Isaiah 56

Ilonggo (Ang Biblia (1982))

← Chapter 55 Jump to: Chapter 57 →

1Amo ini ang ginasiling sang Ginoo: “Bantayi ninyo ang katarungan, kag himoa ang pagkamatarung, kay ang akon kaluwasan malapit na sa pag-abut, kag ang akon pagkamatarung sa pagpahayag.

2Bulahan ang tawo nga nagahimo sini, kag ang anak sang tawo nga nagahuput sini sing malig-on, nga nagabantay sang inugpahuway gikan sa pagpasipala sini, kag nga nagabantay sang iya kamut gikan sa paghimo sing bisan ano nga malaut.

3Ang dumoloong nga nagsimpon sa Ginoo dili magpamolong, “Ang Ginoo sa pagkamatuud magapain sa akon sa iya katawohan”; kag ang eunuco indi magsiling, “Yari karon, ako kahoy nga mamala.”

4Kay amo ini ang ginasiling sang Ginoo: “Sa mga eunuco nga nagabantay sang akon mga inugpahuway, nga nagapili sang mga butang nga nagapahamuut sa akon kag nagahuput sing malig-on sang akon katipan,

5sa ila magahatag ako sa akon balay kag sa sulod sang akon mga kuta sing handumanan kag ngalan nga maayo pa sa mga anak nga lalaki kag sa mga anak nga babayi; hatagan ko sila sing ngalan nga dayon nga indi mawala.

6“Ang mga dumuloong man nga nagsimpon sa Ginoo, sa pag-alagad sa iya, sa paghigugma sang ngalan sang Ginoo, nga mangin-iya mga alagad, ang tagsatagsa nga nagabantay sang inugpahuway, gikan sa pagpasipala sini, kag nagahuput sing malig-on sang akon katipan—

7bisan sila dalhon ko sa akon balaan nga bukid, kag lipayon sila sa akon balay sang pangamuyo; ang ila mga halad-nga-sinonog kag ang ila mga halad batonon sa akon halaran; kay ang akon balay tawgon nga balay sang pangamuyo tungud sa tanan nga mga katawohan.

8Ang Ginoong Dios nagasiling, nga nagatipon sang mga sinobol sang Israel, tiponon ko pa ang iban sa iya luwas sa iya kaugalingon nga mga ginatipon.”

9Kamo tanan nga kasapatan sang latagon, kari sa paghalunhon— tanan kamo nga kasapatan sa talon.

10Ang iya mga manugbantay bulag, sila tanan walay ihibalo; sila tanan apa nga mga ido, indi sila makataghol; nga nagadamgo, nga nagaloko, nga nagahigugma sa pagtolog.

11Ang mga ido dalok; indi sila mabusug. Ang mga manugpahalab man indi makahangup; naglipas sila tanan sa ila kaugalingon nga dalanon, ang tagsatagsa sa iya daug, gikan sa tagsa ka duug.

12“Kari kamo,” nagasiling sila, “magakuha ako sing alak, busgon ta ang aton kaugalingon sing ilimnon nga masingkal; kag ang buwas manginsubong sining adlaw, nga dimatupungan.”

← Chapter 55 Jump to: Chapter 57 →