2 Chronicles 34

Sukuma 2019

← Chapter 33 Jump to: Chapter 35 →

1Ū Yosia walī na myaka īnaane aho alandya kūbiza ntemi, ūsuga alī mu Yelusalemu ikanza lya myaka makūmi adatū na gūmò.

2Wīta yawiza ū mu miso ga ng'wa SEEBA, nguno washimīzīlaga mu nzīla ī jose ī ja nkūlūgenji wakwe Daūdi; atagalūkile kūja kū būlyo nūūlū kū lūmoso.

3Aho ataalī nsūmba o ng'walūko, wahayūshisha myaka īnaane alī nsugi, wandya kūnkooba ū Mulungu o ng'wa ise Daūdi; mu ng'waka gw'ikūmi n'ībīlī wandya kūgīnja ū mu Yuda nū mu Yelusalemu a mapandī ga higūlya, na a makīngī ga lī Ashela, nī shiikolile sha kūpūnza na a ga kūsula.

4Nī myalīlo ya Mabaalī wīkambagūla, na myalīlo ya kūzuukīlīgīja būbbani yalī īzengilwe a higūlya yaho nayo wībelagūla yūseesagūka; nī ng'hīngī ja Ashela ūjibbutagūla, nī shikolo sha kūlamiwa pye nī shiikolile. Ī shose shenīshi ūshibelagūla shūseesagūka, hūna shūsambaagījiwa ha shigila sha banhū abo bafunyaga shitambò a higūlya yasho.

5A maguha ga bagabīji ūgatūūla higūlya ya myalīlo yabo, hūna ūgajiga mu moto, ūbiza wawīnja ū būsoso ū mu Yuda nī Yelusalemu.

6Ūja na kū mizengo ya Manase, Efulaimu na Simioni, kūshisha Nafutali, nū mu mapandī ga bbihī bbihī ayo gaalī galekwa na banhū;

7ūkīkambagūla nū kwene ī myalīlo nī ng'hīngī ja lī Ashela, ī shiikolile ūshishigina shūbiza lūbuubu; pyī ī myalīlo ya kūzuukīlīgīja būbbani ū mu Isilaeli wībelagūla gūbiza mamenyagūlwa. Aho wamala ī yenīyo ūshoka Yelusalemu.

8Ū mu ng'waka gwakwe gw'ikūmi n'īnaane alī ntemi, aho wamala kwīyīngīja ū būsoso ī sī nī hekalu, ūntūma Shafani ng'witūnja o ng'wa Azalia, na Maaseya ūyo walī nsugi wa mu nzengo, hamò na Yoa ng'witūnja o ng'wa Yoahazi ūyo walī ng'wandīki; ūbatūma kwandya kwībeegeleja ī hekalu ya ng'wa SEEBA Mulungu wakwe.

9Būja ū kūlī ngabīji ntaale ū Hilikia būūkang'winha ī hela ījo jalī jenhwa mu hekalu ya ng'wa Mulungu, ījo Balawī a baalī balang'hani ba ha milyango, baalī bajikuminga kūfuma ū kū banhū ba Manase, Efulaimu, na kūfuma ū kū Baisilaeli a bose, abo baalī basaagīīla ū mu banhū ba Benjamini na a bikaji ba Yelusalemu.

10Ī hela jenījo būjitūūla mu makono ga banhū abo baalī baasolwa kūlwa kūgwīmīīla ū nīmo gwa kwībeegeleja ī hekalu ya ng'wa SEEBA; a banhū benabo hū babalīpaga a batūmami abo bīzengaga na kwībeegeleja ī hekalu.

11Ū mu hela jenījo jingī būbinha baselemala na bazengi, kūlwa kūgūla mawe ayo gabeejiwe ng'hana ng'hana, na mbawa ja kūyūdimanīgīja, na migamba kūlwa kūjibeegeja ī numba ījo batemi ba Yuda baalī bajilekanīja kūshisha jūsakaala.

12A banhū benabo bakagwīta ū nīmo gwenūyo mu būtūngīlīja būtaale. Baalī na banhū abo babīmīīlaga ū mu būtūmami wabo, ba Yahati na Obadia, Balawī ba shibyalīlwe sha ng'wa Melaali; na ba Zakalia na Meshulamu, ba shibyalīlwe sha ng'wa Kohati. A Balawī a bose abo baalī bamanile kūtūla na kūfuula shikolo sha kwīmbīla

13baalī bīmīīji ba milīmo ya mbika jose, na bakomeleja ba batūmami. Balawī bamò baalī bandīki, bangī balang'hani ba shitabo sha mihayo ya kajīle ka būsugi, na bangī baalī balang'hani ba ha milyango.

14Aho balījifunya hanze ī hela ījo jalī jenhwa mu hekalu ya ng'wa SEEBA, ū Hilikia ū ngabīji ūshibona ī shitabo sha shilagīlo sha ng'wa SEEBA, īsho shalī shafunyiwa mu nzīla ya ng'wa Musa.

15Hūna ū Hilikia ūng'wīla ū Shafani ū ng'wandīki, “Shiishi ī shitabo sha shilagīlo, nashipandīkīla mu hekalu ya ng'wa SEEBA.” Ūng'winha ū Shafani.

16Ū Shafani ūshitwala ū kūlī ntemi; ūūkang'wīla, “A batūmami bako balīīta ī milīmo yabo gīt'ūmo bahelelilwe.

17Balījitūmamīla ī hela ījo jalī mu hekalu ya ng'wa SEEBA, bajitūūlaga mu makono ga bīmīīji ba nīmo na batūmami.”

