Isaiah 10

Ilonggo (Ang Biblia (1982))

← Chapter 9 Jump to: Chapter 11 →

1Kailo ang mga nagamando sing dimatarung nga mga mando, kag ang mga manunulat nga nagasulat sing binalingag,

2sa pagpatalang sang mga nawad-an sa katarungan kag sa pagkawat sang kinamatarung sang mga imol sang akon katawohan, agud nga ang mga balong babayi mangin-ila inagaw, kag nga ang mga ilo mangin-ila tinukub!

3Ano bala ang inyo himoon sa adlaw sang pagduaw, sa kamusmusan nga magaabut gikan sa malayo? Sa kay sin-o bala kamo magapalagyo sa pagpakitabang, kag diin bala ninyo ibilin ang inyo himaya?

4Magasioktot lamang sila sa tunga sang mga binilanggo ukon mapukan sa tunga sang mga pinatay. Tungud sini tanan wala makuha ang iya kaakig kondi ang iya kamut nauntay pa gihapon.

5Kailo Asiriahanon, ang bilogon sang akon kaakig, ang sungkud nga sa iya kamut yara ang akon kaalipungut!

6Ipadala ko sia batok sa tampalasan nga pungsud, kag batok sa katawohan sang akon kasingkal tulinan ko sia, sa pagkuha sang inagaw kag sa pagkuha sang tinukub, kag sa pagtapak sa ila kaangay sang lunang sang mga dalan.

7Apang wala sia sing amo nga katuyoan, kag ang iya tagiposoon wala nagahunahuna sing amo; apang yara sa iya tagiposoon ang paglaglag, kag pag-utud sing indi lamang pila ka pungsud;

8kay sia nagasiling: “Indi bala mga hari tanan ang akon mga principe?

9Indi bala ang Calno subong sang Carquemis? Indi bala ang Hamat subong sang Arpad? Indi bala ang Samaria subong sang Damasco?

10Subong nga nalambut sang akon kamut ang mga ginharian sang mga diosdios nga ang ila mga larawan nga tinigban naglabaw pa sa ila sang Jerusalem kag sang Samaria,

11indi bala himoon ko man sa Jerusalem kag sa iya mga larawan ang subong sang ginhimo ko sa Samaria kag sa iya mga diosdios?”

12Kon mahimo sang Ginoo ang bug-os niyang buluhaton sa Bukid nga Sion kag sa Jerusalem, silotan niya ang bunga sang matig-a nga tagiposoon sang hari sang Asiria kag ang himaya sang iya pagkamatinaastaason.

13Kay nagsiling sia: “Sa kusug sang akon kamut nahimo ko ini, kag sa akon kaalam, kay may paghangup ako; ginhalin ko ang mga dulunan sang kabanwaanan, kag ginkawat ko ang ila mga bahandi; subong nga isganan nga tawo ginpapanaug ko ang mga nagalingkod sa trono.

14Ang akon kamut nakasapo subong sang pugad sang manggad sang mga katawohan; kag subong sang isa nga nagatipon sang mga itlog nga binayaan natipon ko ang bug-os nga duta; kag walay isa nga naghulag sang pakpak, ukon nagbuka sang baba, ukon nagsiyak.”

15Magapabugal bala ang wasay batok sa nagagamit sa iya, magapakadaku bala ang lagari batok sa nagagamit sa iya? Subong abi nga ang bilogon maggamit sa mga nagabayaw sa iya, ukon subong abi nga ang sungkud magbayaw sang indi kahoy!

16Busa ang Ginoo, ang Ginoo sang mga kasoldadosan, magapadala sing kaniwang sa tunga sang iya mga matambok, kag sa idalum sang iya himaya sindutan sing dabdab, kaangay sang dabdab sang kalayo.

17Ang kapawa sang Israel manginkalayo, kag ang iya Balaan mangindabdab; kag ini magasonog kag magalamon sang iya kasapinitan kag mga talongon sa isa ka adlaw.

18Ang himaya sang iya talon kag sang iya latagon nga mabungahon upuson sang Ginoo, tingub ang kalag kag lawas, kag ini manginsubong sang masakiton nga nagakag-as.

19Ang salin sang mga kahoy sang iya talon manginpila ka bilog sa bagay nga masulat sila sang isa ka bata.

20Sa sadtong adlaw ang mga salin sang Israel kag ang mga nakapalagyo sang panimalay ni Jacob indi na gid magsandig sa nagsakit sa ila, kondi sa pagkamatuud magasandig sa Ginoo, ang Balaan sang Israel.

21Isa ka salin magabalik, ang salin sang Jacob, sa Dios nga gamhanan.

22Kay bisan ang imo katawohan nga Israel manginsubong sang balas sang dagat, isa lamang ka salin sa ila ang magabalik. Ang kalaglagan natapat na, nga nagapaawas sing pagkamatarung.

23Kay ang Ginoo, ang Ginoo sang mga kasoldadosan, magahimo sing bug-os nga katapusan, nga tinapat, sa tunga sang bug-os nga duta.

24Busa amo ini ang ginasiling sang Ginoo, ang Ginoo sang mga kasoldadosan: “O katawohan ko, nga nagapuyo sa Sion, dili magkahadluk sa mga Siriahanon bisan sakiton ka niya sang bilogon kag bayawon ang iya sungkod batok sa imo sono sa paagi sang Egipto.

25Kay sa diotay gid nga tion pa ang kaalipungut batok sa imo matuman, kag ang akon kaakig ituhoy sa iya kalaglagan.

26Kag ang Ginoo sang mga kasoldadosan magabalabad sang bunal batok sa iya, subong sang pagpamatay sang Midian sa igang sang Oreb; kag ang iya sungkod manginsa ibabaw sang dagat, kag bayawon niya ini sono sa paagi sang Egipto.

27Kag sa sadtong adlaw ang iya lulan makuha sa imo abaga, kag ang iya gota gikan sa imo liog, kag ang iya gota malaglag bangud sa katambok.”

28Nagaabut sia sa Ayat; nagalatas sia pa Migron, sa Micmas ginabutang niya ang iya dala;

29nagalampuwas sila sa alagyan, nagadayon sila sa Geba; ang Rama nagakurug, ang Gabaa ni Saul nagpalagyo.

30Singgit sing mabaskug sa imo tingug, O babaying anak sang Gallim! Pamati, O Lais! Sabta sia, O Anatot!

31Ang Madmena laaslaas, ang mga pumuluyo sang Gebim nagapalagyo sa pagpalipud.

32Sini gid nga adlaw magadolog sia sa Nob, nagaomol sia sa bukid sang babaying anak sang Sion, ang bakolod sang Jerusalem.

33Yari karon, ang Ginoo, ang Ginoo sang mga kasoldadosan magaotop sang mga sanga nga may kakugmat; ang mga matag-as pagapudlon, kag ang mga mataas pagapanuboon.

34Hagbason niya sang salsalon ang kasiotan sang talon, kag ang Libano mapukan tungud sa gamhanan.

← Chapter 9 Jump to: Chapter 11 →