Isaiah 7

Ilonggo (Ang Biblia (1982))

← Chapter 6 Jump to: Chapter 8 →

1Sa mga adlaw ni Acaz nga anak ni Jotam, ang lalaki nga anak ni Uzias, hari sang Juda, si Rezin nga hari sang Siria kag si Peca nga anak nga lalaki ni Remalias nga hari sang Israel nagtaklad sa Jerusalem sa pag-away sini, apang indi makalandas sini.

2Sang ginsugid ini sa balay ni David, “Ang Siria kadampig sang Efraim,” ang iya tagiposoon nagkurug kag ang tagiposoon sang iya katawohan subong sang kakahoyan sang talon nga nagakurug sa hangin.

3Niyan nagsiling ang Ginoo kay Isaias, “Lakat na sa pagsugata kay Acaz, ikaw kag si Sear-jasub nga imo anak nga lalaki, sa ukbung sang pailigan sang ponong nga naibabaw sa dalan sang Latagon sang Manugbunak,

4kag isiling sa iya, ‘Andam ka, kag maghipus, dili magkahadluk, ukon mapunaw ang imo tagiposoon bangud sini nga duha ka ikug sang dungkulan nga nagaaso, tungud sang mapintas nga kaakig ni Rezin kag sang Siria kag sang anak nga lalaki ni Remalias.

5Bangud nga ang Siria, ang Efraim kag ang anak ni Remalias, nagbuko sing malaut batok sa imo, nga nagasiling,

6“Magtaklad kita batok sa Juda kag gamohon ini, kag bulhoan nga sa aton, kag magbutang sing hari sa tunga sini bisan ang anak ni Tabeel,”

7amo ini ang ginasiling sang Ginoong Dios: Dili ini mahimo, kag dili mahanabu.

8Kay ang olo sang Siria amo ang Damasco, kag ang olo sang Damasco si Rezin. (Sa sulud sang kan-uman kag lima ka tuig ang Efraim maboong sa bagay nga indi na manginbanwa sia.)

9Kag ang olo sang Efraim amo ang Samaria, kag ang olo sang Samaria amo ang anak ni Remalias. Kon kamo indi magtoo, sa pagkamatuud indi kamo maglig-on.’”

10Ang Ginoo nagpamolong liwat kay Acaz,

11“Pangayo ka sing tanda sa Ginoo nga imo Dios; pangayoa ini sa kadadalman ukon sa kataasan sa ibabaw.”

12Apang si Acaz nagsiling, “Indi ako magpangayo, kag indi ko pagsulayon ang Ginoo.”

13Kag nagsiling sia, “Pamati kamo karon, O balay ni David! Diotay bala nga butang sa inyo ang maglapyo sang mga tawo, nga lapyoon man ninyo ang akon Dios?

14Busa ang Ginoo gid magahatag sa inyo sing tanda. Yari karon, ang ulay magapanamkon kag magaanak sing lalaki, kag tawgon ang iya ngalan Emmanuel.

15Magakaon sia sing latab kag dugus kon makahibalo na sia magdumili sang malaut kag magpili sang maayo.

16Kay sa indi pa makahibalo ang bata sa pagdumili sang malaut kag pagpili sang maayo, ang duta nga ang iya duha ka hari ginakangil-aran mo bayaan.

17Pakarion sang Ginoo sa imo kag sa imo katawohan kag sa panimalay sang imo amay ang mga adlaw nga wala pa mag-abut kutub sa adlaw nga ang Efraim nagbulag sa Juda—ang hari sang Asiria.”

18Sa sadto nga adlaw magapanitsit ang Ginoo sa langaw nga yara sa malayo gid nga bahin sang mga suba sang Egipto, kag sa putyokan nga yara sa duta sang Asiria.

19Kag magaabut sila kag magahugpa sila tanan sa mga nalupyakan nga mamingaw, kag sa mga litik sang mga igang, kag sa tanan nga habong nga tonokon, kag sa tanan nga halalban.

20Sa sadto nga adlaw kiskison sang Ginoo sang nabaja nga ginhinakayan sa mga bahin sa tabok sang Suba—upud sa hari sang Asiria—ang olo kag ang bulbul sang mga tiil, kag ini magaarot man sang bungut.

21Sa sadto nga adlaw ang tawo magasagud sing baka nga buhi nga bataon kag duha ka carnero;

22kag bangud sang kabugana sang gatas nga ihatag nila, magakaon sia sing latab; kay ang tagsatagsa nga nabilin sa tunga sang duta magakaon sing latab kag dugus.

23Sa sadto nga adlaw ang tagsa ka duug nga may isa ka libo ka puno nga uvas, sa tag-isa ka libo ka bilog nga pilak, manginkasapinitan kag mga talongon.

24Magasulud didto ang isa nga may mga baslay kag pana, bangud nga ang bug-os nga duta manginkasapinitan kag mga talongon;

25kag sa tanan nga kabakoloran nga ginkutkut sang pico, indi ka magakadto didto sa kahadluk sa mga sapinit kag mga talongon; kondi ini manginbuluhian sang mga baka kag talasakon sang mga carnero.

← Chapter 6 Jump to: Chapter 8 →