1 Chronicles 5

Romani Sinte 2024 (O Debleskro Lab 2024 (Sinte-Manouche))

← Chapter 4 Jump to: Chapter 6 →

1O Ruben his o Yakobeskro phoureder čavo. Doleske his les o čačepen, hoy o phoureder čaveske hi. Kova nashras lo, har sovas lo peskro dadeskri romyah. Oun o Rubeneskro čačepen vas i čavenge leskro phralestar Yosef dino. Ninna te his kova yaake, vas gar činlo an i familyakro liil, te his o Yosef o phoureder.

2O zorleder mank peskre phrala his o Youda. Doleske vas yek dran o kheer Youda o baro ray pral Israel, ninna te his o Yosefes o čačepen, hoy i phoureder čaveske hi.

3O Ruben his o Yakobeskro phoureder čavo. Leskre čave his: o Henok, o Pallou, o Hesron oun o Karmi.

4O Yoel, leskre čave his: o Shemaya, koleskro čavo his o Gog, koleskro čavo his o Shimi,

5koleskro čavo his o Mika, koleskro čavo his o Reaya, koleskro čavo his o Baal,

6koleskro čavo his o Beera. Koles anas o Tiglat-Pileser, o baro ray pral o them Assour, pandles an leskro them. Ap ko tsiro his lo o pralstouno pral o kheer Ruben.

7Vavar i menshendar Ruben his pengre menshentsa pre-činlo an o familyakro liil. Kolla his o pralstouno o Yehiel, palle o Zakarie,

8oun o Bela, koleskro dad o Asa his, koleskro dad o Shema his, koleskro dad o Yoel his. I menshe dran o kheer Ruben djivan an o them troul Aroer bis pash o Nebo oun Baal-Meon.

9Oun kote, kay o kham pre djala djivan le bis an o moulo them dren, hoy pash o lengsto pani Eufrat čiddo hi. Len his boud firhe an o tselo them Gilead.

10An ko tsiro, kay o Saul djivas, djan le an o kourepen i menshentsa, kay kharenn Hagararya, oun van zorleder har yon. Oun yaake djivan yon an kolengre plarhtene khera ap kay tseli rig o themestar Gilead, kay o kham pre djala.

11Oun i menshe dran o kheer Gad djivan vergel i menshende dran o kheer Ruben, an o them Bashan bis pash Salka.

12Lengro pralstouno his o Yoel. Ko douyto his o Shafam. Pal lende van o Yanay oun o Shafat. Kolla djivan an Bashan.

13Oun lengre phrala pengre familyentsa his: o Mikael, o Meshoullam, o Sheba, o Yoray, o Yakan, o Sia oun o Eber. Khetne his le efta.

14Kolengro dad his o Abihayil, koleskro dad his o Houri, koleskro dad o Yaroa, koleskro dad o Gilead, koleskro dad o Mikael, koleskro dad o Yeshishay, koleskro dad o Yado, koleskro dad o Bouz.

15Lengro pralstouno his o Ahi, koleskro dad o Abdiel his, koleskro dad o Gouni his.

16Kal menshe djivan an Gilead, an o them Bashan oun an kol forya, kay kote his, oun ap kol tsele platse, kay lengre firhe his an o tselo them Sharon bis ap leskre rigya.

17An ko tsiro, kay o Yotam o ray pral o them Youda his, oun o Yerobeam o ray pral o them Israel his, van i laba kal tsele morshendar pre-činlo an o familyakro liil.

18I lourde dran i khera Ruben oun Gad oun dran i paash familya Manasse his 44.760 (star-deesh-te-star-zerya-efta sheel-te-shob-deesh) morsha. Kolen his shilte, rhare oun boge oun his lače kourepangre.

19Yon kouran pen i menshentsa dran i khera Yetour oun Nafish oun Nodab. Kolla his Hagararya.

20Oun i lourde dran i khera Ruben oun Gad oun Manasse dikan ap o baro Debleste oun dan gole ap leste, te vell lo lenge ap i rig. Oun yob shounas ap lende, oun das i Hagararya an lengre vasta oun lauteren, kay pash lende his.

21Oun yon tapran lengre firhe: 50.000 (paash-sheel zerya) khamele, 250.000 (douy-sheel-te-panč-deesh zerya) bakre, 2.000 (douy zerya) bourike, oun yon lan penge 100.000 (sheel zerya) morshen oun djouvyen oun kran lendar pandepangre.

22Ninna ačan boud maredes čiddo. Kava kourepen vas o Deblestar. Oun i Israelitarya djivan an lengro them ap lengri phoub bis te van le pandles krik anlo.

23Oun koy paash familya Manasse djivas an o them mank Bashan oun Baal-Hermon oun bis pash o Senir oun i berga Hermon. Oun yon van boud oun boudeder.

24Oun kalla his i pralstoune pral pengre dadengre khera: o Efer, o Yishi, o Elyel, o Asriel, o Yeremia, o Hodavya oun o Yadiel. Yon lauter his zoreles an o kourepen oun morsha o labestar.

25Oun yon peran tele lengro dadengro Deblestar, oun mangan i deblen kol vavar menshendar an, kolen o Devel glan lende vin tradas dran o them.

26Kote bičras o Israeleskro Devel pral lende o baro rayes dran o them Assour, o Poul, – leskro lab hi ninna Tiglat-Pileser – oun yob moukas i menshen dran o kheer Ruben oun Gad oun i paash familya dran o kheer Manasse pandles krik te anell, oun anas len an i themma troul i forya Hala oun Habor oun Hara oun pash o lengsto pani Gosan. Kote hi le gomme kava dives.

27O Levi: Leskre čave his: o Gershon, o Kohat oun o Merari.

28O Kohat, leskre čave his: o Amram, o Yizhar, o Hebron, oun o Usiel.

29O Amram, leskre čave his: o Aron oun o Mose, yaake har ninna i Miryam. O Aron, leskre čave his: o Nadab oun o Abihu, o Elazar oun o Itamar.

30O Elazar his o dad o morshestar Pinhas, leskro čavo his o Abishoua,

31koleskro čavo his o Boukki, koleskro čavo his o Usi,

32koleskro čavo his o Zeraya, koleskro čavo his o Merayot,

33koleskro čavo his o Amarya, koleskro čavo his o Ahitoub,

34koleskro čavo his o Zadok, koleskro čavo his o Ahimaaz,

35koleskro čavo his o Asarya, koleskro čavo his o Yohanan,

36koleskro čavo his o Asarya. Kova hi ko rashay, kay kras i rashayeskri boudi an o Debleskro kheer, hoy o Salomo moukas te krell an o foro Yerusalem.

37O Asarya his o dad o morshestar Amarya, koleskro čavo his o Ahitoub,

38koleskro čavo his o Zadok, koleskro čavo his o Shalloum,

39koleskro čavo his o Hilkiya, koleskro čavo his o Asarya,

40koleskro čavo his o Seraya, koleskro čavo his o Yozadak,

41Oun o Yozadak vas pandles krik anlo kol menshentsa dran Youda oun Yerusalem. Kolen das o baro Devel an o vast o baro rayestar Neboukadnezar, oun kova moukas len pandles krik te anell.

← Chapter 4 Jump to: Chapter 6 →