2 Chronicles 28

Sukuma 2019

← Chapter 27 Jump to: Chapter 29 →

1Ū Ahazi aho alandya kūbiza ntemi walī na myaka makūmi abīlī; ūsuga ikanza lya myaka ikūmi n'ītandatū alī mu Yelusalemu. Ū mu miso ga ng'wa SEEBA atītile yawiza gīt'ūmo walī wītīla nkūlūgenji wakwe Daūdi.

2Nguno ū wei washimīzīlaga mu nzīla ja batemi ba Isilaeli, ūyūbeeja na shiikolile kūlwa kwilamīlīgīja kū būtongi wa Mabaalī.

3Ūyūja na kū longa lwa Hinomu waakafunya shitambò sha kūpemvwa; na bitūnja bakwe ūbapemba mu moto, kūlwa kūlondeela nhūngwa ja malofu ja mahanga ayo SEEBA walī wagapeeja gīkī gabīngīle a Baisilaeli.

4Wafunyaga shitambò hamò na kūzuukīja būbbani kū mapandī ga higūlya, kū ngūlū pyī nū mu mbeho ja mitī ya madūūtū manīlīzu.

5Na lūūlū ū SEEBA Mulungu wakwe ūntūūla mu nkono gwa ntemi wa Alamu. A Baalamu būmpyena, būbasola banhū bakwe bingī būja nabo Damasiko mu būtungwa. Ūtūūlwa na mu nkono gwa ntemi wa Isilaeli, nang'hwe ūnkenaagūja banhū bakwe bingī.

6Mu lūshikū lūmò ū Peka ū ng'witūnja o ng'wa Lemalia ūbūlaga ū mu Yelusalemu bashilikale shihūmbī igana na makūmi abīlī, nguno a banhū ba Yuda baalī bang'wība ū SEEBA ū Mulungu wa bakūlūgenji babo.

7Walīho munhū nebe lina lyakwe Zikili muna Efulaimu, ūmūlaga Maaseya ng'witūnja wa ntemi, na Azilikamu ntaale wa kahelele ka h'ikūlū, na Elikana ūyo walī wa kabīlī a halī ntemi ū mu mihayo ya būsugi.

8A Baisilaeli būjana banhū shihūmbī magana abīlī kūfuma ū mu badūgū babo; bakīma na bayanda na banikī. Būsola na shikolo shingī būjana Samalia kūbiza nding'wa jabo.

9Alīyo ū kwenūko walīko ng'hangibo ng'wa SEEBA lina lyake Odedi, ūfuma kūjūbasūng'wanha a bashilikale benabo aho baliza ī Samalia; ūbawīla, “Ū SEEBA ū Mulungu wa bakūlūgenji bing'we walī wabapelanīlile a banhū ba Yuda, h'ī nguno yene wabatūūlile mu nkono gwing'we. Alīyo a bing'we ng'wababūlagaga mu kabūlagīle ka kūpelanya kūshisha ng'wigūlū.

10Hama hangī ī haha mulīhaya kūbīīta babize basese bing'we a bagosha na a bakīma ba Yuda nī Yelusalemu. Tūhaya a heene na a bing'we mulī bahūbi ū kūlī SEEBA ū Mulungu wing'we?

11Na lūūlū nidegelekagi; bashoshagi kaya a badūgū bing'we abo ng'wabenhaga kūbiza nding'wa, nguno mulī ha sīlīlī ya būpelanu bo ng'wa SEEBA!”

12Banhū bamò na bamò ū mu batongeeji ba mu Efulaimu, Azalia ng'witūnja o ng'wa Yehohanani, Belekia ng'witūnja o ng'wa Meshimeloti, Yehizikia ng'witūnja o ng'wa Salūmu na Amasa ng'witūnja o ng'wa Hadilai; bīmīīla kūbahangīja a banhū abo bakiza kūfuma ū kū būlūgū.

13Būbawīla, “Mutabenhage kūūnū a banhū benaba abo ng'wabadimaga kūfuma kū būlūgū, tūkūbiza mu kwihīga ū kū būtongi bo ng'wa SEEBA. A bing'we gashi ī gete mulīkooba kūbongeja ū būhūbi wise nū kwihīga kwise! Nguno ū kwihīga kwise a bise kūlī kūtaale ng'hana ng'hana, hama ī Isilaeli īlī ha sīlīlī ya būpelanu wakwe.”

