2 Chronicles 16

Sukuma 2019

← Chapter 15 Jump to: Chapter 17 →

1Mu ng'waka gwa makūmi adatū n'ītandatū gwa būsugi bo ng'wa Asa, ntemi Baasha wa Isilaeli ūja kwīdumīla ī Yuda; nzengo gwa Lama wandya kūgūzengeela ngītīli ya ndugu kūgūpīndīlīja, kūlwa kūbahangīja abo baalī na ng'hūmbū ja kwīnga, nūūlū kūja kū sī ya ng'wa Asa ū ntemi wa Yuda.

2Ū Asa ūjisola pyī ī feza nī zahabu ījo jalī ū ng'wibīkīlo lya sabo lya mu hekalu ya ng'wa SEEBA, nī ja mu numba y'ikūlū lyakwe, ūjitwala kū ng'wa Beni-hadadi ntemi wa Alaamu, wikalaga mu nzengo gwa Damasiko.

3Ūhaya, “Twitūūlīlage būlagane a ha gatī yane nū bebe, gīt'ūbo walīho ha gatī ya ng'wa baba na so; angū ūlībona gīkī nakwenhelaga feza na zahabu sha kūkwinha. Alilūūlū, īngaga ū mu būlagane ūbo būlīho a ha gatī yako nū Baasha ū ntemi wa Isilaeli; anīngīle ū mu sī yane.”

4Ū Beni-hadadi ūzunya ī ya ng'wa Asa, ūtūma bashilikale bakwe kwīdumīla ī sī ya Isilaeli; wīdima mizengo ya Iyoni, Dani, Abeli-beti-maaka; nī mizengo ya mu Nafutali ī yose ī ya kūtūūlīla sabo.

5Ū Baasha aho wigwa gīko ooya ū kwīzenga ī Lama; ūgūleka ū nīmo gwenūyo.

6Hūna ū ntemi Asa ūbenha pye a banhū ba Yuda, būgabūūcha kwīnga ī Lama a mawe nī mitī īyo wazengelaga ū Baasha. Ū ntemi Asa ūshitūmamīla ī shikolo shenīsho kwīguzuhya mizengo ya Geba na Misipa.

7Ī likanza lyenīlo ng'hangi Hamasi wiza ū kūlī ntemi Asa wa Yuda; ūng'wīla, “Īkī wansanije ntemi wa Alaamu ūleka ū kūnsanya ū SEEBA Mulungu wako, ī libità lya Baalamu lyapūlūgūkaga ū mu nkono gwako.

8Ī gīsī ī libità lya Bakushi na bana Libya īlo lyalī na magogoteni mingī ga būlūgū na bashilikale bingī a badamhīji ba falasa, lyalī lītī ibità lya nguzu? Alīyo aho wansanya ū SEEBA akabatūūla mu nkono gwako.

9Nguno a miso ga ng'wa SEEBA gakalolaga hose pyī ū mu sī, kūlwa kūbaguzuhya abo batī na shilingo mu ng'holò jabo kūlī we. Ū bebe wītaga mhayo gwa nyachilū no; alilūūlū, kwandīja haha ūkūbiza na būlūgū wa gwa na gwa.”

10Ū Asa ūmpelanīla ū ng'hangi ng'wenūyo kūlwa kūng'wīla gīko, nīyo ūsaaya no kūshisha ūmponya mu jeela; hama ū mu shikū jenījo wandya kūyūbiboneela mu kūbaluhya banhū bamò na bamò.

11Ī mihayo ya mu shikū ja būtemi bo ng'wa Asa, kūfuma wandījo wayo kūshisha kū būkalīkījo wayo yandīkilwe mu shitabo sha ng'hūlū ja batemi ba Yuda na Isilaeli.

12Ū mu ng'waka gwa makūmi adatū n'īnaane gwa būsugi wakwe ū Asa, ūgwisījiwa būsaatu wa magūlū. Nūūlū īkī ū būsaatū wakwe walī wabūbi, alīyo nahene aho alī ū mu būsaatu wenūbo atagemile kūkooba būgunanhi kūfuma kūlī SEEBA, wajaga akūsīngījaga mu bafumu dūhū.

13Na lūūlū ū mu ng'waka gwa makūmi anè na gūmò gwa būsugi wakwe ū Asa, wifuula na bakūlūgenji bakwe.

14Būnjīka mu shigila shakwe, walī wasīmbīla wei ng'wenekīlī mu nzengo go ng'wa Daūdi. Būnaaja ng'wisandīko līnaagīlilwe būgota bo ng'waso gwawiza na malaashi ga būlī mbika. Hanuma būpemba na moto ntaale kūlwa nguno y'ikūjo lyakwe.

← Chapter 15 Jump to: Chapter 17 →