bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Sukuma
/
Sukuma 2019
/
2 Chronicles 7
2 Chronicles 7
Sukuma 2019
← Chapter 6
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 8 →
1
Ū Solomoni aho wamala ū kūlomba gwika moto kūfuma ng'wigūlū gūūshipemba ī shitambò sha kūpemvwa nī shitambò; nī likūjo lya ng'wa SEEBA lyūyookaja ī hekalu.
2
A bagabīji būlemeelwa ū kwingīla ū mu hekalu ya ng'wa SEEBA nguno ī likūjo lya ng'wa SEEBA lyalī lyīyookaja.
3
A Baisilaeli aho bagūbona ū moto gwika, nī likūjo lya ng'wa SEEBA līl'a higūlya ya hekalu, a bose būtuja mazwi a ha gwaalugwa, binama hasī ū būshū wabo; būnamya ū SEEBA, kūnū bakūnūmbaga balīhaya, “Alī wawiza no, ū būtogwa wakwe būlī wa welelo na welelo!”
4
Hūna ū ntemi na a banhū a bose būmfunīja shitambò ū SEEBA.
5
Ū ntemi Solomoni ūfunya shitambò sha ng'ombe shihūmbī makūmi abīlī na shibīlī, ī ng'holo nī mbūli ī jene jalī shihūmbī igana na makūmi abīlī. Na lūūlū ū ntemi na a banhū a bose bīlombela ī hekalu ya ng'wa Mulungu.
6
A bagabīji būlī ng'wene wīmīīla h'ipandī lyakwe; a Balawī nabo būshidima ī shikolo shabo sha kwīmbīla, īsho Daūdi walī washibeeja kūlwa nguno ya kūnkumīlīgīja SEEBA; h'īsho shatūmamīlagwa būl'ikanza ūlū akūnūmbaga SEEBA kūlwa nguno ya būtogwa wakwe ūbo būlī wa kūshinga ho welelo na welelo. A bagabīji baalī kū lwandī lūmò bakūfuulaga mhembe jabo, bilolelile na a Balawī; a Baisilaeli a bose baalī bīmīīlile.
7
Ū Solomoni ūlīlombela kwejiwa nī lipandī lya ha gatī gatī ya gwaalugwa ya kū būtongi wa hekalu ya ng'wa SEEBA, ūfunīja hoi shitambò sha kūpemvwa, na a masazu ga shakwinha sha būsangī. Nguno ū ng'walīlo gwa shaba ūyo walī wagūbeeja gūkalemeelwa ū kūshibūūcha ī shitambò sha kūpemvwa, nī shakwinha sha būsu, na a masazu.
8
Na lūūlū ū Solomoni na a Baisilaeli a bose abo baalī hamò nang'hwe ū lūshikū lwenūlo bīīta shigukulu; lyalī ibità itaale no, banhū baalī bafuma kwandīja Lebo-hamasi kūshisha kū lūbīmbī lwa Misili.
9
A ha lūshikū lwa kanaane būbiza na libilinga, nguno bakamala shikū mpungatī balī mu būyegi wa kūgūlombela ū ng'walīlo gwejiwe, hanuma ya henaho būmala hangī shikū jingī mpungatī balī mu būyegi wa shigukulu.
10
Ū mu lūshikū lwa makūmi abīlī na'idatū lwa ng'weji gwa mpungatī, ūbalaga a banhū būja kaya bayegaga no, nī ng'holò jabo jazalabanaga kūlwa nguno ya wiza bose ūbo SEEBA akang'wītīla ū Daūdi nū Solomoni, na a banhū bakwe a Baisilaeli.
11
Ū Solomoni aho wamala ū kūzenga ī hekalu ya ng'wa SEEBA nī numba y'ikūlū, ūbiza wamalamaja ū kwīta pyī īyo walī nayo mu maganiko kūlwa nguno ya hekalu ya ng'wa SEEBA nī likūlū lyakwe,
12
lwise lūmo ū SEEBA ūng'wilongela makanza ga būjikū; ūng'wīla, “Ū kūlomba kwako naakwigwaga, nī lipandī lyenīlī naalīkomaga ībize hekalu yane kūlwa nguno ya kūfunīja mo shitambò.
13
Na lūūlū ūlū gīkī nūlīlugala ī ligūlū, mbula yooya kūtūla, nūūlū nūjilagīja njige kwīkenaagūla ī sī, nūūlū nūbatūmīla ihūūya a banhū bane,
14
alīyo a banhū bane abo bakitanīlagwa kū lina lyane, ūlū bidoohya na kūlomba na kūnikooba ū nene, hūna būgalūka na kwīnga ū mu nzīla jabo jabūbi, nakwigwa kūfuma ū ng'wigūlū nabalekeje ū būhūbi wabo, nī sī yabo nakwīpīja.
15
Nīyo ī haha nakūgaloleecha a miso gane, na a matū gane nakūgatega nadegeleke ū kūlomba ūko kūkwītagwa ū ng'wipandī lyenīlī.
16
Ī hekalu yenīyī nīkomaga, na nīyeejaga gīkī ī lina lyane likale moi shikū jose welelo na welelo. A miso gane, nī ng'holò yane shikūlolela hoi shikū jose.
17
Ū bebe ī nhūngwa ja kashimīzīle kako ū kū būtongi wane, ūlū jūbiza gīt'ūmo jalī ja ng'wa so Daūdi, ūbiza nshikīlīja wa yose īyo nīīlagīlile, na a malange gane ūgadima pyī nī shilagīlo shane;
18
a henaho ī lisumbī lyako lya būtemi nakūlyīta līlame kūshisha welelo bose gīt'ūmo nakalaganīla nū so ū Daūdi nūng'wīla gīkī, ‘Ūtalagayiwa munhū wa kūbasuga a Bisilaeli.’
19
Gwike ū bebe ūlū ūgalūka, ūnileka ooya ū kūgadima a malange gane, nī shilagīlo īsho naakwinhile, ūlondeela bamulungu bangī wandya kūbatūmamīla na kūbalamya,
20
a henaho nakūbadubbūla gete a Baisilaeli, nabīnje ū mu sī yane īyo naabinha; nī hekalu yenīyī nakwīlema, nūūlū īkī nīyeejaga kūlwa lina lyane. Nakwīyīta ībize gītī shigano, na līshikolo lya kwikala līkūsekagwa sagala ū mu mahanga ga banhū bose.
21
Na lūūlū nūūlū īkī ī hekalu yenīyī ī haha īlī ya kūkamaaja ū mu wiza, alīyo pye abo bakwībona ūlū balībīta bakūyūshingisha mitwe kūnū bakūhayaga gīkī, ‘Nibūlī ū SEEBA wīyītīlile mhayo gūlī gīko ī sī yenīyī nī hekalu īyī?’
22
A banhū bakūyūshosha balīhaya, ‘Kūlwa nguno bang'wībile ū SEEBA, ū Mulungu wa bakūlūgenji babo, ūyo wabenha kūfuma Misili. Banekile būdimana na bamulungu bangī, bandya kūbalamya na kūbatūmamīla; h'ī nguno yene ū SEEBA wabenhelile ū būkenaagūji bose wenūbū!’”
← Chapter 6
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 8 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36
Recommended Reading
Commentary
2 Chronicles Commentaries
→
Devotional
2 Chronicles Devotional Guide
→
Get This Bible
Sukuma Study Bible
→