18Hūna ū Shafani ū ng'wandīki ūng'wīla ū ntemi, “Ū ngabīji Hilikia waninha shitabo shiishi.” Na lūūlū ū Shafani ūshisoma ū kū būtongi wa ntemi.

19Ū ntemi aho wīyigwa ī mihayo ya mu shitabo sha shilagīlo, ūtandūla ī shizwalo shakwe.

20Ūnagīja ū Hilikia nū Ahikamu ng'witūnja o ng'wa Shafani, na Abudoni ng'witūnja o ng'wa Mikaya, na Shafani ū ng'wandīk, hamò na Asaaya ūyo walī ntūmami wa ha ng'wa ntemi.

21Ūbawīla, “Jagi mukabūje ū kūlī SEEBA; munibūgīje ū nene na a banhū abo basaagile a ba Isilaeli nī Yuda. Mubūje kūlwa nguno ya mihayo īyo yandīkilwe ū mu shitabo īsho shabonagwa shenīshi. Īlī hape gīkī ū būpelanu bo ng'wa SEEBA ūbo akūtwitīīla būlī būtaale no; nguno a babyaji bise batagūdimile ū mhayo go ng'wa SEEBA; na batītile gīt'ūmo īlī pyī ī mihayo īyo yandīkilwe ū mu shitabo shenīshi.”

22Na lūūlū ū Hilikia na a babo ntemi akabatūma hamò nag'hwe, būja kūlūngalūnga na Huluda; walī ng'hangi nkīma, nke o ng'wa Shalumu, ng'witūnja o ng'wa Tokihasi, nang'hani wa chumba sha kūbīkīla shizwalo. Ū ng'hangi nkīma ng'wenūyo wikalaga mumo Yeluasalemu, mu lūgali lwa kabīlī lwaho.

23Ūbawīla, “Ū SEEBA ū Mulungu wa Isilaeli alīhaya gīkī, Ū munhū ūyo wamutūmaga kūlī nene ng'wīlagi:

24‘Ū SEEBA alīhaya gīkī, Nakwenha būkenaagūji būtaale, nalīkenaagūle ī lipandī lyenīlī na a banhū benaba, kūlenganīla na a mazumo ayo gandīkilwe ū mu shitabo īsho shasomagwa kū būtongi wa ntemi wa Yuda.

25Nguno baanilekile ū nene, bandya kūzuukīja būbbani kū bamulungu bangī; baanisaayīkije no, kūlwa milīmo yabo yose īyo bakūbeejaga na makono gabo. Na lūūlū ū būpelanu wane wabakile, būtīko kūjimiwa na hado yaya; shiigelile nalīkenaagūle ī lipandī lyenīlī!’

26Alīyo ū ntemi wa Yuda ūyo wamutūmaga kwiza kūbūūja kūlī SEEBA, ng'wīlagi gīkī, ‘Ū mu mihayo īyo wīyigwaga, ū SEEBA Mulungu wa Isilaeli alīkūwīla ū bebe gīkī,

27Īkī ī ng'holò yako yoolechaga hape gīkī wagalūkaga na kwidoohyaga ū kū būtongi bo ng'wa Mulungu aho wīyiigwa īyo wīhaya kūlwa nguno ya ipandī lyenīlī na a banhū baamo, na kūlwa nguno widoohyaga ū kūlī nene ūtandūla na shizwalo shako, ūlīla na kū būtongi wane, nakwigwaga, alīhaya ū SEEBA.

28Ū bebe nakūkwīnja nakūtwale kū bakūlūgenji bako; ūkūjīkwa mu mhola, a miso gako gatūbūbona ū būkenaagūji ūbo nalīhaya kūwenha a h'ipandī lyenīlī, nū kū bikaji baamo.’” Hanuma ya yenīyo būshoka ū kūlī ntemi, būntwalīla ī lishosho lya kūfuma ū kūlī ng'hangi nkīma ng'wenūyo.

29Hūna lūūlū ū ntemi ūlagīja bikuminga pye a banamhala ba Yuda na a ba Yelusalemu.

30Hanuma ūja mu hekalu ya ng'wa SEEBA hamò na a banhū ba Yuda, na a ba mu Yelusalemu, na a bagabīji na a Balawī; nīyo pyī dūhū a banhū bado na bataale. Ūbasomela pyī ī mihayo ya mu shitabo sha būlagane, īsho shikapandīkīlwa mu hekalu ya ng'wa SEEBA.

31Aho yabīta ī yenīyo ū ntemi wīmīīla hihī na ng'hīngī yakwe, ūlahīla gīkī akūlīdima ī lilagane lya ng'wa SEEBA; na gīkī akūnondeela SEEBA na ng'holò yakwe yose na būpanga wakwe bose, na akūshimīzīla mu shilagīlo shakwe na kahelele kakwe na malange gakwe; kwīshikīlīja ī mihayo y'ilagane īyo yandīkilwe ū mu shitabo shenīshi.

32Hūna ūbakomeleja a bose a ba mu Yelusalemu nī Benjamini kūshimīzīla ū ng'wilagane; a banhū ba Yelusalemu bīīta gīko gīt'ūmo ilagane lya ng'wa Mulungu līhayīlile; ī lilagane lya ng'wa Mulungu wa bakūlūgenji babo.

33Na lūūlū ū Yosia ūbiza washīnja pyī shiikolile sha malofu ū mu sī ī yose ī ya Baisilaeli; hūna ūbakomeleja a bose abo baalī mu Isilaeli kūntūmamīla SEEBA Mulungu wabo. Ū mu shikū jose aho ataalī alī hamò nabo ū Yosia, batoyile ū kūnondeela ū SEEBA, ū Mulungu wa bakūlūgenji babo.

← Chapter 33 Jump to: Chapter 35 →