14Na lūūlū a bashilikale benabo būbaleka a banhū abo baalī babadima benabo nī shikolo īsho baalī biza nasho, būbatūūla mu makono ga batongeeji na ha sīlīlī ya banhū abo baalī bibilinga.

15Banhū balebe būsolanhyiwa, būbagunanha a bading'wa benabo; būsola shizwalo kūfuma ū mu shikolo īsho shalī shading'wa būbazwalīkīja abo baalī dūūhū. Būzwala myenda na shilatū, būbinha na shilīwa na minzī ga kūng'wa; būbabila na būgota a magulagīje gabo. Abo baalī baaleba būbadamhīja ha nzobe pye a bose, hūna būbatwala Yeliko kū baana ba ng'wabo; kū nzengo gwa mitī ya nhende, a boi būshoka Samalia.

16Ū mu shikū jenījo ū ntemi Ahazi ūtūma banhū kūlī ntemi wa Ashulu gīkī ize angunanhe;

17nguno a Baedomu bakiza hangī bīdumīla ī Yuda, būdima banhū bingī būbajana.

18A Bafilisiti nabo būdumīla mizengo ya kū mitulumenho ya kū ngūlū ja Yuda, nū kū sī y'itogolo lya Negevu. Bīdima mizengo ya Beti-sheshi, Aijaloni, Gedeloti, na Soko, Timuna, na Gimuzo, na a magūngūli ayo gaalī gīpīndīlīgije; hama bikala na kwikala moi.

19Ū SEEBA akabīītīla gīko a banhū ba Yuda kūlwa kūbiicha ha sīlīlī gete, nguno ya ng'wa Ahazi ū ntemi wa Isilaeli, īkī walī wingīja mihayo mingī ya malofu ū mu sī ya Yuda; nīyo ū kūlī SEEBA akongeja no ū kūbiza wabūbi.

20Na lūūlū ū ntemi wa Ashulu, ū Tigilasi-pilesa, wiza ū kūlī we; alīyo a ha ng'wanya gwa kūngunanha, ūng'ongegeja makoye dūhū.

21Nguno ū Ahazi akasola shikolo shimò na shimò kūfuma ū mu hekalu ya ng'wa SEEBA, nū mu numba y'ikūlū, na kūfuma mu kaya ja batongeeji ba sī, ūng'winha ū ntemi wa Ashulu; alīyo naheene ī shenīsho shitangunanhile.

22Ū ntemi Ahazi aho alī ng'wikanza lya makoye gīko, ongeja no no no ū kūbiza wabūbi ū kūlī SEEBA.

23Ūyūfunya shitambò kū mamulungu ga bana Damasiko abo baalī bampyena, nguno wiganikaga gīkī, “Īkī a bamulungu ba Baalamu bakūbagunanhaga a banhū babo, hambū hambū nabafunīje shitambò, hamo bakūnigunanha nū nene!” Alīyo a benabo hū būbiza ba kūngwisha, pyī nī Isilaeli ī yose bīgwisha.

24Ū Ahazi ūshikuminga pyī ī shiseme sha mu hekalu ya ng'wa Mulungu ūshīnja, wīlugala ī milyango ya hekalu ya ng'wa SEEBA. Hūna ūzenga myalīlo būlī ha nzīla maaka ū mu Yelusalemu.

25Pye a hose ū mu mizengo ya Yuda ūbeeja mapandī ga higūlya ga kūyūbafunīja koi shitambò bamulungu bangī, ongeja gete ū kūmpelanya ū SEEBA, ū Mulungu wa bakūlūgenji bakwe.

26Mihayo yīngī ī ya mu shikū ja būtemi wakwe, nī nhūngwa jakwe, kūfuma wandījo kūshisha kū būkalīkījo, yandīkilwe mu shitabo sha ng'hūlū ja batemi ba Yuda na Isilaeli.

27Ū Ahazi wifuula na bakūlūgenji bakwe, ūjīkwa mu nzengo gwa Yelusalemu, alīyo atajīkīlilwe ū ng'wipandī ūko bajīkīlagwa batemi ba Isilaeli. Ng'witūnja wakwe Hezekia ūbiza ntemi a ha ng'wanya gwakwe.

← Chapter 27 Jump to: Chapter 29 →