1 Chronicles 25

Romani Sinte 2024 (O Debleskro Lab 2024 (Sinte-Manouche))

← Chapter 24 Jump to: Chapter 26 →

1Oun o David khetne i pralstunentsa pral i lourdende, rodas i gipangre oun bashepangre vin, te givenn le Debleskre gilya, bashrenn ap doryengre bashepangre, oun denn ap sasterne patria. Kolla van dran i khera Asaf, Heman oun Yedoutoun.

2I čave o morshestar Asaf: o Zakour, o Yosef, o Netanya, o Asarela. Lengro dad his lengro pralstouno. Koleske penas o David, te krell lo Debleskre gilya.

3I čave o morshestar Yedoutoun: o Gedalya, o Zeri, o Yesaya, o Hashabya, o Mattitya, o Shimi. Khetne his le shob. Lengro dad his lengro pralstouno, kay bashras ap i doryengri bashepaskri, har givas lo Debleskre gilya, te hadell lo oun sharell lo o baro Debles.

4I čave o morshestar Heman: o Boukkiya, o Mattanya, o Usiel, o Shebouel, o Yerimot, o Hananya, o Hanani, o Elyata, o Giddalti, o Romamti-Ezer, o Yoshbekasha, o Malloti, o Hotir oun o Mahasiot.

5Kalla lauter his o Hemaneskre čave. Yob his o baro rayeskro dikepaskro. O Devel penas leske, te krell lo les an-diklo, oun das les deesh-te-star morsh čave oun triin ča.

6Kalla lauter givan an o baro Debleskro kheer oun bashran ap sasterne patria oun doryengre bashepangre, yaake har o baro ray penas. Lengre dada, o Asaf, o Yedoutoun oun o Heman his i gipangre raya.

7Khetne lengre phralentsa, kay hayvan ninna mishto te givell o baro Debleske, his le 288 (douy-sheel-orhta-desh-te-orhta) morsha – lauter lače gipangre.

8Oun yon vitsran barra, te hatsenn le vin, koon pal koneste o gipaske oun bashepaske an o Debleskro kheer hounte djal.

← Chapter 24 Jump to: Chapter 26 →