1 Chronicles 15

Romani Sinte 2024 (O Debleskro Lab 2024 (Sinte-Manouche))

← Chapter 14 Jump to: Chapter 16 →

1Oun o David moukas peske khera te krell an o Davideskro foro. Yob rodas ninna i kotar phoub vin, kay te vell o morhton o Debleskre deesh labentsa pre čiddo, oun moukas leske i plarhteno kheer pre te čivell.

2An ko tsiro penas o David: “Kek hounte hidjrell o morhton o Debleskre deesh labentsa, har kokres i Levitarya, kolen rodas o baro Devel vin, te hidjrenn yon ko morhton, oun te boudrenn yon leske hako tsiro.”

3Oun o David moukas i tsele Israelitaryen an o foro Yerusalem khetne te vell, te nay anenn le o morhton o baro Debleskre deesh labentsa ap ko kotar phoub, kay vas leske vin rodedo.

4Oun o David moukas ninna i čave o rashayestar Aron khetne te kharell oun i Levitarya:

5i čavendar o morshestar Kohat: o Ouriel, ko his o pralstouno, oun leskre phrala; khetne his le 120 morsha;

6i čavendar o morshestar Merari: o Asaya, ko his o pralstouno, oun leskre phrala; khetne his le 220 morsha;

7i čavendar o morshestar Gershon: o Yoel, ko his o pralstouno, oun leskre phrala; khetne his le 130 morsha;

8i čavendar o morshestar Elizafan: o Shemaya, ko his o pralstouno, oun leskre phrala; khetne his le 200 morsha;

9i čavendar o morshestar Hebron: o Elyel, kova his o pralstouno, oun leskre phrala; khetne his le 80 morsha;

10i čavendar o morshestar Usiel: o Amminadab, ko his o pralstouno, oun leskre tsele phrala; khetne his le 112 morsha;

11Oun o David moukas i rashayen o Zadok oun o Abyatar pash peste te vell, ninna i Levitaryen, o Ouriel, o Asaya, o Yoel, o Shemaya, o Elyel, oun o Amminadab.

12Oun yob penas ap lende: “T'mer han i pralstoune pral t'mare menshende dran o kheer Levi. Krenn t'men djoudjo o Debleske, t'mer oun t'mare phrala, te nay anenn o morhton o deesh labentsa o baro Deblestar, kay o Israeleskro Devel hi, ap ko kotar phoub, hoy me rodom leske vin!

13Ko vavar kopo hans t'mer gar koy pashel. Doleske das men o baro Devel i pharo dap. Mer poučam lestar gar yaake har hounte vals.”

14Koy kran pen i rashaya oun i Levitarya djoudjo o Debleske, te nay anenn le o morhton koy pral.

15Oun i Levitarya hidjran o morhton ap pengre phika i hidjepaskre kashtentsa, yaake har o baro Devel penas kova o Moseske, oun kova les i Israelenge penas.

16Oun o David penas i pralstunenge pral i Levitarya, te rodenn yon gipangren vin dran pengre phralende. Kalla hounte givenn i barhtyatar i bari golyah, oun bashrenn ap i doryengre bashepangre oun vavar bashepangre.

17Koy rodan i Levitarya o gipaskres o Heman vin, koleskro dad o Yoel hi, oun leskro phrales, o Asaf, koleskro dad o Berekia hi. Ninna rodan le o Etan vin, koleskro dad o Koushaya hi, dran i familya Merari.

18Oun lenge ap i rig van: o Zakarie, o Ben-Yaziel, o Semiramot, o Yehiel, o Ounni, o Eliab, o Benaya, o Maasseya, o Mattitya, o Elifelehu, o Mikneya, o Obed-Edom, o Yehiel, kolendar, kay dan garda ap i voudya.

19Oun i gipangre his: o Heman, o Asaf, oun o Etan. Kolla dan ap i sasterne patria dran lolo saster.

20Oun kolla, kay bashrenn ap i harfa, his o Zakarie, o Yaasiel, o Semiramot, o Yehiel, o Ounni, o Eliab, o Maasseya, oun o Benaya.

21Oun kolla, kay bashrenn ap orhta-doryengre bashepangre his: O Mattitya, o Elifelehu, o Mikneya, o Obed-Edom, o Yehiel, oun o Asasya.

22O Kenanya, o pralstouno pral i Levitarya, his o pralstouno pral o gipen, yob hayvas kova mishto, oun sikras i vavarende, har te givenn le.

23Oun o Berekia oun o Elkana, his douy kolendar, kay dan yak ap o morhton o Debleskre deesh labentsa.

24Glan o morhton djan i rashaya: o Aba, o Shebanya, o Yosafat, o Netanel, o Amasay, o Zakarie, o Benaya, oun o Eliyeser. Yon phourdan an bare phourdepangre. Oun o Obed-Edom oun o Yehiya djan pal o morhton oun dan yak ap leste.

25Oun o David oun i phoureder dran Israel djan kote, te anenn le o morhton o Debleskre deesh labentsa pre dran o kheer o morshestar Obed-Edom. Lentsa djan i pralstoune pral i lourdende, kolla pral yek zero oun kolla pral yek sheel. Halauteren his barhtele djia.

26Oun o Devel his i Levitarentsa, kay o morhton hidjrenn, kay o baro Debleskre deesh laba dren hi, oun lauter djas mishto. Doleske maran le leske efta terne gourma oun efta morsh bakre.

27Oun o Davides his i plaashka dran biyalo layntikro than ap peste. Oun yaake his ninna i tsele Levitarya an-rido, kay o morhton hidjrenn, ninna i gipangre oun o Kenanya, ko pralstouno pral i gipangre. Oun o David his ninna i layntikri damdira ap peste, har i rashaya hidjrenn.

28Yaake anan i tsele Israelitarya o morhton o baro Debleskre deesh labentsa pral an Yerusalem. Yon dan gole i barhtyatar, givan oun bashran ap phourdepangre, doryengre bashepangre oun vavar bashepangre.

29Oun har vas o morhton o baro Debleskre deesh labentsa an o Davideskro foro anlo, dikas i Mikal, kolakro dad o Saul his, dran i vorhni. Oun har dikas li o baro rayes, o David, har yob stas oun khelas, dikas li tele ap leste an lakro dji.

← Chapter 14 Jump to: Chapter 16 →