Isaiah 66

Ilonggo (Ang Biblia (1982))

← Chapter 65 Jump to:

1Amo ini ang ginasiling sang Ginoo: “Ang langit amo ang akon trono, kag ang duta palatungan sang akon mga tiil; ano bala nga bagay sang balay ang patindugogn ninyo sa akon, kag ano bala nga duug ang akon palahuwayan?

2Kay ini tanan nga butang ginhimo sang akon kamut, kag ini tanan nga butang nangin-amo, nagasiling ang Ginoo. Apang sa sining tawo magatolok ako, sa iya nga makalolooy kag mahinulsulon sa espiritu, kag nga nagakurug sa akon polong.

3“Sia nga nagapatay sang baka nga lalaki subong sa iya nga nagapatay sing tawo; sia nga nagahalad sing cordero, subong sa iya nga nagalongo sang liog sang ido; sia nga nagadolot sing halad, subong sa iya nga nagadolot sing dugo sang baboy; sia nga nagasonog sing incienso, subong sa iya nga nagapakamaayo sang diosdios. Ginpili nila ang ila kaugalingon nga mga dalanon, kag ang ila kalag nagakalipay sa ila mga kangil-aran;

4ako man magapili sang ila mga pagtalang, kag magadala sa ila sang ila mga kahadluk; bangud nga, sang nagpanawag ako, wala gid sing nagsabat, sang nagpamolong ako wala sila magpamati; kondi ginhimo nila ang malaut sa akon mga mata, kag ginpili ang wala nakon mahamut-i.”

5Pamati sang polong sang Ginoo, kamo nga nagakurug sa iya polong: “Ang inyo mga utud nga nagadumut sa inyo kag nagasobol sa inyo tungud sa akon ngalan nagsiling, ‘Paghimayaon ang Ginoo, agud nga makita namon ang inyo kalipay’; apang ini sila ang pakahuy-an.

6“Ang tingug sang kinagubut gikan sa banwa! Ang tingug gikan sa templo! Ang tingug sang Ginoo, nga nagahatag sing balus sa iya mga kaaway!

7“Sa wala pa sia pagsakiti nag-anak sia; sa wala pa mag-abut ang iya kasakit nag-anak sia sing lalaki.

8Sin-o bala ang nakabati sang among butang? Sin-o ang nakakita sang among mga butang? Matawo bala ang isa ka duta sa isa ka adlaw? Ipanganak bala ang isa ka pungsud sa makaisa lamang? Kay sa gilayon nga ang Sion ginsakitan nag-anak sia sang iya mga anak.

9Dalhon ko bala sa pagkatawo kag indi pag-ipaanak? nagasiling ang Ginoo; ako nga nagapaanak magatakup bala sang tiyan? nagasiling ang imo Dios.

10“Magkalipay kamo upud sa Jerusalem, kag magkasadya tungud sa iya, kamo tanan nga nagahigugma sa iya; magkalipay sa kasadya upud sa iya, kamo tanan nga nagalalaw sa iya;

11agud nga magsoso kamo kag mabusug sa mga dughan sang iya mga paglipay; agud nga maggatas kamo kag magkalipay sa kabugana sang iya himaya.”

12Kay amo ini ang ginasiling sang Ginoo: “Yari karon, palambuton ko sa iya ang paghidait subong sang suba, kag ang himaya sang mga pungsud kaangay sang nagaawas nga ilig; kag magasoso kamo sa iya, kuguson kamo sa kilid, kag daloon sa mga tuhud.

13Subong sang isa nga ginalipay sang iya iloy, sa amo magalipay ako sa inyo; lipayon kamo sa Jerusalem.

14Makita ninyo ini, kag magakalipay ang inyo tagiposoon; ang inyo mga tul-an magalambo kaangay sang linghud nga hilamon; kag ang kamut sang Ginoo makilala ayon sa iya mga alagad, kag may kaalipungut sia batok sa iya mga kaaway.

15Kay yari karon, ang Ginoo magaabut nga may kalayo, kag ang iya mga kangga manginkaangay sang buhawi, sa paghatag sang iya kaakig nga may kapintas, kag sang iya pagsabdong nga may mga dabdab sang kalayo.

16Kay paagi sa kalayo ang Ginoo magahikot sang paghukom, kag paagi sa iya espada, sa tanan nga unud; kag ang mga pinatay sang Ginoo manginmadamu.

17“Ang mga nagapakabalaan kag nagapaninlo sang ila kaugalingon sa pagkadto sa mga katamnan, sa likod sang isa sa tunga, nga nagakaon sang unud sang baboy kag sang kangil-aran kag sang ilaga, matapus sila sing tingub, nagasiling ang Ginoo.

18“Kay nakilala ko ang ila binuhatan kag ang ila mga hunahuna, ang tion nagaabut nga tiponon ko ang tanan nga pungsud kag hambal; kag magaabut sila kag makakita sang akon himaya,

19kag butangan ko sing tanda sa tunga nila. Kag ang nakapalagyo gikan sa ila ipadala ko sa mga pungsud, sa Tarsis, sa Pul, kag sa Lud, nga nagabingat sang pana, sa Tubal kag sa Javan, sa malayo nga mga pulo, nga wala makabati sang akon kabantugan ukon nakakita sang akon himaya; kag ipahayag nila ang akon himaya sa tunga sang mga pungsud.

20Kag pagowaon nila gikan sa tanan nga pungsud ang tanan ninyong utud nga halad sa Ginoo, sa mga kabayo, kag sa mga kangga, kag sa mga tulabon, kag sa mga mula, kag sa mga dromedario, pakadto sa akon balaan nga bukid nga Jerusalem, nagasiling ang Ginoo, subong nga nagadala ang mga anak sang Israel sang ila mga halad sa suludlan nga matinlo pasulud sa balay sang Ginoo.

21Kag gikan sa ila man magakuha ako nga sa mga sacerdote kag nga sa mga Levinhon, nagasiling ang Ginoo.

22“Kay subong nga ang bag-ong kalangitan kag ang bag-ong duta nga himoon ko magapabilin sa atubangan nakon, nagasiling ang Ginoo; sa amo magapabilin ang inyo mga kaliwatan kag ang inyo ngalan.

23Kutub sa isa ka lati tubtub sa isa, kag kutub sa isa ka inugpahuway tubtub sa isa, ang tanan nga unud magakari sa pagsimba sa atubangan nakon, nagasiling ang Ginoo.

24“Kag magagowa sila kag magatolok sa mga bangkay sang mga tawo nga naglalis sa akon; kay ang ila ulud indi mapatay, ang ila kalayo indi mapalong, kag manginkangil-aran sila sa tanan nga unud.”

← Chapter 65 Jump to: