1 Samuel 19

Chuvash (CHB) (БИБЛИ) 2009

← Chapter 18 Jump to: Chapter 20 →

1Саул Ионафана, хӑйӗн ывӑлне, тата хӑйӗн мӗнпур тарҫине Давида вӗлерме каланӑ; анчах Ионафан, Саул ывӑлӗ, Давида питӗ юратнӑ.

2Ионафан, Давида пӗлтерсе, ҫапла каланӑ: манӑн Саул аттем сана вӗлересшӗн; ыран сыхлануллӑ пул; вӑрттӑн вырӑнта пытанса лар;

3эпӗ аттемпе пӗрле хире тухӑп та эсӗ пытанса тӑракан вырӑнта пулӑп, аттемпе сан ҫинчен калаҫӑп, хам мӗн пӗлнине сана каласа парӑп, тенӗ.

4Ионафан ӗнтӗ Саула, хӑйӗн ашшӗне, Давид ҫинчен питӗ лайӑх каланӑ, вӑл ӑна ҫапла каланӑ: патша хӑйӗн чурине Давида хирӗҫ ҫылӑх ан тутӑр: вӑл сана хирӗҫ пырса ҫылӑха кӗмен, вӑл саншӑн усӑллӑ ӗҫсем ҫеҫ тунӑ;

5Филисти ҫыннине тӗп тунӑ чухне вӑл вилӗмле хӑрушлӑха лекрӗ; Ҫӳлхуҫа вара пӗтӗм Израиле пысӑк ҫӑлӑнӑҫ пачӗ; эсӗ ҫавна куртӑн, савӑнтӑн; мӗншӗн-ха эсӗ, айӑпсӑр юна хирӗҫ пырса, ҫылӑха кӗресшӗн, Давида сӑлтавсӑрах вӗлересшӗн? тенӗ.

6Саул Ионафана итленӗ, Саул ҫапла тупа тунӑ: Ҫӳлхуҫа чӗрӗ, Давид вилес ҫук, тенӗ.

7Ионафан ӗнтӗ Давида чӗнсе илнӗ те ӑна ҫав сӑмахсене каласа панӑ, Ионафан вара Давида Саул патне илсе пынӑ, Давид ун патӗнче ӗнер, виҫӗмкун пурӑннӑ пекех пурӑннӑ.

8Каллех вӑрҫӑ пуҫланнӑ, Давид филистимсене хирӗҫ ҫапӑҫнӑ, вӗсене вӑйлӑн аркатса тӑкнӑ, вӗсем унран тарса пӗтнӗ.

9Турӑ ирӗкӗпе Саула каллех усал сывлӑш тапӑннӑ, пӗррехинче вӑл килӗнче ларнӑ пулнӑ, аллинче сӑнӑ пулнӑ, Давид кӗсле каласа ларнӑ.

10Саул сӑннипелен Давида стена ҫумне пӑталаса лартасшӑн пулнӑ, анчах Давид Саулран пӑрӑнса ӗлкӗрнӗ, сӑнни стенана тӑрӑнса ларнӑ; Давид ҫав каҫ тухса тарса ҫӑлӑнса юлнӑ.

11Давида сыхласа тӑрса ирччен вӗлерме хушса, Саул хӑйӗн тарҫисене Давид килне янӑ. Давида Мелхола, хӑйӗн арӑмӗ, каланӑ: эхер те эсӗ ҫак каҫ чунна ҫӑлса хӑвармасассӑн, ыран сана вӗлереҫҫӗ, тенӗ.

12Мелхола Давида чӳрече витӗр антарса янӑ, вӑл кайнӑ, тарса хӑтӑлнӑ.

13Мелхола вара кил йӗрӗхне илнӗ те ӑна Давид вырӑнӗ ҫине хунӑ, пуҫ вӗҫне качака тирӗ хунӑ, ҫиелтен тумтирпе витнӗ.

14Саул хӑйӗн тарҫисене Давида тытма янӑ; анчах Мелхола: вӑл чирлӗ, тенӗ.

15Вара Саул, тарҫисене Давида тӗрӗслеме хушса ярса, ҫапла каланӑ: ӑна вӗлерме ман патӑма вырӑнӗ-мӗнӗпех йӑтса килӗр, тенӗ.

16Тарҫӑсем ҫитнӗ те, акӑ вырӑн ҫинче — тӑм кӗлетке, пуҫ вӗҫӗнче — качака тирӗ.

17Ҫакӑн хыҫҫӑн Саул Мелхолӑна каланӑ: мӗншӗн эсӗ мана ҫапла улталарӑн, манӑн тӑшмана кӑларса ятӑн, вӑл тартӑр терӗн-и? тенӗ. Мелхола Саула ҫапла каланӑ: вӑл: мана кӑларса яр, унсӑрӑн эпӗ сана вӗлеретӗп, терӗ, тенӗ.

18Давид тарса ӳкнӗ те ҫӑлӑннӑ, вӑл Самуил патне Рамӑна ҫитнӗ, хӑйне Саул мӗн тунине ӑна пӗтӗмпех каласа панӑ. Вӑл Самуилпа пӗрле тухса кайнӑ, вӗсем Навафра [Рамӑра] чарӑнса тӑнӑ.

19Саула: Давид — Навафра, Рамӑра тесе пӗлтернӗ.

20Саул хӑйӗн тарҫисене Давида тытма хушса янӑ, анчах пророкла калаҫакан пророк ушкӑнне тата вӗсене ертсе пыракан Самуила курсассӑн, вӗсем ҫине Турӑ Сывлӑшӗ аннӑ та, вӗсем те пророкла калаҫма пуҫланӑ.

21Ҫакӑн ҫинчен Саула пӗлтернӗ, вӑл вара урӑх тарҫӑсем янӑ, анчах кусем те пророкла калаҫма пуҫланӑ. Каярах тата урӑх тарҫӑсем янӑ, вӗсем те пророкла калаҫма пуҫланӑ.

22[Ҫилленсе ҫитсе,] Саул хӑй те Рамӑна тухса кайнӑ, вара Сефа теекен вырӑнти пысӑк ҫӑлкуҫ патне ҫитнӗ те: Самуилпа Давид ӑҫта-ши? тесе ыйтнӑ. Ӑна: ҫакӑнта, Навафра, Рамӑра, тенӗ.

23Вӑл Рамӑри Навафа кайнӑ, ун ҫине те Турӑ Сывлӑшӗ аннӑ, вӑл вара Рамӑри Навафа ҫитиччен пророкла калаҫса пынӑ.

24Унтан вӑл тумтирне хывнӑ та Самуил умӗнче пророкла калаҫнӑ, ҫав кунне кунӗпе тата ҫӗрӗпе тумтир тӑхӑнмасӑр выртнӑ; ҫавӑнпа ӗнтӗ: «Саул та пророк пулчӗ-ши вара?» теҫҫӗ.

← Chapter 18 Jump to: Chapter 20 →