1 Chronicles 17

Romani Sinte 2024 (O Debleskro Lab 2024 (Sinte-Manouche))

← Chapter 16 Jump to: Chapter 18 →

1Har kanna o David an peskro kheer djivas, penas lo ap o Debleskro rakepaskro, o Natan: “Me djivau an i kheer dran cedertikro kasht, oun o morhton, kay i deesh laba o baro Deblestar dren hi, hi tardo an i plarhteno kheer. Hi kova mishto?”

2Penas o Natan ap leste: “Dja koy oun kre lauter, hoy tout ap o dji hi! O baro Devel hi pash toute!”

3Oun an koy rati penas o baro Devel ap o Nataneste:

4Dja koy oun pen ap miro boudepaskro, o David: Yaake penell o baro Devel: “Tou hal kova gar, kay krell mange i kheer, te djivap koy.

5Me djivom an kek kheer, foun ko dives, kay me kol Israelitaryen vin anom dran o them Egiptia bis kay dives. Man his či har i plarhteno kheer, har djom lentsa foun yek platsa ap i vavar.

6An ko tselo tsiro penom me kekeske, kay das garda ap mire menshende Israel: Hoske kreh tou mange kek kheer dran cedertikro kasht? ”

7Doleske hounte peness tou ap miro boudepaskro, o David: Yaake penell o baro Devel, kay hi o ray pral o bolepen oun i phoub: “Me lom tout i bakrendar krik, kay tou pre garda dal, te vess tou ray pral mire menshende Israel.

8Me homs pash toute, kay tou ninna djal, oun marom kolen lauteren glan toute, kay kouran pen touha. Me krom tiro lab bares, yaake prindjedo har i laba kol bare rayendar ap i phoub.

9Oun me kamau mire menshen Israel i them te dell, kay nay ačenn yon. Oun koy djivenn le, kay trashenn yon bouder gar, oun kay venn yon gar bouder tele rikedo kol čilače menshendar, har an ko tsiro,

10kay rodom me čačepangre raya mire menshenge vin. Oun me krau kolen tiknes glan toute, kay kourenn pen touha. Me moukau touke kanna te penell: Tou kreh mange kek kheer. Me krau touke i kheer.

11Te hi tiro tsiro trouyel, oun tou mereh, hadau yekes tire čavendar, kay pal toute venna, te vell lo baro ray, oun ačell kova.

12Kova krell mange i kheer. Oun me krau, te ačell lo hako tsiro baro ray.

13Me kamau leskro dad te vell. Oun yob vell miro čavo. Miro lačepen lau gar lestar krik, har me miro lačepen kolestar krik lom, kay glan toute o baro ray his.

14Me čivau les pral mire menshende, te ačell lo baro ray pral lende hako tsireske. Oun tiro rayengri beshepaskri ačell hako tsiro.”

15Har o Natan kol tsele laba, hoy o Devel leske sikras, o Davideske penas,

16djas o baro ray David an o Debleskro plarhteno kheer, vitsras pes tele glan o baro Debleste oun penas: “Baro Devel, miro ray, koon hom me, oun hoy hi miro kheer, kay tou kral yaake boud mange?

17Oun kanna hi kova touke gar doha, miro Devel. Tou penal mange, hoy mire čavende kameh te dell an ko tsiro, hoy dour glan mende hi. Oun tou dikal ap mande har ap i baro mensheste, miro baro Devel.

18Tou kral man, tiro boudepaskres, yaake raylo! – Hoy nay rakrau me gomme boudeder? Tou djineh, hoy an miro dji hi.

19Baro Devel, mange kral tou kava tselo baro koova. Kova his yaake an tiro dji, te sikress tiro tselo raylepen.

20Baro Devel, kek hi yaake har tou! Oun dell kek devel har tou, pal lauter, hoy mer mare kandentsa shounam.

21Oun kay hi menshe ap i phoub har tire menshe Israel? Kolenge djal tou koy, te less len dran o pandepen vin. Ko baro oun zorelo koova, hoy tou lenge kral, kras, te val prindjedo ap i phoub. Tou tradal vavar menshen vin glan tire menshende, kay tou vin lal dran Egiptia.

22Tou rodal touke kol menshen Israel vin, te venn yon tire menshe hako tsireske. Oun tou, baro Devel, val lengro Devel.

23Oun kanna, baro Devel, mouk ko lab čačo te vell hako tsireske, hoy tou pral mande oun pral miro kheer penal. Oun kre yaake, har tou penal,

24te djinenn i menshe, kay kova, hoy tou penal, ninna yaake vell, oun tiro lab sharedo vell an hake tsirya, oun i menshe penenna: O baro Devel, ko ray pral o bolepen oun i phoub, koles i Israelitarya an-mangenn, yob hi o Israeleskro Devel. Oun o kheer David, kay tiro boudepaskro hi, ačell tardo glan toute.

25Tou, miro Devel, sikral man, hoy kameh te krell – oun penal mange: Me krau touke i kheer. Doleske lom man khetne oun rakrom touha.

26Baro Devel, tou hal o čačo Devel, oun dal man tiro lab, te dess kava lačo koova mande, tiro boudepaskro.

27Kanna čip tiri barht pral mande oun mire menshende, te ačenn le glan toute hako tsiro. Ap koneste tou tiri barht čival, ap koleste ačell tiri barht čiddo hako tsireske.”

← Chapter 16 Jump to: Chapter 18 →