Isaiah 30

Ilonggo (Ang Biblia (1982))

← Chapter 29 Jump to: Chapter 31 →

1“Kailo sa mabinatoon nga mga anak,” nagasiling ang Ginoo, “nga nagahinun-anon, apang indi gikan sa akon; kag nga nagakasugut, apang indi gikan sa akon Espiritu, agud nga makadugang sila sing sala sa sala;

2nga nagagowa sa pagdulhog sa Egipto, nga wala magpamangkot sa akon baba, sa pagpabakud sang ila kaugalingon sa kusug ni Faraon, kag sa pagdangup sa landong sang Egipto!

3Busa ang kusug ni Faraon mangin-inyo kahuluy-an, kag ang dalangpan sa landong sang Egipto mangin-inyo kalibog.

4Kay bisan ang ila mga principe yara sa Soan kag ang ila mga embajador magaabut sa Hanes,

5sila tanan mahuya bangud sang katawohan nga indi makapulus sa ila, nga indi kabulig ukon kapuslanan, kondi kahuluy-an kag dikadungganan man.”

6Ang lulan sang mga sapat sang Bagatnan. Paagi sa duta sang kalisdanan kag kasakit, diin nagikan ang leon nga babayi kag ang leon nga lalaki, ang dalitan nga man-ug kag ang nagahingalayo nga nagalupad nga man-ug, ginapakulo nila ang ila mga manggad sa mga abaga sang mga asno nga bataon, kag ang ila mga bahandi sa mga binuktotan sang mga camelyo, sa katawohan nga indi mapuslan nila.

7Kay ang Egipto nagabulig sa wala sing pulus kag sa wala sing katuyoan, busa natawag ko sia “Rahab nga nagalingkod sing pahimonong.”

8Karon lakat, sulata ini sa tapitapi sa atubangan nila, kag itigib ini sa isa ka tolon-an, agud nga ini manginsa gihapon kag sa gihapon sa tion nga palaabuton.

9Kay ini nga katawohan mabinatoon, butigon nga mga anak, mga anak nga indi magpamati sa kasogoan sang Ginoo;

10nga nagasiling sa mga manugpanan-aw, “Dili kamo magtan-aw”; kag sa mga manalagna, “Dili kamo magtagna sa amon sing mga butang nga matarung; magpamolong sa amon sing mga butang nga maayo, magtagna sing mga limbong,

11halin kamo sa dalanon, lipas kamo sa banas, kuhaa sa amon atubangan ang Balaan sang Israel.”

12Gani amo ini ang ginasiling sang Balaan sang Israel, “Bangud nga ginatamay ninyo ini nga polong, kag nagasalig sa pagpigus kag katikoan, kag nagasandig sa sini;

13busa ini nga kalautan manginsa inyo subong sang litik nga madali matiphag, nga nagaulbo sa mataas nga kuta, nga ang iya pagkatiphag nagaabut sing hinali sa isa ka tion;

14kag boongon niya ini subong sang pagboong sang isa ka suludlan sang maninihon nga nagadugmok sini nga wala sing patawad sa bagay nga sa iya mga tinipik wala sing makakita sing bika nga ikuha sing kalayo sa dapog, ukon isaluk sing tubig sa tanke.”

15Kay amo ini ang ginsiling sang Ginoong Dios ang balaan sang Israel, “Sa pagbalik kag sa pahuway maluwas kamo; sa kalinong kag sa pagsalig mangindira ang inyo kusug.” Kag indi kamo buut,

16apang nagasiling kamo, “Indi! Magapalagyo kami sa mga kabayo,” busa magapalagyo kamo; kag, “Magasakay kami sa madasig,” busa sila nga magalagas sa inyo manginmadasig.

17Ang isa ka libo magapalagyo sa pahug sang isa; sa pahug sang lima magapalagyo kamo, tubtub nga mabilin kamo subong sang tukon sa putokputokan sang bukid, subong sang hayahay sa ibabaw sang bakolod.

18Gani ang Ginoo magahulat agud nga magmaayo sia sa inyo; gani pakataason sia agud nga malooy sia sa inyo. Kay ang Ginoo Dios sang katarungan; bulahan tanan sila nga nagahulat sa iya.

