1 Chronicles 24

Romani Sinte 2024 (O Debleskro Lab 2024 (Sinte-Manouche))

← Chapter 23 Jump to: Chapter 25 →

1Kolla hi i laba kol morshendar, kay his i pralstoune pral i rashayende, kay hako kopo khetne boudran an o baro Debleskro kheer. O Aroneskre čave his: o Nadab, o Abihu, o Elazar oun o Itamar.

2O Nadab oun o Abihu meran, har o Aron gomme djido his, oun len his kek morsh čave. O Elazar oun o Itamar van rashaya.

3Oun o David čivas dran kol douy familya i morshen yaake khetne, har hounte boudrenn le khetne. O Zadok dran o kheer Elazar oun o Ahimelek dran o kheer Itamar, van leske koy pashel ap i rig.

4Koy hatsan le vin, kay his boudeder morsha an o kheer Elazar har an o kheer Itamar. Oun yon lan 16 (deesh-te-shob) pralstoune dran o kheer Elazar oun orhta pralstoune dran o kheer Itamar.

5An kol douy khera his pralstoune pral o Debleskro kheer oun rashaya. Oun yon vitsran barra, te dikenn le, havi boudi hakeno hounte krella.

6Oun o Shemaya, ko Levitari, koleskro dad o Netanel his, činas lengre laba pre, hako kopo douy dran o kheer Elazar oun yek dran o kheer Itamar. Koy pashel his o baro ray, i pralstoune, o rashay Zadok, o Ahimelek, koleskro dad o Abyatar his, i pralstoune pral i familyende o rashayendar oun o Levitarendar.

7Oun yaake har i barra peran, van le vi-rodedo: 1. o Yoyarib; 2. o Yedaya; 3. o Harim; 4. o Seorim; 5. o Malkiya; 6. o Miyamin; 7. o Hakkoz; 8. o Abiya; 9. o Yeshoua; 10. o Shekanya; 11. o Elyashib; 12. o Yakim; 13. o Houppa; 14. o Yeshebab; 15. o Bilga; 16. o Immer; 17. o Hesir; 18. o Pizez; 19. o Petaya 20. o Yeheskel; 21. o Yakin; 22. o Gamul; 23. o Delaya; 24. o Maasya.

8Kalla hi i rashaya, kay van vi-rodedo, te venn le i pralstoune pral kol rashayende, kay hounte boudrenn khetne an o baro Debleskro kheer, yaake har lengro phouro dad, o Aron, lenge glan činas. Kova kras o Aron yaake, har penas leske o baro Devel, kay o Israeleskro Devel hi.

9Kalla hi vavar pralstoune dran i familye, kay van pal o Levi: dran i familya Amram: o Shebouel; dran i familya Shebouel: o Yedia;

10dran i familya Rekabya: o Issia, ko phoureder čavo;

11dran i familya Yizhar: o Shelomit; dran i familya Shelomit: o Yahat.

12I čave o morshestar Hebron his: o Yeriya, ko phoureder čavo, o Amarya, ko douyto čavo, o Yaziel, ko triinto, o Yekamam, ko starto;

13dran i familya Usiel: o Mika; dran i familya Mika: o Shamir.

14O Mikaeskro phraal his o Issia; dran i familya Issia: o Zakarie.

15I čave o morshestar Merari his: o Mali oun o Moushi oun o Yaasiya;

16dran i familya Yaasiya: o Shoham, o Zakour oun o Ibri,

17dran i familya Mali: o Elazar; koles his kek morsh čave.

18dran i familya Kish, o Yerameel.

19I čave o morshestar Moushi his: o Mali, o Eder oun o Yeremot. Kolla hi i Levitarya, pre činlo an i liil pal pengre familye.

20Yaake har lengre phralenge, kol rashayenge dran o kheer Aron, van ninna kal morshenge barra vitsedo, te sikrenn le, havi boudi yon hounte krenna: i pralstunenge yaake har i ternenge. Oun o baro ray David his koy pashel, ninna o Zadok oun o Ahimelek oun i pralstoune pral i familyende i rashayendar oun i Levitarendar.

← Chapter 23 Jump to: Chapter 25 →