Isaiah 36

Ilonggo (Ang Biblia (1982))

← Chapter 35 Jump to: Chapter 37 →

1Sa ikapulog apat nga tuig ni Hari Ezequias, si Senaquerib nga hari sang Asiria nagtaklad batok sa tanan nga napamakuran nga banwa sa Juda kag gin-agaw sila.

2Kag ang hari sang Asiria nagpadala kay Rabsaces nga may dakung hangaway gikan sa Laquis pa Jerusalem kay Hari Ezequias. Kag nagtindug sia sa luyo sang iligan sang naibabaw nga ponong sa dakung dalan sa latagon sang manugbunak.

3Niyan naggowa pakadto sa iya si Eliaquim nga anak ni Hilcias, nga tulugyanan sang panimalay, kag si Sebna nga escriba, kag si Joa nga anak ni Asaf, ang manugsulat sang maragtas.

4Kag si Rabsaces nagsiling sa ila, “Isiling ninyo karon kay Ezequias, ‘Amo ini ang ginasiling sang dakung hari, ang hari sang Asiria: Ano bala nga pagsalig ini nga imo ginasaligan?

5Nagahunahuna ikaw nga ang laygay kag kusug nga sa inaway mga polong lamang nga wala sing pulus? Karon sa kay sin-o ka bala nagasalig, nga nagribuk ka sa akon?

6Yari karon, nagasalig ka sa sungkud sini nga basag nga tabun-ak, sa Egipto, nga kon sandigan sang isa ka tawo magadulut ini sa iya kamut kag magalapus sa sini. Subong sini si Faraon nga hari sang Egipto sa tanan nga nagasalig sa iya.

7Apang kon ikaw magsiling sa akon, “Kami nagasalig sa Ginoo nga amon Dios,” indi bala amo sia nga ang iya mataas nga mga duug kag ang iya mga halaran ginkuha ni Ezequias, kag nagsiling sa Juda kag sa Jerusalem, “Magsimba kamo sa atubangan sini nga halaran”?

8Busa karon, hatagi sing mga kalig-onan ang akon agalon nga hari sang Asiria: hatagan ko ikaw sing duha ka libo ka kabayo, kon makasarang ka sa imo bahin sa pagbutang sing mga manugsakay sa ila.

9Paano bala niyan nga masikway mo ang nawung sang isa ka pangolo sang labi kakubus sang mga alagad sang akon agalon, kon nagasalig ka sa Egipto tungud sa mga kangga kag sa mga manugkabayo?

10Labut pa, nagataklad bala ako karon nga wala ang Ginoo batok sini nga duta sa paglaglag sini? Ang Ginoo nagsiling sa akon, Taklad ka batok sini nga duta, kag laglaga ini.’”

11Niyan nagsiling si Eliaquim, si Sebna, kag si Joa kay Rabsaces, “Ginaampo ko sa imo, magpamolong sa imo mga alagad sa Siriahanon nga hambal, kay makahangup kami sini; dili magpamolong sa amon sa hambal sang mga Judio sa mga idulungug sang katawohan nga yara sa kuta.”

12Apang si Rabsaces nagsiling, “Ginpadala bala ako sang akon agalon sa imo agalon kag sa imo, sa pagpamolong sini nga mga polong, kag wala bala niya ako pag-ipadala sa mga tawo nga nagalingkod sa kuta, sa pagkaon sang ila kaugalingon nga higko kag sa pag-inum sang ila kaugalingon nga ihi upud sa inyo?”

13Niyan si Rabsaces nagtindug kag nagsinggit sa daku nga tingug sa hambal sang mga Judio: “Pamati kamo sang mga polong sang dakung hari, ang hari sang Asiria!

14Amo ini ang ginasiling sang hari: ‘Dili pagpalimbonga sa inyo si Ezequias, kay indi sia makasarang sa pagluwas sa inyo.

15Dili magpasalig si Ezequias sa inyo sa Ginoo nga nagasiling, “Sa pagkamatuud ang Ginoo magaluwas sa amon; ini nga banwa indi pag-ihatag sa kamut sang hari sang Asiria.”

16Dili kamo magpamati kay Ezequias; kay amo ini ang ginasiling sang hari sang Asiria: Magpakighidait kamo sa akon kag maggowa pakari sa akon; kag magkaon kamo ang tagsatagsa gikan sa iya uvas, kag ang tagsatagsa gikan sa iya higuera, kag mag-inum kamo ang tagsatagsa sang mga tubig gikan sa iya kaugalingon nga suluptan;

17tubtub nga magkari ako kag magdala sa inyo sa duta kaangay sang inyo kaugalingon nga duta, duta sang uyas kag bag-o nga alak, duta sang kalan-on kag mga ulubasan.

18Mag-andam kamo basi buyukon kamo ni Ezequias nga nagasiling, “Ang Ginoo magaluwas sa aton.” May bisan sin-o bala sang mga dios sang mga pungsud nga nagluwas sang iya duta gikan sa kamut sang hari sang Asiria?

19Diin bala ang mga dios sang Hamat kag Arpad? Diin bala ang mga dios sang Sefarvaim? Naluwas bala nila ang Samaria gikan sa akon kamut?

20Sin-o bala sila sa tunga sang tanan nga dios sini nga mga duta nga nagluwas sang ila duta sa akon kamut, nga ang Ginoo magaluwas sa akon kamut sang Jerusalem?’”

21Apang naghipus sila kag wala magsabat sa iya sing polong, kay ang sogo sang hari amo ini, “Dili sia pagsabta.”

22Niyan si Eliaquim nga anak ni Hilcias, nga tulugyanan sang panimalay, kag si Sebna nga escriba, kag si Joa, ang anak ni Asaf, ang manugsulat sang maragtas, nag-abut kay Ezequias nga nakusnit ang ila mga panapton, kag nagsugid sa iya sang mga polong ni Rabsaces.

← Chapter 35 Jump to: Chapter 37 →