19Kay ang katawohan magapuyo sa Sion sa Jerusalem; indi na ikaw maghibi. Sa pagkamatuud manginmaayo sia sa imo sa tingug sang imo pagtuaw; kon makabati sia, sabton ka niya.

20Kag bisan ang Ginoo nagahatag sa inyo sang tinapay sang kangitngitan kag sang tubig sang kapipit-an, apang ang imo mga manunudlo indi na pagtagoon, kondi ang imo mga mata magatan-aw sa imo mga manunudlo.

21Kag ang imo mga idulungug magapamati sang polong sa likod nimo, nga nagasiling, “Ini amo ang dalan, lakat kamo sa sini,” kon magliso kamo sa too nga kamut ukon magliso kamo sa wala.

22Niyan pasipalahan ninyo ang taklap sang imo mga larawan nga tinigban nga pilak kag ang durar sang imo mga larawan nga tinunaw nga bulawan. Ihaboy mo sila subong sang butang nga dimatinlo; ikaw magasiling sini, “Halin ka!”

23Kag magahatag sia sing ulan tungud sa imo binhi nga imo isab-ug sa duta, kag sing kalan-on sang patubas sang duta, kag ini magatambok kag magabugana. Sa sadto nga adlaw ang imo kahayupan magahalab sa malapad nga mga halalban;

24kag subong man ang mga baka kag ang mga asno nga tinday nga nagaarado sang duta magahalab sing manamit nga kumpay, nga napahanginan sa pala kag sa inugkahig.

25Kag sa ibabaw sang tagsa ka mataas nga bukid kag sa ibabaw sang tagsa ka bakolod nga mataas may mga sapa kag mga ilig sang mga tubig, sa adlaw sang daku nga pagpamatay, kon mapukan ang mga torre.

26Labut pa ang kapawa sang bulan manginsubong sang kapawa sang adlaw kag ang kapawa sang adlaw manginpito ka pilo, subong sang kapawa sa pito ka adlaw, sa adlaw nga bugkosan sang Ginoo ang pilas sang iya katawohan, kag bolngon ang napilasan sang ila mga pilas.

27Yari karon, ang ngalan sang Ginoo magagikan sa malayo, nga nagadabdab sang iya kaakig, kag sa madamul nga aso nga nagatub-ok; ang iya mga bibig puno sang kaalipungut, kag ang iya dila subong sang kalayo nga nagalamon;

28ang iya ginhawa subong sang nagaawas nga ilig nga nagalambut tubtub sa liog; sa pag-ayag sang mga pungsud sa ayagan sang kalaglagan, kag ang busal nga nagapasayup nanginsa mga sulang sang mga katawohan.

29Manginmay ambahanon kamo subong sang sa kagab-ihon kon ginahiwat ang piesta nga balaan; kag kasadya sa tagiposoon, subong sang isa nga may lantoy nga nagakadto sa bukid sang Ginoo, sa Igang sang Israel.

30Kag ipabati sang Ginoo ang iya mahimayaon nga tingug kag ipakita ang pagpatupa sang iya butkon, nga may kaalipungut sang iya kaakig kag ang dabdab sang kalayo nga nagalamon, nga may pangdaguub kag unus kag ulan sang hielo nga daw bato.

31Kay sa tingug sang Ginoo malisang ang Asiriahanon, kon bunalon niya sia sang iya bilogon.

32Kag ang tagsa ka pagbunal sang napat-ud nga sungkud nga gamiton sang Ginoo sa iya updan sang tonog sang mga panderita kag mga arpa; kag sa mga inaway awayon niya sila sa pagbalabad sang iya butkon.

33Kay kutub pa sa dumaan ginaaman sang Topet; hoo, tungud sa hari naaman ini, ginhimo niya ini nga madalum kag daku, ang iya tumpok kalayo kag gatong nga madamu; ang ginhawa sang Ginoo, kaangay sang ilig nga azufre, nagapadabdab sini.

← Chapter 29 Jump to: Chapter 31 →