1 Chronicles 26

Romani Sinte 2024 (O Debleskro Lab 2024 (Sinte-Manouche))

← Chapter 25 Jump to: Chapter 27 →

1Kolla hi i morsha, kay dan garda ap i voudya. Dran o kheer Korah vas o Meshelemya, leskro dad his o Kore, leskro papo o Abiasaf.

2O Meshelemya, les his čave: o phoureder his o Zakarie, o douyto o Yedjael, o triinto o Sebadja, o starto o Yatniel,

3o pančto o Elam, o shobto o Yohanan, o eftato o Elyoenay.

4O Obed-Edom: O Devel his leske lačes oun das les boud čave: o phoureder his o Shemaya, o douyto o Yosabad, o triinto o Yoa, o starto o Sakar, o pančto o Netanel, o shobto o Ammiel, o eftato o Issakar, o orhtato o Pehoulletay;

6Oun leskro čaveske, o Shemaya, van ninna čave boldo. Yon his an-dikle morsha, oun van pralstoune pral pengre menshende.

7Yon his o Otni, o Refael, o Obed oun o Elsabad oun leskre phrala, o Elihou oun o Semakya. Kolla his an-dikle morsha.

8Kalla lauter his i morsha, kay van pal o Obed-Edom. Yon pengre čaventsa oun phralentsa his an-dikle morsha, kay hayvan mishto pengri boudi te krell. Khetne his le 62 (shob-deesh-te-douy) morsha.

9I morsh čave oun phrala o morshestar Meshelemya his 18 (deesh-te-orhta).

10Dran i familya Merari vas o Hosa. Koles his star čave: o ersto his o Shimri, o douyto o Hilkiya, o triinto o Tebalya, o starto o Zakarie. O phoureder his bouder gar koy. Doleske kras o Hosa, te vell peskro čavo Shimri o pralstouno. I tsele morsh čave oun phrala o morshestar Hosa his 13 (deesh-te-triin).

12Kal morsha dan garda ap i voudya glan o Debleskro kheer. Hako kopo boudras yek pralstouno kol morshentsa dran peskri familya khetne. Yaake har lengre phrala, i vavar Levitarya, kran le pengri boudi ap o baro Debleskro kheer.

13Oun yon vitsran barra, te dikenn le, havi familya dell garda ap havo voudar. Kova kran le i tikne har i bare familyentsa.

14O voudar, hoy ap i glanstouni rig hi, koleske peran i barra ap o Meshelemya. O voudar, hoy ap i servi rig hi, koleske peran i barra ap leskro čavo, o Zakarie. Kova his i gosevo morsh, kay djinas, hoy te krell.

15O Obed-Edom hounte das garda ap o voudar, hoy ap i čači rig his, oun leskre čave ap o djobeskro kheer.

16O Shouppim oun o Hosa hounte dan garda ap o voudar hoy ap i palstouni rig hi, ninna ap o voudar, hoy kharell Shalleket, kay o drom pre djal. Yaake hounte denn i morsha garda:

17Ap i glanstouni rig hounte venn shob morsha tardo hako dives, ap i servi rig star morsha, ap i čači rig star morsha, pash o djobeskro kheer douy morsha,

18ap i palstouni rig, star pash o drom oun douy pash koy platsa, hoy kharell Parbar.

19Yaake hi glan činlo, har i voudyengre morsha hounte yak denn. Yon lauter van dran i familye Korah oun Merari.

20Vavar Levitarya dan yak ap o bravlepen an o Debleskro kheer oun ko kouč koova, hoy i menshe o Debleske dan.

21Mank lende his i čave o morshestar Ladan dran o kheer Gershon. Yon his i pralstoune mank pengre menshende. Mank lende his o Yehiel.

22Leskre čave, o Setam oun o Yoel, dan yak ap o bravlepen an o baro Debleskro kheer.

23Vavar morsha, kay dan garda ap o Debleskro bravlepen, his dran i familye Amram, Yizhar, Hebron oun Usiel.

24O Shebouel, koleskro dad o Gershon his, oun koleskro dad o Mose his, kova his o pralstouno pral o bravlepen.

25Leskro phraal, o Eliyeser, les his i čavo: o Rekabya; koleskro čavo his o Yesaya, koleskro čavo his o Yoram, koleskro čavo his o Zikri, koleskro čavo his o Shelomit.

26Kava morsh Shelomit oun leskre phrala his i pralstoune pral o kouč koova, hoy o Debleske dino vas. Kava koova anan o baro ray David oun i pralstoune pral i familyende, ninna i pralstoune pral i lourdende, kolla pral yek zero lourdende oun kolla pral yek shelende oun vavar bare lourde.

27Dran kova, hoy anan le pentsa khere dran o kourepen, dan le les, te vell o baro Debleskro kheer kerdo.

28O Shelomit oun leskre phrala his i pralstoune pral halauter, hoy o Debleske dino vas, ninna pral kova, hoy glan ko tsiro o dikepaskro o Samuel o Debleske anas, oun o Saul, koleskro dad o Kish his, oun o Abner, koleskro dad o Ner his, oun o Yoab, koleskri day i Serouya his.

29Dran o kheer Yizhar lan le o Kenanya oun leskre morsh čave, te venn yon pralstoune oun čačepangre morsha an Israel.

30Dran o kheer Hebron, lan le o Hashabya oun leskre phrala, te denn yon yak, te vell halauter mishto kerdo, hoy o baro Debleske oun o baro rayeske kerdo vell an o them ap i vavar rig o panyestar Yordan. Yon khetne his 1.700 an-dikle morsha.

31O pralstouno pral o kheer Hebron peskre tsele familyentsa his o Yeriya. Har his o David an o star-deshto bersh o baro ray, rodan le an-dikle morsha mank lende oun hatsan len an o foro Yaser an o them Gilead.

32O Yeria, les his 2.700 an-dikle morsha mank peskre menshende. Kolla his pralstoune pengre familyendar. Oun o David čivas len oun lengro pralstouno, o Yeriya, pral i familyende Ruben oun Gad oun pral i paash familya Manasse, te denn le yak, kay kolla pengri boudi o baro Debleske oun o baro rayeske mishto krenn.

← Chapter 25 Jump to: Chapter 27 →