Isaiah 53

Ilonggo (Ang Biblia (1982))

← Chapter 52 Jump to: Chapter 54 →

1Sin-o bala ang nagpati sang amon balita? Kag sa kay sin-o bala mapahayag ang butkon sang Ginoo?

2Kay nagtubo sia sa atubangan niya subong sang linghud nga tanum, kag subong sang gamut gikan sa duta nga kigas; wala sia sing dagway ukon kaayoayo nga magtolok kita sa iya, kag wala sing katahum nga paghandumon naton sia.

3Gintamay sia kag ginsikway sang mga tawo; lalaki sa mga kasubo, kag nakakilala sang kalisud; kag subong sang isa nga gikan sa iya ang mga tawo nagatago sang ila nawung gintamay sia, kag wala naton sia pagpakamahala.

4Sa pagkamatuud ginpas-an niya ang aton mga kalisud kag gindala ang aton mga kasubo; apang ginkabig naton sia nga ginpilas, ginbunal sang Dios, kag ginsakit.

5Apang sia ginpilas tungud sang aton mga paglalis, ginhanog sia tungud sa aton mga kalautan; ang silot sang aton paghidait yara sa iya, kag sa iya mga labud ginaayo kita.

6Tanan kita kaangay sang carnero nga nagtalang; naglipas kita ang tagsatagsa sa iya kaugalingon nga dalanon; kag ang Ginoo nagpapas-an sa iya sang kalautan naton nga tanan.

7Ginpigus sia, kag ginsakit sia, apang wala sia magtikab sang iya baba; subong sang cordero nga ginadul-ong sa ihawan, kag subong sang oveja nga apa sa atubangan sang iya mga manug-alot, sa amo wala sia magtikab sang iya baba.

8Tungud sa pagpigus kag paghukom ginkuha sia; kag nahanungud sang iya kaliwatan, sin-o bala sa ila ang nagpatugsiling nga gin-utud sia gikan sa duta sang mga buhi, ginbunal tungud sang paglalis sang akon katawohan?

9Kag ginhimo nila ang iya lulubngan upud sa malauton kag upud sa manggaranon nga tawo sa iya kamatayon, bisan nga wala sia magpanglugus, kag wala sing limbong sa iya baba.

10Apang nahamut-an sang Ginoo ang paghanog sa iya; ginpakalisud niya sia; kon himoon niya ang iya kalag nga halad tungud sa sala, makita niya ang iya kaliwat, palawigon niya ang iya mga adlaw; ang kabubut-on sang Ginoo magauswag sa iya kamut;

11makakita sia sang kasakit sang iya kalag kag mabusug sia; tungud sa iya kaugalingon nga pagkilala ang akon matarung nga alagad, magapakamatarung sing madamu; kag sia magabatas sang mga kalautan nila.

12Busa hatagan ko sia sing bahin upud sa mga kadalagkuan, kag magapakigbahin sia sang inagaw upud sa mga makusug; bangud nga gin-ula niya ang iya kalag tubtub sa kamatayon, kag naisipan upud sa mga malalison; apang gindala niya ang sala sang madamu, kag nagatabang tungud sa mga malalison.

← Chapter 52 Jump to: Chapter 54 →