1 Chronicles 22

Romani Sinte 2024 (O Debleskro Lab 2024 (Sinte-Manouche))

← Chapter 21 Jump to: Chapter 23 →

1Oun o David penas: “Kate te vell o kheer o baro Debleske tardo. Kate krah leske i rhačepaskri, kay i Israelitarya nay rhačrenn firhen leske.”

2Oun o David moukas i vi-themaryen khetne te vell, kay djivenn an o them Israel. Oun yob das len koy boudi, te denn le barra o khereske o baro Deblestar.

3Oun o David moukas boud saster te anell, te venn lestar nagle i voudyenge oun sasterno pandepen kerdo, ninna boud lolo saster, yaake boud, te nashte kek penas, har boud ko lolo saster hi.

4I menshe dran Sidon oun Tirus anan o Davideske boud cedertikro kasht. Yaake his les yaake boud cedertikro kasht, kay kek nay penas har boud.

5O David penas peske: Miro čavo, o Salomo, hi terno oun djinell gomme gar, har te krell i kheer; ko kheer o baro Debleske hounte vell yaake baro oun raylo, te nay vell lo prindjedo oun sharedo an i tsele themma. Doleske kamau me leske doha koova koy te čivell. Oun yaake las o David boud koova khetne glan leskro merepen.

6Oun yob kharas peskro čaves, o Salomo, pash peste, oun penas leske, te krell lo i kheer o baro Debleske, kay o Israeleskro Devel hi.

7Oun o David penas ap o Salomo: “Miro čavo, an miro dji his, te krap i kheer o baro Debleske, kay miro Devel hi.

8Koy penas o baro Devel mange: Tou maral boud menshen, oun tout his baro kourepen. Dikom ko rat, hoy ap i phoub nashas. Doleske kress tou mange kek kheer.

9Dik, i čavo vell touke boldo, yob vell i morsh, kay djinell kek kourepen. Me krau te kourell pes kek leha kolendar halauterendar, kay troul t'mende djivenn. Yaake rah har yob djivell, nay djivenn i Israelitarya kek kourepah oun marepah. Doleske de les o lab Salomo.

10Kova te krell mange i kheer. Oun yob mou vell miro čavo, oun me kamau leskro dad te vell. Oun me krau, te vell hako tsiro yek leskre čavendar o ray pral Israel.

11Kanna, miro čavo, mou vell o baro Devel ap tiri rig, te nay kreh tiro baro Debleske i kheer, yaake har yob toutar penas.

12Mou dell lo tout gosvepen, te djiness, hoy te kress. Yob krell tout ray pral Israel, te djas ap leskro drom.

13Te rikreh tout ap kol laba, hoy o baro Devel o Moseske penas, te djivell o Israel koy pal, oun kreh pal o Debleskro čačepen, palle djal touke tiri boudi mishto. Ab zorelo! Oun ma traash! Ma dare či! Oun ma traash kekestar!

14Oun kanna dik, me marom man tele te anom boud koova khetne o khereske o baro Deblestar: sheel zerya (100.000) centnarya sonakay oun i zero zerya (1.000.000) centnarya roup; koy pashel lolo saster oun vavar saster yaake boud, kay nay penau gar har boud kova hi. Ninna moukom kasht oun barra te anell. Oun tou nay čiveh gomme boudeder pashel.

15Oun boud boudepangre hi koy: save, kay denn barra, save kay boudrenn kashteha, ninna boud morsha, kay hayvenn mishto čomone te krell dran o sonakay, roup, lolo saster, oun vavar saster. Ste pre, oun kre tout ap i boudi! Oun o baro Devel te vell touha!”

17Oun o David penas ap i tsele pralstunende pral Israel, te venn le leskro čaveske Salomo ap i rig tardo.

18Yob penas: “T'maro baro Devel hi pash t'mende! Yob kras, te han an kek kourepen kol thementsa troul t'mende. Yob das len an miro vast, oun o baro Devel oun leskre menshe hi o ray pral lende.

19Kanna denn t'maro djipen oun t'maro dji o baro Debleste, kay t'maro Devel hi! Oun stenn pre oun krenn leske i kheer, kay leske kokres hi. Kote te vell o morhton o baro Debleskre deesh labentsa dren čiddo, ninna ko vavar Debleskro koova. Kava kheer krenn t'mer, te vell o baro Devel sharedo.”

← Chapter 21 Jump to: Chapter 23 →