinte 2024 (O Debleskro Lab 2024 (Sinte-Manouche))

← Chapter 28 Jump to:

1Oun o baro ray, o David, penas ap i tsele menshende, kay kote khetne his: “O Devel rodas yek mire čavendar vin, o Salomes: Yob hi terno oun djinell gomme gar, har te krell lo i kheer. Oun i kheer maro Debleske te krell, hi i bari boudi. Kova vell gar i kheer i mensheske, na-a, kova vell i kheer o baro Debleske.

2Miri tseli zoryah lom boud koova khetne o khereske miro Deblestar: o sonakay, roup, lolo saster oun vavar saster, oun kasht, te venn kol tsele koola kerdo, hoy an o kheer venna, ninna boud kouč barra, hoy lolo, zenelo, blaueto oun djelto hi oun boud parno marmor.

3Te krap o kheer miro Deblestar yaake shoukar har djala, dau ninna dran miro bravlepen

4triin zerya centnarya sonakay dran Ofir oun efta zerya centnarya lačo roup, te venn i massurya o kherestar koleha pral maklo.

5Kolestar, hoy pral ačell, vell roupeno oun sonakaskro koova kerdo, ninna ko vavar koova, hoy kolla krenna, kay hayvenn shoukar koova te krell. Kanna poučau t'mendar: Koon t'mendar della ninna čomone pestar o baro Debleske?”

6Har shounan kol laba i pralstoune pral i bare familyende oun pral i deesh-te-douy khera o Yakobeskre čavendar, ninna i pralstoune pral i lourdende, kolla pral yek zero oun kolla pral yek sheel, oun kol pralstoune pral ko tselo koova, hoy o baro rayeske his,

7dan le pendar o Debleskro khereske: 5.000 centnarya sonakay, 10.000 sonakangre kotya, 10.000 centnarya roup, 18.000 centnarya lolo saster oun 100.000 centnarya vavar saster.

8Oun kones kouč barra his, kova das len ninna pash o bravlepen an o baro Debleskro kheer. Ap ko bravlepen das o Yehiel, ko Gershonari, yak.

9Oun i tsele menshe his barhtelo, kay dan lengre pralstoune yaake boud kouč koova dran pengro vast pengro tselo djiyeha o baro Debleste. Oun ninna o baro ray David his barhtelo pral kova,

10oun sharas o baro Debles glan i tsele menshende, oun penas: Baro Devel, tou Devel maro dadestar Israel, mer sharah tout kanna oun hako tsiro.

11Baro Devel, tou hal o baro ray, hal zorelo, raylo, zorleder har hako vavar, oun o pralstouno pral hako vavareste. Halauter, hoy an o bolepen oun ap i phoub hi, hi tiro. Tou hal o ray pral i tsele themma, oun tout hi penepaske pral halauter.

12Bravlepen oun sharepen vell toutar. Tou kokres hal o ray. Tou kreh zorelo oun baro, oun nay kreh i menshes baro oun zorelo.

13Maro Devel, mer parkrah men pash toute, oun sharah tiro raylo lab.

14Me hom či, oun mire menshe hi či. Mendar nay dah tout gar savo boud koova! Lauter, hoy men hi, vell toutar. Ninna kava koova, hoy dam toute, lam toutar.

15Har mare phoure ham mer ninna vi-themarya glan toute, ham i tikno tsiro ap kay phoub oun djah doureder. Maro djipen ap kay phoub hi har i shatto oun ačell gar.

16Baro Devel, maro ray, kava tselo bravlepen, hoy khetne anam, te kras mer touke i kheer, te vell tiro lab sharedo, kova lauter vas toutar oun hi tiro.

17Miro Devel, djinau, te dikeh an o dji. Oun touke hi mishto, te hi i menshes i čačo dji. Doleske dom tout kava lauter mandar dran i čačo dji, oun hom barhtelo te dikau, kay tire menshe, kay kate glan touke tardo hi, toute ninna lauter pendar vin dan.

18Baro Devel, tou Devel mare phourendar, o Abrahamestar, o Isaakestar oun o Yakobestar, kre, kay tire menshengre djia hako tsiro touke pre hi, oun yon pen ap toute rikrenn!

19Oun miro čaveste Salomo de i čačo dji, te rikrell lo tire laba, oun krell, hoy tou lestar kameh, oun djivell pal tiro čačepen; te krell yob ninna lauter, te vell touke kava kheer kerdo, koleske kava tselo koova khetne anom.

20Oun o David penas ap i tsele menshende, kay kote khetne his: “Sharenn t'maro baro Debles!” Koy sharan i tsele menshe o baro Debles, ko Debles lengre phourendar. Oun yon djan ap pengre čanga glan o baro Debleste oun glan o baro rayeste,

21oun anan o baro Debleske firhen. O vavar dives, taysarla, maran le o baro Debleske save firhen, kay van leske tseles rhačedo: yek zero terne gourma, yek zero morsh bakre, oun yek zero terne bakre. Ninna čoran le mool vin o baro Debleske, oun maran leske boud firhen, hoy rhan i tsele Israelitarya khetne glan leste.

22Oun yon rhan oun piyan ap ko dives glan o baro Debleste. Oun o douyto kopo kharan le vin, kay o Davideskro čavo, o Salomo, o baro ray hi. Oun yon čoran djet ap leskro shero, te vell yob o baro Debleske koy. Ninna čoran le djet ap o shero o morshestar Zadok, te vell yob o rashay.

23Palle beshas pes o Salomo ap o rayeskri beshepaskri, oun vas o baro ray pral o baro Debleskre menshende, yaake har glan leste leskro dad, o David his. Oun i menshe dikan pre ap leste oun shounan ap leste.

24Oun i tsele pralstoune oun zorele kourepangre, ninna o Davideskre vavar čave, čivan pen tel leste.

25Oun i tsele Israelitarya nay dikan, har kras o baro Devel, te vas o Salomo bareder oun bareder. O Salomo vas an-diklo oun sharedo har kek vavar ray pral Israel glan leste.

26O David, koleskro dad o Isay hi, his star-deesh bersha o baro ray pral o tselo Israel. An ko tsiro djivas lo an o foro Hebron efta bersha oun an o foro Yerusalem triyanda-te-triin bersha.

28Oun yob his i bravelo oun an-diklo morsh. Les his i rah djipen. Oun yob meras an o mishto phourepen. Oun pal leste vas peskro čavo, o Salomo, o baro ray.

29Ko tselo vavar koova, hoy pral o Davideskro djipen penepaske hi, kova hi činlo an kol triin lila: O liil pral o dikepaskro, o Samuel, oun o liil pral o Debleskro rakepaskro, o Natan, oun o liil pral o dikepaskro, o Gad.

30Kote hi tardo, havo baro ray oun zorelo kourepaskro yob his, oun hoy an ko tsiro djas an Israel oun an i vavar themma trouyel.

← Chapter 28 Jump to: