Isaiah 65

Ilonggo (Ang Biblia (1982))

← Chapter 64 Jump to: Chapter 66 →

1Ginpakisayran ako sang wala magpamangkot sa akon; nakita ako sang mga wala magpangita sa akon. Nagsiling ako, “Toloka ako, toloka ako,” sa pungsud nga wala matawag sa akon ngalan.

2Gin-untay ko sa bug-os nga adlaw ang akon mga kamut sa katawohan nga mabinatoon, nga nagalakat sa dalanon nga indi maayo, sono sa ila kaugalingon nga mga hunahuna;

3katawohan nga nagapaakig sa akon sa guya nakon sing dalayon, nga nagahalad sa mga katamnan kag nagasonog sing incienso sa ibabaw sang mga tisa;

4nga nagapuyo sa mga lulubngan, kag nagapabilin sa mga duug nga natago; nga nagakaon sing unud sang baboy, kag sabaw sang makangilil-ad nga mga butang sa ila mga suludlan;

5nga nagasiling, “Palayo ka, dili ka magpalapit sa akon, kay ako balaan pa sa imo.” Indi sila aso sa akon ilong, kalayo nga nagadabdab sa bug-os nga adlaw.

6Yari karon, nasulat na ini sa atubangan nakon: “Indi ako maghipus, kondi magatumbas, hoo, magatumbas ako sa ila dughan

7sang inyo mga kalautan kag sang mga kalautan sang inyo mga ginikanan sing tingub, nagasiling ang Ginoo; bangud nga nagsonog sila sing incienso sa mga bukid kag nagpasipala sa akon sa mga kabakoloran, busa sukbon ko sa ila sabak ang bayad sa ila binuhatan nga una.”

8Amo ini ang ginasiling sang Ginoo: “Subong sang bag-ong alak nga makita sa pinungpung, kag ang isa nagasiling, ‘Dili ini paglaglaga, kay may yara nga pagpakamaayo sa iya,’ amo ini ang himoon ko tungud sa akon mga alagad, agud nga indi ko malaglag sila tanan.

9Magapagowa ako sing mga kaliwatan gikan kay Jacob, kag gikan kay Juda ang manugpanubli sang akon kabukiran; ang akon pinili magapanubli sini, kag ang akon mga alagad magapuyo didto.

10Ang Saron manginhalalban sang mga panong, kag ang Nalupyakan sang Acor duug nga lulukohan sang kabakahan, tungud sa akon katawohan nga nagpangita sa akon.

11Apang kamo nga nagabiya sa Ginoo, nga nagakalipat sang akon bukid nga balaan, nga nagaaman sing latok sa Kapalaran kag nagapuno sang nasimbog nga alak sa Suerte;

12itangdo ko kamo sa espada, kag kamo tanan magaduko sa palatyan; bangud nga, sang nagpanawag ako, wala kamo magsabat, sang nagpamolong ako, wala kamo magpamati, kondi ginhimo ninyo ang malaut sa akon mga mata, kag ginpili ang wala ko pagkalipayi.”

13Busa amo ini ang ginasiling sang Ginoong Dios: “Yari karon, ang akon mga alagad magakaon, apang kamo gutumon; yari karon, ang akon mga alagad magainum, apang kamo uhawon; yari karon, ang akon mga alagad magakalipay, apang pakahuy-an kamo;

14yari karon, ang akon mga alagad magaamba sa kalipay sang tagiposoon, apang kamo magahibi sa kasubo sang tagiposoon, kag magahaya sa kagamo sang espiritu.

15Bayaan ninyo ang inyo ngalan nga pagpakamalaut sa akon pinili, kag ang Ginoong Dios magapatay sa imo; apang ang iya mga alagad tawgon niya sa iban nga ngalan.

16Sa bagay nga ang nagapakamaayo sang iya kaugalingon sa duta magapakamaayo sang iya kaugalingon sa Dios sang kamatooran, kag ang nagasumpa sa duta magasumpa sa Dios sang kamatooran; bangud nga ang una nga mga kalisdanan ginakalipatan kag bangud nga natabonan sila sa akon mga mata.

17“Kay yari karon, ako nagatuga sing bag-ong mga langit kag bag-ong duta; kag ang una nga mga butang indi na pagdumdumon ukon mag-abut sa painoino.

18Apang magkasadya kamo kag magkalipay sa gihapon sa akon ginatuga; kay yari karon, akon ginatuga ang Jerusalem nga pagkasadya, kag ang iya katawohan nga kalipay.

19Magakalipay ako sa Jerusalem, kag magakasadya sa akon katawohan; indi na gid mabatian sa iya ang tingug sang paghibi kag ang tingug sang pagtangis.

20Wala na didto sing bata nga nagakabuhi sing pila ka adlaw, ukon tawo nga tigulang nga wala makapuno sang iya mga adlaw, kay ang bata mapatay nga isa ka gatus ka tuig, kag ang makasasala nga isa ka gatus ka tuig manginpinakamalaut.

21Magapatindug sila sing mga balay kag puy-an sila; magatanum sila sing mga ulubasan kag magakaon sang bunga nila.

22Indi sila magpatindug kag iban ang magapuyo; indi sila magtanum kag iban ang magakaon; kay subong sang mga adlaw sang kahoy mangin-amo ang mga adlaw sang akon katawohan, kag ang akon mga pinili magakalipay sing malawig sa binuhatan sang ila mga kamut.

23Indi sila magpangabudlay sa walay pulus, ukon magpanganak nga sa kalalat-an; kay sila kaliwat sang pinakamaayo sang Ginoo, kag ang ila anak upud sa ila.

24Sa wala pa sila magpanawag ako magasabat, sa nagapamolong pa sila ako magapamati.

25Ang lobo kag ang cordero magakaon sing tingub, ang leon magakaon sing dagami kaangay sang baka nga lalaki; kag ang yab-ok manginkalan-on sang man-ug. Indi sila maghalit ukon maglaglag sa bug-os ko nga balaan nga bukid, nagasiling ang Ginoo.”

← Chapter 64 Jump to: Chapter 66 →