Isaiah 23

Ilonggo (Ang Biblia (1982))

← Chapter 22 Jump to: Chapter 24 →

1Ang lulan sang Tiro. Uluwang, kamo nga mga sakayan sang Tarsis. kay ginwagwag ini, sa bagay nga wala sing balay ukon wala sing pagsulud! Kutub sa duta sang Kitim ginpahayag ini sa ila.

2Magpahimonong, kamo nga mga pumuluyo sang baybayon, kamo nga mga manugbaligya sang Sidon, ang imo mga manugbalita nag-agi sa dagat kag sa madamung tubig;

3ang imo pangabuhian amo ang uyas sang Sihor, ang patubas sang Nilo; ikaw ang balaligyaan sang mga pungsud.

4Magkahuya ka, O Sidon, kay ang dagat nagpamolong, ang pamakud sang dagat, nga nagasiling: “Wala ako pagsakiti ukon nag-anak, wala ako magsagud sing mga pamatan-on nga lalaki ukon magbatiti sing mga ulay.”

5Kon mag-abut ang sugid sa Egipto, magakasakit sila sing tama sa sugid nahanungud sang Tiro.

6Tabok kamo sa Tarsis, maghaya, kamo nga mga pumuluyo sang baybayon!

7Amo bala ini ang inyo malipayon nga banwa nga ang iya pagkagulang kutub pa sa mga adlaw nga dumaan, nga ang iya mga tiil nagdala sa iya sa malayo sa pagpanlugayaw?

8Sin-o bala ang nagtuyo sini batok sa Tiro, ang manugtagtag sang mga purungpurung, nga ang iya mga manugbaligya mga principe, nga ang iya mga manugpatikang mga dungganon sang duta?

9Ang Ginoo sang mga kasoldadosan nagtuyo sini, sa pagdagta sang bugal sang bug-os nga himaya, sa pagdala sa katamayan sang tanan nga dungganon sang duta.

10Latas ka sa imo duta subong sang Nilo, O babayi nga anak sang Tarsis; wala na sing pagpugung.

11Gin-untay niya ang iya kamut sa ibabaw sang dagat, gin-uyug niya ang mga ginharian; ang Ginoo naghatag sing sogo nahanungud sang Canaan sa paglaglag sang iya mga pamakud.

12Kag nagsiling sia: “Indi ka na magkalipay, O ikaw nga pinigus nga anak nga ulay sang Sidon; tindug ka, magtabok sa Kitim, bisan didto wala ka sing pahuway.”

13Yari karon ang duta sang mga Caldeanhon! Ini nga katawohan wala na; ginpasad ini sang Asiriahanon tungud sa mga nagapuyo sa kamingawan. Ginpatindug nila ang ila mga torre, ginlaglag nila ang ila mga palacio, ginguba nila ini.

14Uwang, kamo nga mga sakayan sang Tarsis, kay ang inyo pamakud nawagwag.

15Sa sadtong adlaw ang Tiro kalimtan sing kapitoan ka tuig, sono sa mga adlaw sang isa ka hari. Sa matapus ang kapitoan ka tuig, mahanabu sa Tiro subong sang ambahanon sang babayi nga makihilawason:

16“Kuha ka sing arpa, libut ka sa banwa, ikaw nga makihilawason nga babayi nga nalimtan! Lanton ka sing malolot, amba sing madamung ambahanon, agud nga madumduman ka.”

17Sa tapus ang kapitoan ka tuig, ang Ginoo magaduaw sa Tiro, kag magabalik sia sa iya sohol, kag magapakamahilawason sa tanan nga ginharian sang kalibutan sa kadaygan sang duta.

18Ang iya inugbaligya kag ang iya sohol manginbalaan sa Ginoo; indi ini pagpakamahalon ukon tipigan, kay ang iya inugbaligya manginsa ila nga mga nagapuyo sa atubangan sang Ginoo sa pagkaon sing tuman kag sa mahunit nga panapton.

← Chapter 22 Jump to: Chapter 24 →