1 Chronicles 18

Romani Sinte 2024 (O Debleskro Lab 2024 (Sinte-Manouche))

← Chapter 17 Jump to: Chapter 19 →

1Pal kova kouras pes o David i Filistarentsa oun his zorleder har yon, oun las o foro Gat oun i gaba troul Gat dran lengro vast.

2Ninna das lo i Moabarya. Oun yon van o Davideskre boudepangre oun hounte playsran ap leste, hoy lo lendar kamas.

3O David kouras pes ninna o baro rayeha pral o them Soba. Leskro lab his Hadad-Eser. Har o Hadad-Eser koy djas, te lell lo o them pash ko pani Eufrat dren, vas o David peskre lourdentsa, oun das les oun leskre lourden pash o foro Hamat.

4Oun o David las lestar yek zero vourdya, 7.000 (efta zerya) klissepangre, oun 20.000 (biish-zerya) lourden, oun kras i tsele grayen bango. Kokres sheel lendar moukas lo pral.

5Koy van kol Syrarya dran o them Damaskus pash o Hadad-Eser, ko baro ray pral o them Soba, te venn le leske ap i rig. Oun o David maras lendar 22.000 (biish-te-douy-zerya) morshen.

6Oun yob čivas moskre dren an lengro them. Oun o Davides vas penepaske pral i Syrarya, oun yon hounte playsran ap leste, hoy lo lendar kamas. Yaake his o baro Devel o Davideske ap i rig, kay lo ninna djas.

7Kol lourden o baro rayestar Hadad-Eser his sonakangre shilte. Kolen anas o David an o foro Yerusalem.

8Oun boud lolo saster las lo dran i forya Tibhat oun Koun. Kal forya his an o them, kay his o Hadad-Eser o baro ray. Kolestar moukas o Salomo o panyeskro čaro oun kol douy turme oun vavar koola dran lolo saster o Debleskro khereske te krell.

9Ko ray pral o foro Hamat – leskro lab his Toy, – his an o kourepen o baro rayeha Hadad-Eser. Har o Toy kanna shounas, kay maras o David koleskre tsele lourden, bičras lo peskro čaves, o Hadoram, pash o baro rayeste David, oun parkras pes pash leste, oun moukas leske te penell, te vell les boud barht. Oun o Hadoram anas peha sonakangre koola oun roupene koola oun save dran lolo saster.

11Kova lauter das o baro ray David o baro Debleste, oun čivas kova an leskro kheer, ninna ko roup oun sonakay, hoy las yob kol menshendar dran i themma Edom, Moab, Ammon, Filistia oun Amalek.

12Oun o Abishay, koleskri day i Serouya hi, das i Edomarya ap ko kotar phoub, hoy kharell Londi Tala. Oun yob maras an koy tala 18.000 (deesh-te-orhta-zerya) lourden.

13Oun o David čivas moskre dren an hako foro an o them Edom. Oun o Davides his penepaske pral o tselo them Edom. O baro Devel his ap o Davideskri rig, kay yob ninna djas.

14Yaake his o David baro ray pral o tselo them Israel, oun kras, te lell hakeno peskro čačepen.

15O Yoab, koleskri day i Serouya hi, his o pralstouno pral i tsele lourdende, oun o Yosafat, koleskro dad o Ahiloud his, his o baro rayeskro rakepaskro.

16O Zadok, koleskro dad o Ahitoub hi, oun o Ahimelek, koleskro dad o Abyatar hi, his rashaya. O Shavsha his kova, kay činas i lila.

17O Benaya, koleskro dad o Yoyada hi, his o pralstouno pral kol Kretarya oun Pletarya, kay his troul o baro rayeste tardo, te denn le ap leste yak. Oun o Davideskre čave his i glanstoune ap i rig o baro rayestar.

← Chapter 17 Jump to: Chapter 19 →