1 Chronicles 19

Romani Sinte 2024 (O Debleskro Lab 2024 (Sinte-Manouche))

← Chapter 18 Jump to: Chapter 20 →

1Pal ko tsiro meras o Nahash, ko baro ray pral kol Ammonarya. Oun leskro čavo, o Hanoun, vas baro ray pal leste.

2Koy penas peske o David: “Me kamau o čaveha o Nahashestar, o Hanoun, maal te vell, yaake har leskro dad miro maal his.” Oun o David bičras morshen koy, oun moukas leske kamle laba te penell pral leskro dadeste, te vell leske gar bouder ropaske. Har kanna kolla, kay o David bičras, an ko them Ammon van pash o Hanoun, te penenn le leske kamle laba,

3koy penan kol pralstoune pral kol Ammonarya ap o Hanoun: “Patseh tou čačepah, kay bičras o David morshen, te sharenn le tiro dades glan tire yaka, oun te penenn le touke kamle laba pral leste? Patseh tou gar, kay yob doleske morshen pash toute bičras, te dikenn le pal, har zorelo maro them hi, oun hoy koy glan djala, te lell lo les dren?”

4Koy tapras o Hanoun kolen, kay o David bičras, oun moukas lenge i balla oun i čor tele te činell, oun i koola paash tele činell, bis pral i herya, oun moukas len te djal.

5Oun yon djan penge. Kova, hoy lentsa kerdo vas, his i bari ladj kol morshenge. Har o Davideske kova penlo vas, bičras yob morshen pash lende, oun moukas lenge te penell: “Ačenn an o foro Yericho, bis te t'mari čor pale bares vas! Koy pal avenn pale!”

6Har o Hanoun oun kol Ammonarya dikan, kay kran le o Davides moulo rhoyedo, lan le yek zero centnari roup, oun bičran kava roupeha morshen an i themma Mesopotamia oun Syria, oun kote an i tikne themma Maaka oun Soba, te ginenn le kote lourden oun kourepangre vourdya oun klissepangre.

7Oun yon lan penge 32.000 kourepangre vourdya, oun o baro rayes dran Maaka oun leskre lourden. Kolla van oun čivan pengre plarhtene khera pre glan o foro Medeba. Oun i Ammonarya van ninna dran pengre forya oun van khetne kourepaske.

8Har kova o David shounas, bičras yob o Yoabes pash lende peskre tsele zorele lourdentsa.

9Oun kol Ammonarya djan vin an o kourepen, oun ačan tardo pash ko baro voudar lengro forestar. Kol raya dran Syria his kokres penge tardo ap i kotar phoub.

10Oun o Yoab dikas, kay kolla kaman pen leha te kourell, oun van foun glan oun pal. Koy rodas yob peskre feteder morshen vin, te kourenn pen kolla kol lourdentsa dran o them Syria.

11Kol vavar lourden čivas yob tel o vast peskro phralestar Abishay, te kourenn pen kolla kol Ammonentsa.

12Oun penas ap leste: “Te hi kol Syrarya zorleder har me, veh tou ap mari rig. Te hi kol Ammonarya zorleder har tou, vau me ap tiri rig.

13Ma dare, las men khetne te kouras kek daryah mare menshenge oun kol foryenge maro Deblestar! O baro Devel krella, hoy mishto hi an leskre yaka.”

14O Yoab vas kol lourdentsa, kay pash leste hi, te kourenn le pen kolentsa dran Syria. Kolla nashan penge lendar.

15Har kol Ammonarya dikan, kay kol Syrarya nashan, nashan yon ninna glan o Abishay, oun tserdan pen pale an o foro dren. Oun o Yoab vas pale pale an o foro Yerusalem.

16Har i Syrarya dikan, kay yon i Israelendar dino his, bičran le morshen pash i Syrarya, kay djivenn vergel o pani Eufrat, oun moukan len gole te dell, te djan yon ninna an o kourepen. Oun o Shobak, ko pralstouno lourdo ko baro rayestar Hadad-Eser, djas glan lende.

17Oun o Davideske vas kova penlo. Oun yob las o tsele Israelitaryen khetne oun djas pral o pani Yordan. Oun har yob pash lende vas, čivas lo peskre lourden vergel lendar pre. Oun i Syrarya kouran pen leha.

18Oun kol Syrarya hounte nashan penge i Israelendar. Oun o David maras lendar 7.000 (efta-zerya) morshen, kay ap i kourepangre vourdya his, oun 40.000 (star-deesh-zerya) lourden. Oun o Shobak, ko pralstouno lourdo o baro rayestar Hadad-Eser, koles maras lo ninna.

19Oun kol tsele raya, kolengro pralstouno o Hadad-Eser hi, dikan, kay i Israelitarya i zorleder hi pral lende. Koy moukan le tele, te kourenn le pen o Davideha. Oun les vas penepaske pral lende. Oun kol Syrarya kaman bouder gar i lourdenge dran Ammon ap i rig te vell.

← Chapter 18 Jump to: Chapter 20 →